Матвей Евсеев үйэлээх бэлэҕэ

«Матвей ЕВСЕЕВ Сунтаарга култуура дыбарыаһын туттарбыт үһү» диэн сурах иһиллэр, ватсап нөҥүө хаартыскалар тарҕаналлар. Үтүө сонуну сиһилии сырдатыыны ким баҕарар кэтэһэр буолуохтаах диэн бу суруйууну таһаарабын.

Наталья МИХАЛЁВА — САЙА

ТУТУУ ТУҺУНАН

Аата: «С.А. ЗВЕРЕВ-КЫЫЛ УОЛУН аатынан Норуот Айымньытын Киинэ»

Таас уораҕай бэйэтин иэнэ 2 860,7 кв.м.

Тутуу барытын иэнэ 16 810,5 куб.м.

Үс этээстээх, этээстэрин үрдүгэ 3,6-4,5 м.

Уораҕай иннин сырдыга витраж тиһигиттэн таҥыллыбыт.

Моҕол ураһа быһыылаах сүрүн түһүлгэтэ 16 м. үрдүктээх, 23 м. диаметрдаах. Чыпчаалыгар 3 м. үрдүктээх киэргэллээх.

Көрөөччү саалата 350 киһиэхэ анаммыт, 290 кв.м. иэннээх. Балконнарыгар эбии олбохтордоох.

Эстрадата 129 кв.м. иэннээх.

Уораҕай иһигэр ону таһынан реквизиттэри угар ыскылаат, быыстапка тэрийэр саала, буфет, библиотека, көстүмүөрдэр үлэлиир, куруһуок ыытар хостор, дьаһалта үлэлиир кэбиниэттэрэ бааллар.

Хамсаналларыгар харгыстаах көрөөччүлэргэ иккис этээскэ тахсар лифт көрүллүбүт.

Толору хааччыллыылаах ыраастанар хостор, душ үлэлииллэр.

Бырайыак быһыытынан буруону бохсор, салгылатар тиһиктэр, ууну хачайдыыр носуостаах улахан резервуардар турбуттар.

2014 с. 4-с кварталын сыанатынан тутуу сметата 255,3 мөл. солк. (НДС киллэрэн туран) тэҥнэһэрэ. 2020 с. дьиҥнээхтик туттуллубут үп 328,5 мөл. солк. тиийдэ.

Бүгүҥҥү туругунан тутуу бары коммуникацияларга холбонон турар уонна үлэҕэ киирэргэ ирдэнэр бары көҥүллэри ылла. 

САҔАЛАНЫЫ

2013 с. Ил Түмэҥҥэ дьокутааттары талыы быыбара буолбута. Александр АКИМОВ төрөөбүт улууһуттан аан бастаан норуот былааһыгар талыллар хампаанньата саҕаламмыта. Мин улууһум олоҕугар сыһыаннаан хас да баҕа санаа курдук толкуйдардаах этим. Ол толкуйдар суруйааччы, суруналыыс холугар көннөрү ыра санаа эрэ курдук ыйанан сылдьыбыттара, арай кыахтаах, былаастаах киһи иилээтэҕинэ-саҕалаатаҕына эрэ олоххо киириэхтэрин сөбө. Тоҕо эрэ ол кэмҥэ биир да Сунтаар улууһуттан төрүттээх миниистир, биллэр-көстөр салайар үлэһит суоҕа (арай 2014 с. Матвей ЕВСЕЕВ Ил Дархан быыбарыгар турунуох курдук буолбутугар суһаллык хас да миниистир, Бырабыыталыстыба Бэрэссэдээтэлин солбуйааччы кытта баар буолан хаалбыттара). 

Онон, ити 2013 с. быыбарга Александр АКИМОВ хандьыдаатынан турбутугар үөрбүтүм уонна үлэлэһэргэ ыҥырбытыгар сөбүлэспитим. Хандьыдаат бырагыраамата биир дойдулаахтарыгар Сурук киэбинэн чочуллубута, онно улуус киинигэр Кыыл Уолун аатын сүгэр ураты архитектуралаах баараҕай таас тутууну эрэннэрэр этии киирбитэ.

