Сэтинньи 25 күнэ – биһиги өрөспүүбүлүкэтигэр Олоҥхо күнэ!

«Сунтаар улууһа (оройуона)» муниципальнай оройуон дьаһалтатын уонна оройуон Сэбиэтин депутаттарын ааттарыттан Олоҥхо күнүнэн итиитик-истиҥник эҕэрдэлиибит!

2005 сыл сэтинньи 25 күнэ биһиэхэ барыбытыгар дьоһун суолталаммыта – бу күн ЮНЕСКО Олоҥхону киһи аймах тылынан уонна өйүнэн айбыт култуурунай нэһилиэстибэтин үйэттэн үйэҕэ бэриллэр күндү баайа диэн аан дойду шедеврдэрин ахсааныгар киллэрбитэ. Бу улахан ситиһиини кэрэһилээн биһиги өрөспүүбүлүкэбитигэр Олоҥхо күнэ олохтоммута. Сунтаарбыт улууһа былыр-былыргыттан олоҥхону ойуулуур, оһуохайы олохтуур, ырыаны ыпсарар, хоһоону хоһуйар, алгыстаах санаалаах дьонноох-сэргэлээх, эриэккэс-сиэдэрэй айылҕалаах — Олоҥхо Дойдутунан суон сураҕырар. Бырамыысылыннас, аныгы технология сайдар кэмигэр биһиги улуус култуура сайдыытын сабыдыалын үрдүк таһымҥа тутан, сайыннаран, өбүгэ саҕаттан үтүмэн үгүс үйэни уҥуордаан кэлбит төрүт үгэспитин ыһыктыбакка күн бүгүҥҥэ диэри харыстаан, бүөбэйдээн илдьэ кэллибит, ол төрүөтүнэн 2017 сыллаахха «Сунтаар – Олоҥхо дойдута» буоларбытын дөкүмүөнүнэн бигэргэппиппит.

Улууспут олохтоохторун өссө төгүл бу кэрэ бырааһынньыгынан эҕэрдэлиибит! Олоҥхоҕо хоһулларыныы — аламай күн сыралын сылааһа, бар дьоммут алгыстаах санаата, олох үрдүк көстүүлэрин сырдык сыдьаайдара Эһигитини инникитин өссө үрдүккэ кынаттаатыннар, саҥаттан – саҥа үрдэллэри дабайарга ситиһиилэри, дьиэ кэргэҥҥитигэр или-эйэни, чэгиэн-чэбдик доруобуйаны баҕарабыт! 

«Сунтаар улууһа (оройуона)»
муниципальнай оройуон баһылыга:                                             А.В. Григорьев

Сунтаар улууһун депутаттарын
Сэбиэтин бэрэссэдээтэлэ                                                            У.Д. Попова

Если вы увидели интересное событие, присылайте фото и видео на наш Whatsapp
+7 (999) 174-67-82
Если Вы заметили опечатку в тексте, просто выделите этот фрагмент и нажмите Ctrl+Enter, чтобы сообщить об этом редактору. Спасибо!
Система Orphus
Наверх