“Саха сирин суруналыыстара” энциклопедия таҕыста

“Саха сирин суруналыыстара” диэн биографическай энциклопедия бэчээттэнэн таҕыста. Бу 1000 экземплярдаах кинигэни Саха сирин суруналыыстарын сойууһа Ил Дархан гранын суотугар таһаарда. Манна 891 суруналыыс олоҕун, үлэтин туһунан дааннайдар киирбиттэр.

Галина Бочкарева, Саха сирин суруналыыстарын сойууһун бэрэссэдээтэлэ:

—100-тэн тахса сылы быһа суруналыыстар өрөспүүбүлүкэ историятын, олоҕун-дьаһаҕын суруйан, көрдөрөн кэллилэр, кини сайдыытыгар улахан кылааттарын киллэрдилэр. Туох баар сүрүн хамсааһыннар, куораттар, улуустар олохторун-дьаһахтарын, кыһалҕалар, үлэ дьонун ситиһиилэрин туһунан суруйан, сырдатан кэллилэр. Бибилэтиэкэҕэ баран, ханнык баҕарар хаһыаты арыйдахха, ол кэмнээҕи олох-дьаһах, история ырылыччы көстөн кэлэр.

Энциклопедияҕа 15-тэн элбэх сыл үлэлээбит суруналыыстар киирдилэр. Аан бастаан саха суруналыыстыкатын номоххо киирбит төрүттээччилэрин, фронтовиктар, салайааччылар, университет суруналыыстыкаҕа салаатын преподавателлэрин, улуустар хаһыаттарын, электроннай таһаарыылар суруналыыстарын, эрэдээктэрдэрин биографиялара хомуллан киирдилэр.

Кэнники кэмҥэ полиграфия өҥөтө ыараан хаалан, өҥнөөх хаартыскалардаах лиистэртэн аккаастанарга күһэлиннибит. Электроннай көрүҥүн сойуус саайтыгар таһаарарга былаанныыбыт.  

Если вы увидели интересное событие, присылайте фото и видео на наш Whatsapp
+7 (999) 174-67-82
Если Вы заметили опечатку в тексте, просто выделите этот фрагмент и нажмите Ctrl+Enter, чтобы сообщить об этом редактору. Спасибо!
Система Orphus
Наверх