Бэйэм култуура үлэһитэ буолан идэбинэн уон сыл улуус киинигэр үлэлээбитим. Сунтаар улууһун култуураҕа салаата ити кэмҥэ дьиэ-уот өттүнэн хааччыллыыта куһаҕана суох, үгүстэртэн өссө ордук да этэ. Аҥардас улуус киинигэр иккилии этээстээх үс култуура дьиэтэ баара: олортон иккитэ таас тутуу этилэр. Олох уларыйыытыгар кырдьаҕас култуура дьиэтэ — мас РДК бастаан «Оһуохай Дьиэтэ» буола сылдьыбыта, онтон тымныыта кыайтарбакка дуу, сабыллыбыта, устунан суох буолбута. РТС эҥэргэ үлэлээбит таас кулууп оскуола умайан, оскуола дьиэтигэр кубулуйбута. «Партизан» култууратын эрэ дьиэтэ хаалан, билиҥҥэ диэри Сунтаар улууһун айар кутун-сүрүн киинэ буолан үлэлии турар.

2001 с. Дьокуускайга көһөн баран, сайдыы бу эҥэргэ балысханнык киирэрин кэрэхсии көрбүтүм. Ол курдук улуустарга толору хааччылыылаах баараҕай тутуулар: таас оскуолалар, култуура дыбарыастара, музейдар бииртэн биир тутуллан барбыттара. Сунтаарга ити кэмҥэ тутуу эмиэ барара эрээри, култуура өттүгэр 2006 с. АКИМОВ өҥөтүнэн тутуллубут Олоҥхо дьиэтин аахсыбатахха, хамсааһын үөтэтэ суоҕа. Уруккута сэнэх дьиэлэрбит дьыл-күн ааһарынан эргэрэн, аныгы киһини «ыҥыра-угуйа» турар туруктарыттан тахсан барбыттара. Ону сэргэ дьон-сэргэ түмсүүгэ тардыһыыта эмиэ сөҕүрүйэр, кутун-сүрүн туруга мөлтүүр курдук дуу диэн сэрэнии уонна сэрэйии миэхэ үөскээбитэ. Дьэ ол санааларбын Александр АКИМОВКА этэн итэҕэппитим быыбар иннинээҕи этиитигэр былаан буолан киирбитэ.

Александр АКИМОВ тылын биэрдэ да толорор салайааччы буоларын өрөспүүбүлүкэ олохтооҕо барыта билэр. Бастаан Бырабыыталыстыбаны кытта күүскэ үлэлэспитэ. 2014 с. Ил Дархан быыбарын иннинэ Егор БОРИСОВТАН сөбүлэҥин ылан, Сунтаарга сырыытыгар оһуордаах остуолбаны дыбарыас тутуллуохтаах сиригэр анньар алгыстаах сиэр-туом толоруллубута, онтон дьон-сэргэ барахсан санаата көтөҕүллэн, уруй-айхал туругар киирбитэ. Ол эрэн быыбар ааспытын кэннэ бу тутуубут туһунан былаас кэбиниэттэригэр ким да истиэн баҕарбат буолан хаалбыта. Мин сенатор көмөлөһөөччүтэ буолан, итини барытын иһиттэн көрө-билэ сылдьыбытым.

