Аҕыйах хонуктааҕыта «Алыптаах хомус» диэн саха төрүт мусукаалынай инструменыгар үөрэтэр матырыйааллаах остуоруйа «Айар» кинигэ кыhатыгар тахсыбыта. Кинигэ ааптардарынан виртуоз-хомусчут, Аан дойдутааҕы күрэхтэр лауреата Василена Шарина уонна кини ийэтэ Марфа Шарина буолаллар, эрэдээктэрэ — Ольга Фролова-Янцен.
Онтон ыам ыйын 7 күнүгэр Оҕо дыбарыаhыгар бу остуоруйанан С.А. Зверев-Кыыл Уола аатынан СӨ үҥкүүтүн тыйаатыра либретта туруоран оҕо-аймаҕы сэҥээртэ, үөртэ. Либретта режиссера — СӨ култууратын туйгуна Розалия Тартакынова.
Бу остуоруйаҕа хорсун санаалаах нарын кыыс Кустукчаана саха дьонун, сирин-дойдутун быыһыыр санааттан ыраах мүччүргэннээх айаҥҥа турунарын туһунан кэпсэнэр…Кини туох дьиктини көрсөрүн, хайдах тургутуулары ааһарын уонна үтүө санаатын күүһүнэн тугу ситиһэрин кырачаан ааҕааччылар бу остуоруйаттан билиэхтэрэ. Остуоруйа төрөөбүт дойдуга, тылга тапталы иҥэрэр, сиэргэ-майгыга үөрэтэр дириҥ ис хоһоонноох.
Либреттаҕа Кустукчаана оруолун ааптар Василена Шарина толордо, кэпсээнньит — Россия уонна СӨ үтүөлээх артыыһа, СӨ норуодунай артыыһа Дмитрий Артемьев, уонна да атын биллиилээх артыыстар оонньоотулар. Ону таһынан «Бриллианты Якутии» үҥкүү ансаамбылын оҕолоро остуоруйаны олус киэргэттилэр. «Дьол» ансаамбыл тыыннаах муусуканан доҕуһуоллаата.
Либреттаҕа оҕолор уонна төрөппүттэр остуоруйаны илэ харахтарынан көрөн, тыыннаах муусуканы уонна хомус тыаһын истэн, алыптаах эйгэҕэ дуоһуйа сынньаннылар.
«Алыптаах хомус» кинигэни «Айар» маҕаһыыннарыттан эбэтэр AYAR.RU саайтан атыылаhыаххытын сөп.