Новгородовтар Москубаҕа дьиэ кэргэн пуорумугар кыттыахтара

Чурапчы Новгородовтара Москубаҕа дьиэ кэргэн пуорумугар кыттыахтара

«Родные-Любимые» пуорум Москвубаҕа тохсунньу 19-23 күннэригэр «Россия» быыстапка-пуорум уораҕайыгар ыытыллыаҕа. Тэрээһиҥҥэ Арассыыйаҕа Дьиэ кэргэн сыла саҕаламмытын биллэриэхтэрэ.

Манна Саха сириттэн Чурапчы улууһугар олорор 7 оҕолоох Валентина уонна Айаал Новгородовтар дьиэ кэргэнинэн кыттыахтара. Кинилэр үс күн устата атын регионтан кэлбит дьиэ кэргэннэри кытта бэйэлэрин ситиһиилэрин, дьоҕурдарын көрдөрүөхтэрэ.

Новгородовтар оҕолорун иитиитигэр ураты болҕомтону уурар, нэһилиэк, улуус уонна өрөспүүбүлүкэ тэрээһиннэригэр көхтөөхтүк кыттар дьиэ кэргэн быһыытынан биллэллэр, холобурга сылдьаллар. Маны сэргэ, Аял Прокопьевич уонна Валентина Ревовна сүүрбэ сыл устата А.В. Посельская аатынан Дириҥнээҕи ускуустуба оскуолатыгар үүнэр көлүөнэни эстетическэй иитиигэ үлэлииллэр.  

Бэрэсидьиэн Владимир Путин Новгородовтар дьиэ кэргэни «Төрөппүт албан аата» уордьанынан, итиэннэ  «Ийэ албан аата» уонна «СӨ Дьиэ кэргэн бэлиитикэтин сайдыытыгар кылаатын иһин» бэлиэлэринэн наҕараадалаабыта.