Александр АКИМОВ биирдэ: «Туох да сатанымаары гынна. Арай Матвей ЕВСЕЕВ кыаныа этэ. Олоҥхо хайдах шедевр буолбутун билэҕин дуо?» — диэн миигиттэн ыйытар. «Хайдах билиэм суоҕай, үлэ бөҕө барбыта дии», — диибин. «Үлэ — үлэтинэн. Оннук таах хаалан хаалар үлэ элбэх. Улахан бырыайыактары олоххо киллэрии улахан үбү-харчыны ирдиир. Мин ол саҕана вице-президеннии олорон, олоҥхо аан дойду билиниитигэр тахсыытын хааччыйар үбү-харчыны булаары бюджеттэн кыыбаҕалаһа сатаан бараммын, харчылаахтары барыларын кытта кэпсэтэн көрбүтүм. Бары сэргиир этилэр, ол эрээри ким да көмөлөспөтөҕө. Арай Матвей ЕВСЕЕВКЭ тахсыбыппар «саха буолан баран олоҥхоҕо биэрбэтэхпитинэ сатаммат буоллаҕа дии» диэбитэ. Кини олоҥхо ситиһиитин түстээбит үлэни-хамнаһы, айаны-сырыыны барытын толору уйуммута, айар дьон тугу толкуйдаабыта барыта харгыһа суох олоххо киирэр кыахтаммыта — онон кини баар буолан олоҥхо кыайбыта диэхпитин сөп.  Мас тардыһыыта аан дойдуга тахсыытын эмиэ кини хааччыйбыта».

Мин Матвей ЕВСЕЕВИ кытта бииргэ улааппыт киһи буолабын эрээри, итини олох да билбэт этим. Өксөкүлээх Өлөксөй үлэлэрэ сөргүтүллэригэр Людмила Кулаковская киниэхэ махтанарын истибитим уонна Тааттаҕа Алампа боруонса пааматынньыгын кини үбүлээбитин эмиэ дьонтон истэн билэрим. Ол эрээри судаарыстыба кыайан туппат дыбарыаһын соҕотох киһи хайдах үбүлүөн сөбүн төбөм син-биир кыайан батарбатаҕа.

Ол да буоллар, Александр Константиновичтыын киниэхэ приемҥа суруттаран көрсүһэ бардыбыт. Сенатор ыраахтан саҕалаан кэпсэтиини ыытта. Матвей Николаевич чэйдээх чааскытын одуулаан умса туттан олорор. Сөбүлэһимээри гынна диэн АКИМОВ ыксаата: «Хайа уонна эн ийэҥ Зверев ансаамбылын кыттыылааҕа, саамай таптыыр тойуксута буола сылдьыбыта дии…» — диэтэ. Матвей Николаевич өрө көрө түһээт: «Тохтоорууй, доҕор, суоттуу олоробун ээ», — диэн күллэ.

Кыыл Уолун аатын сүгэр баараҕай тутуу саҕаланыыта ити курдук этэ.

МАТВЕЙ ЕВСЕЕВ ИЙЭТЭ

1957 с. Сунтаар улууһун салайааччылара өрөспүүбүлүкэтээҕи фестивалга улуус ыччата кытта барарыгар ураты болҕомтону уурбуттар. Ыаллаах сиртэн ыраах, үрэх баһыгар олорор Кыыл Уолугар бэйэлэринэн тиийэн кэпсэтэн, ансаамбыл тэрийэн оҕолору бэлэмнииригэр сөбүлэҥин ылбыттар. «Оҕонньор» тарбаҕынан ыйбыт ханнык баҕарар үлэһитин холкуостар босхолуу охсоллоругар дьаһал таһаарбыттар. Кыыл Уола инньэ гынан улууһу кэрийэн талааннаах ыччаты хомуйбут. Түбэйгэ икки ыйдаах эмиийдээх оҕотун көтөҕөн олорор Зинаида ТОКУЕВА-ЕВСЕЕВАҔА хаста да бэйэтинэн сылдьыбыт. Зинаида намыын эрээри ис-иһиттэн күүһүрэн тахсар ураты куоластаах этэ. Кылыһаҕа «кэрэ» диэн быһаарыыга сөп түбэһэрэ буолуо, намылхай куолаһыгар дьүөрэлэһэн тахсар лыҥкынас этэ. Кыыл Уола дьэ киниэхэ Туйаарыма Куо ырыатын ыллатаары оннук соругуран туран тылын ылыннарбыт. Сунтаар ыччата салгыы Москубаҕа ыччаттар Аан дойдутааҕы фестивалларыгар барар буолбута. Онно Зинаида Александровна ырыаһыт быһыытынан Анастасия Лыткинаны, Надежда Шепелеваны кытта биир хоско түһэ сылдьыбыт этэ. Салгыы тыйаатырга хаал диэн этии киирбитин элбэх оҕону, ол иһигэр Матвейын төрөтөр ыйааҕа тардан, Түбэйигэр тиэтэйбит.

