Саргылана Игнатьева төрөөбүт тыл уонна сурук-бичик күнүнэн эҕэрдэлиир

Ытыктабыллаах Саха сирин олохтоохторо!

Култуура уонна искусство Арктикатааҕы судаарыстыбаннай институтун уонна тус бэйэм ааппыттан төрөөбүт тыл уонна сурук-бичик күнүнэн эҕэрдэлиибин!

Аан дойдуга сайдыы тэтимэ күүһүрэн, саҥа технологиялар олоххо киирэр үйэлэригэр тыыннаах ийэ тыл улахан да, кыра да омуктар сайдар туруктара кэскиллэнэригэр сүрүн суолталаах. 

Биһиги өрөспүүбүлүкэбитигэр төрөөбүт тыл уонна сурук-бичик күнэ норуоттар сомоҕолоһууларын уонна түмсүүлэрин күнүнэн буолла. Төрөөбүт тыл көмөтүнэн дьоммут-сэргэбит талаана арыллар, билиибит-көрүүбүт хаҥыыр, сиэрбит-майгыбыт, өйбүт-санаабыт сайдар, хотугу сир үйэлээх үгэһэ салҕанар.

Биһиги көлүөнэ нуучча, саха, эбээн, эбэҥки, долгаан, дьүкээгир, чукча тылын харыстыыр, ону ыччаппыт туһугар чөл тутан хаалар – ытык сорукпут. Ол туһугар биһиги институппут улахан болҕомтотун ууран үлэлиир-хамсыыр. 

Бүгүҥҥү үөрүүлээх күҥҥэ төрөөбүт тылбытын харыстыырбытыгар, култуура нэһилиэстибэтин чөл тутан хааларбытыгар, ситиһиини баҕарабын!