Оҕо төрөөбүт тылынан саҥарарын сайыннарыы сүрүн хайысхалара

ХХI өрөспүүбүлүкэтээҕи «Сельская школа&Образовательная марка» педагогтар дьаарбаҥкаларыгар педагогическай наука кандидата, «С.Н.Донской-II аатынан үөрэҕи сайыннарар уонна идэ таһымын үрдэтэр институт» дириэктэри солбуйааччыта Ольга Михалёва ыыппыт кууруһун кыттыылаахтара  санааларын үллэһиннилэр уонна махталларын тириэртилэр:

Светлана Никифорова, Үөһээ Бүлүү улууһун Дүллүкү уһуйаанын иитээччитэ: «Оскуола иннинээҕи саастаах оҕолору иитэр-үөрэтэр тэрилтэлэр уонна оскуола учууталларыгар аналлаах  педагогическай үлэһиттэргэ XXI төгүлүн ыытыллар өрөспүүбүлүкэтээҕи педагогическай дьаарбаҥка буолла.  Бу манна олус туһалаах:«Федеральнай үөрэхтээһин бырагырааматыгар оҕо тылын сайыннарыы сүрүн хайысхаларынан үлэни таҥыы уратылара» диэн педагогическай наука кандидата Ольга Михалева салайааччылаах куурус буолан ааста. Барыта холбоон 89 киһи кыттыыны ыллыбыт. Кууруска сылдьаммын, үөрэх чахчы кэмигэр, дириҥ ис хоһоонноохтук, киһи өйдүүр гына ыытыллынна диэн сэҥээрдим. Саҥа саҕалаан эрэр эдэр педагогтарга олус туһалаах диэммин астына үөрэнним уонна билбэппин биллим диирим сыыһа буолбатаҕа буолуо. Билиҥҥи кэмҥэ оҕону сахалыы сөпкө саҥарарыгар, тыла сайдарыгар элбэх уустугу көрсөбүт. Бу куурус кэнниттэн ол уустуктары табыгастаахтык сөпкө туттан, элбэҕи, саҥаны киллэрэн быһаарыахпыт диэн эрэллээхпин. Кэпсэтэр тыл сүдү күүһүн, кини билиигэ, дьону кытта алтыһыыга күлүүс буоларын чахчы итэҕэйдибит уонна биир санаа, бииргэ буолуу, сүбэлэһии, сомоҕолоһуу – бу биһиги кыахпыт, ньымабыт буоларын бигэргэттибит. Саҥа технологияларга, бодоруһан үлэлииргэ үөрэннибит, сорудах толорон билбэппитинэн биир санаалаах бөлөх буолбуппутуттан сөхтүбүт. Сатабыллаах ньыма, салайыы, сөптөөх сорудах киһини түмэрин эппитинэн-хааммытынан биллибит.   

Ону таһынан кууруска иитээччилэр эрэ буолбакка, алын сүһүөх, саха тылын уонна литэрэтиирэтин учууталлара биир кэлим үлэлээтибит, үөрэннибит, бэйэ-бэйэбитин билистибит”.

Матрёна Андреева, Үөһээ Бүлүүтээҕи И. Н. Барахов аатынан оскуола саха тылын учуутала:

 «Түһүлгэни ыыппыт Ольга Иннокентьевнаҕа махтанабыт, биһиэхэ наһаа туһалаах куурус буолла. Сүрүннүүр чааһа практическай үлэнэн ыытылыбытын кэрэхсээтим. Кыттааччылары бөлөхтөргө араартаан оонньуу быһыытынан ыытыллыбыта олус интириэһиргэттэ. Педагогтар сахалыы иитии-үөрэтии  араас хайысхаларыгар методическай көмө ылан билиилэрин кэҥэттилэр. Инникигэ оҕону иитэр-үөрэтэр үлэбитигэр тирэбил оҥосторго элбэх саҥа ньыманы туһанарга уопут ыллыбыт. Ольга Иннокентьевнаҕа кэлэн биһигини кытта ирэ-хоро кэпсэтэн, тиийимтиэ гынан үөрэппитигэр муҥура суох махталбын тириэрдэбин. «Инникитин элбэх күннээх үөрэххэ үөрэнэргит буоллар өссө элбэҕи билэн-истэн барыаххыт» диэн үөрэ-көтө эттэ. Элбэх билиини ылан, үөрэммит ньымаларбытын туһанан, кэлэр кэнчээри ыччаппытын сахалыы саҥарарга, тылларын саҥа хайысхаларынан сайдалларыгар көмө-тирэх оҥостуохпут диэн бигэ эрэнэбин”.

Анастасия Федорова, Үөһээ Бүлүүтээҕи «Кэнчээри” оҕо тэрилтэтин  сүрүннүүр иитээччитэ: «О. И. Михалева куурсугар сылдьан олус туһалаахтык ярмарканы атаардым. Теориятын кылгастык кэпсээн, көрдөрөн баран элбэх бириэмэ практикаҕа анаата. Бу маннык буолбута иитээччи  матырыйаалы ылынарыгар олус  үчүгэй, өйгүнэн,  эккинэн-хааҥҥынан толкуйдаан таһааран  субу билигин араас үлэ түмүгүн таһааран, астынан, куурска кыттар наһаа туһалаах эбит дии санаатым”.

Инновация в образовании: сопровождение ИОМ педагогов