ДЫБАРЫАС БИЭС СЫЛЫНАН ҮЛЭҔЭ КИИРИЭҔЭ!

Александр АКИМОВ иилээн-саҕалаан 2013 с. саха бастакы интеллигеннэриттэн биирдэстэрэ, улууспут өрөбөлүүссүйэ иннинээҕи бүтэһик кулубата М.Н. ТИМОФЕЕВ-ТЕРЕШКИН төрөөбүтэ 130 сылын үрдүк таһымҥа бэлиэтээбиппит. Ханна да бэчээттэммэтэх билим-чинчийэр үлэлэрэ, уус-уран айымньылара уонна ахтыы сэһэнэ хомуллубут дьоһуннаах кинигэтин эмиэ Матвей ЕВСЕЕВ үбүлээн күн сирин көрдөрбүппүт.

2015 с. Кыыл Уола төрөөбүтэ 115 сылын бэлиэтиир улуус ыһыаҕар Матвей ЕВСЕЕВ ыҥырыылаах ыалдьыт буолан тиийэн, Кыыл Уолун аатын сүгэр Култуура дыбарыаһын бырайыага түһэриллибит улахан баннерын түһүлгэҕэ таһааран көрдөрбүтэ уонна дыбарыас биэс сылынан — 2020 с. үлэҕэ киириэ диэбитэ! Дьон барахсан эмиэ уруйу-айхалы кытта бу түгэни ытыс тыаһынан доҕуһуоллаабыта. Ол эрэн оһуордаах баҕана остуоруйата өссө да умнулла илик буолан, итэҕэйбэтэх да дьон баара.

БИЭС СЫЛ ААСПЫТЫН КЭННЭ

2020 сыл олоххо-дьаһахха, үлэҕэ-хамнаска, үөрүүгэ-көтүүгэ маннык моһоллоох буолуо диэн ким биттэммитэ баарай? Ол да үрдүнэн сырдык уораҕай иһигэр үлэ саҕаланна, үөрүүлээх аһыллыыта бу күһүн торумнанар.

Мин тутууну быһаччы ыыппыт уонна салайан үлэлэтиэхтээх дьону кытта кэпсэттим.

Матвей ЕВСЕЕВ, «АРКТИК-КАПИТАЛ» ХЭУО генеральнай дириэктэрэ:

Сахалар аҕыйах ахсааннаах да буолларбыт, улуу дьоммут элбэхтэринэн мин киэн туттабын. Хас биирдиилэрин үйэтитэн, кинилэр туох туһугар олорбуттарын кэлэр сүһүөх ыччакка тиэрдэр ытык иэстээхпит. Кыыл Уолун аатыгар биллэн турар, өбүгэбит үгэстэрин тилиннэрэр, илдьэ сылдьар, сайыннарар киин буолар Дыбарыаһы тутуу саамай сөптөөх. Бастаан «Якутпроекка» анаан-минээн 6 мөл. солк. суумалаах бырайыагы оҥотторбутум. Онтон салгыы улуус дьаһалтатын кытта ыкса сүбэнэн тутууну бүтэрдибит. Мин тус бэйэм 178,5 мөл. солк. уктум, улуус — 150 мөл. солк.

