Ньурбаҕа вакансия дьаарбаҥката ыытылынна

Сергей Васильев аатынан култуура сынньалаҥ пааркатыгар улуустааҕы дьарыктаах буолуу киинэ уонна Ньурба куорат дьаһалтата тэрийиилэринэн 14-18 сокуоннай саастарын туола илик гражданнарга анаан «Даешь работу подростку» вакансия дьаарбаҥкатын тэрийэн ыытта.
Дьаарбаҥкаҕа улуустааҕы үөрэҕирии салалтатыттан, Ньурбатааҕы колледжтан, улуустааҕы ыччат бэлиитикэтин отделыттан, «Общепит» ХЭО, «Ландыш» кофейня, ИП Б.Н.Захаров, А.Н. Тихонов уонна куорат уопсастыбаннай пространства сайдыытын дирекцията кыттаннар, үлэ вакансияларын билиһиннэрдилэр.
Уопсайа сокуоннай саастарын туола илик 191 оҕо сайыҥҥы өттүгэр лааҕырдарга сынньанарга уонна сайыҥҥы үлэлэргэ суруттардылар.

Улуустааҕы дьарыктаах буолуу киинин исписэлииһэ Оксана Михайловна Яковлева:
«Бүгүҥҥү вакансия дьаарбаҥкатыгар 9 тэрилтэ кыттыыны ылла. Бу сайын сокуоннай саастарын туола илик 153 гражданнары үлэ миэстэтинэн хааччыйыахтаахпыт. Сылын аайы улуус, куорат дьаһалталара сокуоннай саастарын туола илик оҕолору үлэлэтэргэ үбүлүүллэр. Маны таһынан Дьарыктаах буолуу киинэ эбии 5200 солк. материальнай көмө оҥорор. Үлэ миэстэтинэн хааччыйбыт тэрилтэлэр күнҥэ 4 чаас үлэлэтэр буолуохтара».
Вакансия дьаарбаҥкатын түмүгүнэн «Общепит» ХЭО сокуоннай саастарын туола илик 8 оҕоҕо үлэ миэстэтэ көрүллүөхтээҕин, билиҥҥитэ 16 оҕо испииһэккэ суруттарбыт.

Бааһынай хаһаайыстыбанан дьарыктанар Андрей Николаевич Тихонов: «Сайыҥҥы өттүгэр хортуоппуй үүнүүтүн көрүүгэ-истиигэ, сир үлэтигэр 15 оҕо суруттарбытын, сылын аайы маннык вакансия дьаарбаҥката ыытыллара буоллар, оҕолор сир үлэтигэр сыстыа этилэр», — диэтэ.
Ньурба куорат ыччат бэлиитикэтин уонна спордун исписэлииһэ: — Биһиэхэ уопсайа 62 оҕо суруттарда. Аҥардас, элбэх оҕолоох дьиэ кэргэннэр оҕолорун уопсайа 30 үлэ миэстэтинэн хааччыйыахтаахпыт. Үс сезоҥҥа 10-нуу оҕо. Сүрүн үлэлэрэ куораты ырааһырдыы, сибэккилэри көрүү-харайыы буолуоҕа.

Улуустааҕы үөрэҕирии салалтатын иитии уонна эбии үөрэхтээһин отделын сүрүннүүр исписэлииһэ Жанна Иннокентьевна Ефремова сайыҥҥы сынньалаҥ лааҕырдарга Сочига — 8, Владивостока 11 оскуола оҕолоро суруттарбыттарын иһитиннэрдэ.
Улуустааҕы ыччат бэлиитикэтин сүрүннүүр исписэлииһэ, волонтёрскай куорпус салайааччыта Айсен Пахомов оройуон актыыбынай ыччатын түмэн сынньалаҥнарын тэрийиигэ үлэлэһээри ыччаты түмтэ.