Саха тылын уонна литературатын бастыҥ кэбиниэтэ талылынна

Олунньу 16 күнүттэн муус устар 20 күнүгэр диэри өрөспүүбүлүкэтээҕи «Саха тылын уонна литературатын бастыҥ кэбиниэтэ-2024» кэтэхтэн күрэх буолан ааста.

Күрэҕи СӨ Үөрэҕин уонна наукатын министиэристибэтэ, Үөрэх уонна наука үлэһиттэрин идэлээх сойуустарын өрөспүүбүлүкэтээҕи кэмитиэтэ, С.Н. Донской-II аатынан Үөрэҕи сайыннарар уонна идэни үрдэтинэр институт тэрийэн ыыттылар.

Күрэх сүрүн сыала — саха тылын учууталларын айымньылаах үлэлэрин сайыннарыы, маастарыстыбаларын үрдэтии.

Уопсайа 45 сайаапка киирбитэ. 1-гы түһүмэххэ 18 үөрэх тэрилтэтэ ааспыта. 14 улуус, 18 оскуола, 39 саха тылын уонна литературатын учууталлара кыттыыны ыллылар.

Күрэх 2 түһүмэҕинэн ыытылынна:

1 түһүмэх — «Саха тылын уонна литературатын кэбиниэтин билиһиннэрии».

Манна күрэх кыттааччылара кэбиниэттэрин ис-тас көрүҥүн, хааччыллыытын видеоҕа устан ыыппыттара уонна кэбиниэт пааспарын көрдөрбүттэрэ.

2-с түһүмэх — «Айар-тутар лаборатория».

Бу түһүмэххэ кыттааччылар кэбиниэт методическай матырыйаалларын туһанан маастар кылаас ыыттылар.

Дьүүллүүр сүбэҕэ «Айар» национальнай кыһаттан Үөрэх уонна оҕо кинигэтин киинин салайааччыта Никифорова Марина Георгиевна уонна эрэдээктэр Жиркова Аксинья Николаевна үлэлээтилэр.

«Айар» национальнай кыһа анал бирииһин Мэҥэ Хаҥалас улууһун А.С. Шахурдин аатынан Төҥүлү орто оскуолатын учуутала Баишева Анастасия Николаевна, Сунтаар улууһун Л. Попов аатынан Арыылаах агро-оскуолатын учууталлара Ноговицына Елена Прокопьевна, Никифорова Любовь Семеновна, Ноговицын Станислав Александрович ыллылар.

Күннэтэ сахабыт тылын, култууратын сайыннарар, чэчирэтэр туһугар сыралаахтык үлэлиир бары күрэххэ кыттыбыт учууталлары эҕэрдэлиибит, өссө үгүс ситиһиилэри, үрдүк дабайыылары баҕарабыт!