Сунтаар улууһугар үөрэх хаачыстыбата үрдүө

Олунньу 12 күнүгэр, Сунтаар улууһугар оробуочай сырыыннан СӨ Ил Түмэн билимҥэ, үөрэхтээһиҥҥэ, култуураҕа, маассабай информация сириэстибэлэригэр уонна уопсастыбаннай үлэ дьыалаларыгар сис кэмитиэт бэрэссэдээтэлэ Феодосия Габышева кэллэ.

Сунтаар улууһа урут, аны да үөрэҕирии сайдыытыгар улахан суолтаны ууран аныгы олох ирдэбилинэн сөптөөх хайысханнан үлэлээн кэлбит улуус буоларын бэлиэтээн туран, үөрэҕирии систиэмэтин үлэһиттэрин кытары көрсөн тыа сиригэр үөрэх хаачыстыбатын уонна учуутал статуһун үрдэтэргэ туһуламмыт саҥа сокуон барылын оҥорууга төгүрүк остуол тула сүбэ мунньах ыыттылар. 

2019 сыллаахха СӨ Ил Дарханын өйөөһүнүнэн Бүлүү бөлөх улуустарыгар «Вилюйский образовательный форум» тэриллибитэ, быйыл өссө киэҥ хабааннаахтык Үөһээ-Бүлүүгэ кииннээн үөрэх сайдыытын кэскилин, стратегиятын торумнааһыҥҥа  учуонайдар, саҥаны айааччылар, педагогтар уонна инновационнай хайысханнан үлэлиир оскуолалар кыттыыны ылыахтара диэн иһитиннэрдэ.