Олоҥхо Дойдутун уран уустарын түһүлгэтэ тэрилиннэ

Олоҥхо Дойдутун уран уустарын түһүлгэтэ тэрилиннэ
Бүгүн, кулун тутар 30 күнүгэр, С.А. Зверев – Кыыл Уолун аатынан норуот айымньытын киинигэр суон сурахтаах биһиги улуус уус-уран тарбахтаах уустара, имигэс илиилээх иистэнньэҥнэрэ түмүстүлэр.

Үөрүүлээх тэрээһиҥҥэ  Сунтаар улууһун Аҕа баһылыга Анатолий Григорьев биһиги улуус былыр-былыргаттан тарбахтарыгар талааннаах, илиилэригэр сатабыллаах, мындыр толкуйдаах уран уустарынан, иистэнньэҥнэринэн аатырарын бэлиэтээн туран «СӨ норуотун маастара” бэлиэлэри биһиги улуус киэн туттар көмүс ууһугар Тамара Афанасьеваҕа, уус-уран оҥоһуктарга маастар Саргылана Прокопьеваҕа, төрүт иис үгэһин сөргүтэ, айа-тута сылдьар “Сарыал” түмсүү кыттыылааҕар Ньургустаана Ивановаҕа уонна “Сунтаар ситимэ” төрүт ииһи сөргүтэр түмсүү кыттыылааҕар Елизавета Федороваҕа туттарда.

Улуус култууратын уонна айылгытын саламтатын салайааччыта Мария Кобельянова “Сунтаар улууһун уус-уран оҥоһуктарга маастар” удастабырыанньалары “Кылаан” тимир уустарын түмсүүтүн кыттыылаахтарыгар, быһах, хомус ууһугар Дмитрий Николаевка, хомус ууһугар Егор Тартаковка уонна саха быһаҕын ууһугар Михаил Никитиҥҥа туттарда.