«СААСКЫ ФЕСТ» республикатаҕы фестиваль Мэҥэ-Хаҥалас улууһугар түмүктэннэ

«Көмүлүөк» хампаанньа тэриллибитэ 20 сылыгар анаммыт тэрээһини быйыл саас тыа сиригэр олорор дьоҥҥо-сэргэҕэ чугаһатан Сунтаар, Ньурба, Үөһэ Бүлүү, Бүлүү, Горнай, Таатта улуустарыгар ыыттылар уонна ааспыт өрөбүлгэ Мэҥэ-Хаҥалас улууһугар Майаҕа түмүктээтилэр.

Сарсыардаттан Дмитрий Ходулов аатынан култуура киинигэр «Сааскы фест» чэрчитинэн туойтан оҥорорго үөрэтэр маастар-кылаас, күнээҕигэ туттар таас, туой сахалыы иһити-хомуоһу, алтан симэҕи, саха аныгы таҥаһын, дьиэҕэ-уокка туттар малы билиһиннэрэр «Көмүлүөк. 20 сыл бииргэ» дьаарбаҥката буолла.

Күнүскү өттүгэр хампаанньа салайааччылара олохтоохтору кытта атах тэпсэн олорон саха материальнай култууратын, креативнай экономикатын инникитин туһунан нетворкинг-көрсүһүүгэ санааларын үллэһиннилэр. Дизайнердар Арылы Сандаар, Андрей Зыков айбыт «Сандаар» саха аныгы таҥаһын уонна « Аар Алтан» алтантан симэҕин көрдөрдүлэр.

Хампаанньа күөсчүттэрэ, салайааччылара Мэҥэ-Хаҥаласка киэҥник биллэр, Саха сиригэр туойу биир бастакынан сөргүтэн саҕалаабыт «Туойаана» мастарскыайыгар ыалдьыттаатылар. Бу туой кыһатын 2000 с. кэргэннии Валентина Владимировна уонна Петр Егорович Егоровтар тэрийбиттэрэ. Кинилэр дьоҕус мастарскыайдарыгар хаһаайка Валентина туойу уһаарар сыаҕын, дьону үөрэтэр маастар-кылаас хоһун, араас сылларга айбыт туойтан скульптураларын, ураты иһиттэрин көрдөрдө.
«Сааскы фест» Мэҥэ-Хаҥалас Майа олохтоохторун улаханнык сэргэхситтэ, кэрэхсэттэ, элбэх киһиттэн махтал тылын ылла.

Аныгыскы улахан тэрээһин «Сайын кэлиитэ» Ньукуолун күн -ыам ыйын 22 күнүгэр киин куоракка буолуоҕа.