Саха чулуу бөҕөһө Юрий Андреев туһунан кинигэ таҕыста

Ньурба ньургуна, чулуу бөҕөс Юрий Андреев диэн кинигэ бэчээттэнэн таҕыста.

Көҥүл тустууга ССРС, РСФСР, Саха АССР спордун маастара, ыарахан ыйааһыҥҥа маастардар ортолоругар Арассыыйаҕа маҥнайгынан аан дойду чөмпүйүөнэ, СӨ спордун хапсаҕайга 1 №-дээх Бочуоттаах маастара, СӨ үтүөлээх тренерэ, СӨ физическэй култууратын үтүөлээх үлэһитэ, СӨ ХХ үйэҕэ спорка икки төгүллээх лауреата, Ньурба улууһун уонна Бордоҥ нэһилиэгин бочуоттаах олохтооҕо Юрий Андреев туһунан кинигэни элбэх кинигэ ааптара, биллиилээх кыраайы үөрэтээччи Татьяна Сидорова уонна Юрий Степанович кэргэнэ, өр сылларга улууска салайар үлэҕэ ситиһиилээхтик үлэлээбит Анна Уларова бэлэмнээтилэр. Кинигэ улуус дьаһалтатын үбүлээһининэн 200 ахсаанынан бэчээттэннэ.

СӨ Ил Дархана Айсен Николаев, улууспут баһылыга Алексей Иннокентьев, улуус Сүбэтин бэрэссэдээтэлэ Сергей Евсеев, Ил Түмэн дьокутаата Владимир Прокопьев, Саха сирин спордун салайааччылара уо.д.а. киирии тыллара кинигэ ис хоһоонун өссө тупсараллар. Юрий Андреев төрүччүтэ, аймахтара, кини кылааһынньыктарыттан саҕалаан бииргэ алтыспыт доҕотторо, спортсменнар, тренердэр уо.д.а. ахтыылара, көбүөргэ сүрүн утарсааччыларын — дойду аатырбыт тустууктарын хаартыскалара киирбиттэр. Өссө биир кэрэхсэбиллээҕэ туспа түһүмэх быһыытынан Юрий Андреев короннай приемнара уруһуйданан уонна быһаарыы суруктанан бэриллибиттэр. Аны кинигэҕэ баар кюар кодунан Юрий Андреев 1993 с. маастардар ортолоругар Аан дойду чемпионатыгар, 1995 уонна 1997 сс. Манчаары Оонньууларыгар туста сылдьара көстөр, бу эмиэ олус сонун уонна кэрэхсэбиллээх.

Юрий Степанович быйыл 71 сааһын туолла. Саха сирин спордун сайдыытыгар уонна Ньурба улууһун социальнай-экэнэмиичэскэй сайдытыыгар сүдү кылаатын киллэрбит, саха аатын дьоһуннук аатырдыбыт биир дойдулаахпыт туһунан дьэ чахчы бэртээхэй кинигэ тахсыбыт. Кинигэ сүрэхтэниитэ бэс ыйыгар буолара былааннанар.