Саха Сирин Ил Дарханын Айсен Николаев Ыйааҕынан Ыам ыйын 25 күнүгэр Оһуохай күнүн быйылгыттан ыла бэлиэтиир буоллубут.
Ити күн баар буоларын туһугар Өрөспүүбүлүкэтээҕи «Оһуохай» түмсүү улахан дьаныардаах үлэни көрүстэ.
Бу күнү көрсө түмсүү салайааччытын Александр Джурович Даниловы — Дьулуур Хааны кытта кэпсэттибит:
— Оһуохай күнэ быйылгыттан бэлиэтэнэрэ мин оруннаах дии саныыбын. Дойду президенэ Владимир Владимирович Путин бу сылы Дьиэ кэргэҥҥэ анаабыта, Ил Дархаммыт Айсен Николаев Оҕо сылынан биллэрбитэ. Оһуохай саха ыалыгар биллэн турар улахан сабыдыаллаах. Биһиги Түмсүүбүт ыҥырыытынан буолар: «Үс мөлүйүөн саха үөскээтин, түөрт мөлүйүөн саха төрөөтүн! Доом!»
Сахалар итэҕэллээх, бэйэбит тыллаах буоллахпытына омук быһыытынан сайдыахпыт, ахсаан да өттүнэн эбиллиэхпит!
Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Сергей Васильевич Местников салайааччылаах хамыыһыйа тэрилиннэ. Араас тэрээһиннэрдээх 5 сылга улахан былаан оҥоһулунна, барыта олоххо киирэрин ситиһэргэ үлэ ыытарга бэлэммит.
Хас биирдии улууска, нэһилиэккэ Оһуохай тылын этээччи баар буолуохтаах. Түмсүү кыттыылаахтара кинилэри угуйууга, үөрэтиигэ үлэни ыытарга бэлэммит.
Оһуохай түмсүү 1987 сыллаахха СГУ профессора, улахан чинчийээччи Николай Егорович Петров тэрийбитэ.
Онтон мин түмсүү салайааччытын быһыытынан 13-с сылбар бардым, үс төгүл талылынным.
Бу сыллар тухары улахан суолталаах ситиһиилэрбитинэн «Оһуохай» түмсүүнү өрөспүүбүлүкэтээҕи таһымнаах айар сойуус быһыытынан регистрацияны аастыбыт, 2012 сыллаахха саамай элбэх киһилээх Оһуохай толорон Гиннесс рекордын олохтообуппут.
Дьокуускай пааркатыгар Оһуохайдьыттар сквердара баар буолла, сайын онно Оһуохай тыла ньиргийэн олорор.
Билиҥҥи туругунан Саха сиригэр 4 Аар Дархан этээччи, 17 Дархан этээччилэр дьаныардаахтык айа — тута сылдьар.
2002 сыллаахха Дьокуускай куорат дьаһалтатын баһылыга Илья Михальчук «Арчы дьиэтин» туттарбыта уонна биһиги түмсүүбүтүгэр анаабыта. Бэйэбит дьаһанарбытын кыаныа суохпут диэн оччотооҕу Түмсүү салайааччылара аккаастанан кэбиспиттэрэ. Онтон бэттэх билигин онно дьукаах курдук сылдьабын. Үтүө сонун курдук кэпсээтэххэ биһигини Арктическай кииҥҥэ киллэрэн, онно үлэлиэхтээхпит.
Онтон Оһуохай күнэ олохтоммутугар Ил Дархаммытыгар Айсен Николаевка улахан махталбытын биллэрэбит. Саха Оһуохайа иккис тыыннанна диэн этиэххэ наада.
Сахаҕа — тыл, сахаҕа — сир, сахаҕа — итэҕэл, Ытык Оһуохайбыт баар буоллаҕына сайдыы суола арыллыа!