Сүдү туһалаах куурус буолла

Мэҥэ-Хаҥалас улууһун оскуола иннинээҕи саастаах оҕолору иитэр — үөрэтэр тэрилтэлэр педагогическай үлэһиттэригэр алтынньы ый 8-10 күннэригэр Аллараа Бэстээххэ идэни үрдэтэр куурус 58 киһини хабан ыытылынна. Түһүлгэни педагогическай наука кандидата Ольга Михалева, педагогическэй наука билимин хандьыдаата, С.Н.Донской-II аатынан Үөрэҕи сайыннарар уонна идэ таһымын үрдэтэр үнүстүүт дириэктэрин солбуйааччыта, салайан ыытта. Кууруска сылдьыбыт педагогтар санааларын суруйбуттара бу үс күҥҥэ ыытыллыбыт үөрэх чахчы кэмигэр, дириҥ ис хоһоонноохтук, уһуйаан иитэр-үөрэтэр үлэтин бары хайысхаларын хабан ыытыллыбытын бигэргэтэр.

Төҥүлүтээҕи “Олимпионик” оҕону сайыннарар киин сүрүннүүр иитээччитэ С.Шестакова: “Ольга Иннокентьевна үлэбитигэр баар ыарырҕатар өрүттэрбитин араас өттүттэн көрөн быһааран, сүбэлээн биэрдэ. Бөлөхтөрүнэн арааран, эдэр да, опыттаах да педагогтар үөрэтэр технологияларын туһанан, айымньыны ырытан, оҕо тылын сайыннарар ньымалары көрдөрөн, педагогтары практически үлэлэтэн куурус материала толору тиийэригэр киэҥ үлэ ыытылынна. Бу олус туһалаах куурус педагогтары айымньылаах үлэҕэ көҕүлүөҕэ диэн эрэнэбит”

М.Тастыгина, Харатааҕы «Кэрэчээн» оҕо саадын сүрүннүүр иитээччитэ:
“3 күн устата үөрэхпит теоретическай уонна практическай хайысхалаах ааста. Үлэбит уопсай идеята иитии уонна сыһыан хайысхатыгар туһаайыллан истээччилэр элбэх билиини, үлэбитигэр элбэх туһалаах сүбэлэри ылынныбыт. Ольга Иннокентьевнаҕа маннык сэргэх, биһиэхэ, практик үлэһиттэргэ, наадалаах куурсу кэлэн ыыппытыгар улахан махталбытын тиэрдэбит, үлэбитигэр элбэҕи саҥаны киллэрэн туһаныахпыт диэн эрэллээхпит”.

Майатааҕы «Мичил» оҕону сайыннарар киин сүрүннүүр иитээччитэ В. Захарова: “Ол курдук куурус сүрүннүүр чааһа практическай үлэнэн ыытылынна. Кыттааччылары бөлөхтөргө араартаан оонньуу быһыытынан ыытыллыбыта олус интириэһиргэттэ. Иитээччилэр ыйынньыктарын, босуобуйаларын тула уонна да атын темаларга методическай көмө ылан билиилэрин кэҥэттилэр. Инникигэ оҕону иитэр-үөрэтэр үлэбитигэр тирэбил оҥосторго элбэх билиини, саҥа ньыманы туһанарга опыт ыллыбыт”.
Баатаратааҕы «Кэскил» оҕо саадын иитээччитэ М. Попова:
“Бу үс күннээх тыл сайдыытыгар анаммыт, ФОП ирдэбилигэр сааһыламмыт олус кэрэхсэбиллээх кууруска сылдьаммыт иитээччилэр олус элбэҕи биллибит, үлэбитигэр туһалааҕы иҥэриннибит. Ольга Инокентьевна ураты олоххо көрүүтэ, үөрэххэ сатабыла биһигини айымньылаах үлэҕэ кынаттаата”.

Мэҥэ-Хаҥалас улууһун уһуйааннарын үлэһиттэрэ