Саха театра айар дьылын арыйар: Биһигини кытта бииргэ буолар түгэни мүччү тутумаҥ

Күндү көрөөччүлэрбит!

Инники айар соруктар, саҥа туруоруулар, испэктээкиллэр. Саха театрын халын кэлэктиибэ сайыҥҥы сынньалаҥ кэннэ саҥа 119-с айар дьылын арыйаары үлэҕэ таҕыста. Балаҕан ыйын 20 күнүгэр Былатыан Ойуунускай аатынан Саха театра тапталлаах көрөөччүлэригэр анаан быйылгы айар дьылын саха дьонун кутун-туппут испэктээкиллэринэн арыйыа.

Сайын устата театр улахан саалатыгар уонна Алампа аатынан аччыгый саалаҕа улахан өрөмүөн ыытылынна. Көрөөччү олорор кириэһилэлэрэ, уот-күөс, тыас-уус бүүс-бүтүннүү уларыйда, итиэннэ улахан саала муостата саҥардылынна. Быйылгы 2024 сыл М.С. Щепкин аатынан үрдүкү театральнай училищены 1974 сыллаахха бүтэрбит Кыһыл көмүс устуудьуйа 50 сыллаах өрөгөйдөөх үбүлүөйүгэр ананар. Ол чэрчитинэн алтынньы ыйга саха театральнай ускуустубатын аар саарга аатырдыбыт ытык артыыстарбыт испэктээкиллэрэ көстүөхтэрэ.

Бу күннэргэ саха театрын кытта бииргэ буолар түгэни мүччү тутумаҥ
Күндү көрөөччүлэрбитин балаҕан ыйын 20 күнүттэн испэктээкиллэргэ ыҥырабыт
🎭 20.09.24. 18:00 “КЭРЭ КӨМҮСКЭЛИГЭР” Иван Гоголев Аҕа Дойду Улуу сэриитигэр Ленинград блокадатын 80 сылыгар уонна А.Н. Островскай аатынан Ленинградтааҕы театральнай институкка үөрэнэ барбыт Саха студиятын устудьуоннарын сырдык ааттарын үйэтитиигэ анаммыт испэктээкил.

🎭 21.09.24. 18:00 ЛООКУУТ УОННА НЬУРГУҺУН Тимофей Сметанин норуот номоҕор олоҕуран суруллубут драматыгар икки ыал олоҕо көстөр. Бу ыал оҕолоро баай кыыһа Ньургуһун, дьадаҥы ыал оҕото Лоокуут бииргэ уөскээн улааппыттара, бэйэ бэйэлэрин таптаһаллар. Ньургуһун аҕата кыыһын баай ыал уолугар кэргэн биэрэргэ быһаарынар…

🎭 22.09.24. 18:00 ч. “УЧУУТАЛ”. Дыраама ССРС норуодунай учуутала — саха норуота сайдыылаах, үрдүк техническэй билиилээх буоларын туһугар бүтүн олоҕун анаабыт, элбэх, аан дойдуга тиийэ биллиилээх учуонайдары иитэн таһаарбыт, научнай-техническэй интеллигенцияны үөскэтиигэ өлбөт-сүппэт үтүөлээх, саха норуотун интеллектуальнай күүстэрэ уһуктуутугар быһаарыылаах оруолу оонньообут Михаил Андреевич Алексеев уһулуччулаах олоҕун туһунан.

🎫 https://iframeab-pre5643.intickets.ru/seance/28597158
✅ «ПУШКИН КААРТАТЫН» туһанан босхо сылдьыҥ
🏛 Каасса күн ахсын өрөбүлэ, тохтобула суох 10:00-18:00 үлэлиир
☎ 34-13-31