Анатолий ГРИГОРЬЕВ, «Сунтаар улууһа» МТ баһылыга:  Дьоллоох киһибин, баһылыкпын диэн санаалаах сылдьабын. Матвей ЕВСЕЕВ курдук саха норуотун чулуу уолун кытта бииргэ үлэлэһэ сылдьарбыттан, кини Кыыл Уолун олоҕун суолтатын дьиҥнээхтик өйдөөн бу тутууну киэҥник-куоҥнук туттарбытыттан. Арассыыйа да, аан дойду да үрдүнэн маннык холобур баар буоллаҕына, биир эмит эрэ баара буолуо. Онон сөҕөн, үөрэн-долгуйан туран кыахтаах дьоммут кини холобурун батыһаллара буоллар диэн баҕа санаалаахпын. Норуот айымньытын Киинэ инникитин саха омук кута-сүрэ бөҕөргүү, өбүгэ айымньытыттан иитиллэ турарыгар суолталаах түһүлгэ буолуо диэн эрэнэбин.

Федор ПОПОВ, тутуу толорооччу дириэктэрэ:

Дьокуускайга LG дьиэтин, «Чолбон» бассейны, Богородицкай таҥара дьиэтин, «Манчаары» оонньуулара барбыт хас да улуустарыгар стадионнары салайан туттарбыта.

КИЭН ТУТТАР ТУТУУМ

Маннык бырайыагынан тутуллубут дьиэ атын ханнык да сиргэ уонна суох. Иннин сырдыгар таҥыллыбыт витраж таас Дьокуускайга аҕыйах эрэ дьиэҕэ туттуллубута. Тутуу матырыйаалын барытын сыанатын кэрэйбэккэ ордук хаачыстыбалааҕын талан тутуннубут. Бырайыактан биир эрэ сиргэ туоруу сырыттыбыт — ураһа сабыытын арыый атын, балык хатырыгын санатар матырыйаалынан бүрүйдүбүт.

2019 с. ахсынньы 5 күнүгэр Госстройнадзор Управлениета бары ирдэбиллэр тутуһуллубуттарынан, Култуура киинин үлэҕэ киллэрэри көҥүллээн илии баттаабыта. Уота-күөһэ «Арҕааҥҥы энергетическэй ситимҥэ» холбонно. Толору хааччыллыы киирдэ. Дьиэ олус сылаас, уута-хаара харгыһа суох үлэлиир. Кыс устата ханан да саахал тахсыбата, дьиэ тымныы кыһын тургутуутун этэҥҥэ ааста.    

 Ис барааныгар «Уран» устуудьуйа дуогабар быһыытынан үлэлэстэ. Онон саха киһитин кутугар-сүрүгэр сырдыгынан сыдьаайар эйгэ оҥоһуллан тахсыбытын көрөн харах үөрэр. Урукку өттүгэр судаарыстыба үбүлүүр тутууларын салайбытым, бу тутууга Матвей ЕВСЕЕВЫ уонна улуус баһылыга Анатолий ГРИГОРЬЕВЫ кытта ис сүрэхпититтэн өйдөһөн үлэлээтибит. Матвей Николаевич төһө да сабыс-саҥа тэрилтэни атаҕар туруорар уустук кэмэ буоллар, эрэннэрбит тылын толорор туһугар кыаллыбаты да кыайарга кыһалынна. Үбүлээһиҥҥэ кыра бытаарыы таҕыстаҕына да, тутааччылар үтүө санаа дьулуурунан ыытыллар үлэҕэ эмиэ үтүө санаабытынан кыттыһан, тохтоон-бытааран турбатыбыт. Прорабынан Элгээйи уола Андрей ВАРЛАМОВ үлэлээтэ.

Киһи дьоло диэн — үлэтин түмүгүттэн дуоһуйуу буоллаҕа. Мин киэн туттар биир тутуум Сунтаарга турар диэн олоҕум тухары астыныам.    

Алексей СЕДАЛИЩЕВ, Кыыл Уолун аатынан Норуот Айымньытын Киинин дириэктэрэ:

Дьокуускайдааҕы култуура коллеһын, Улан-Удэтээҕи култуура уонна искусство Академиятын, РАГС үөрэнэн бүтэрбит. Дьокуускай куорат култуураҕа салалтатыгар, 11 сыл Сунтаар улууһун Дьаархан нэһилиэгин баһылыгынан үлэлээбит.

ҮӨРҮҮЛЭЭХ АҺЫЛЛЫЫНЫ БЭЛЭМНИИБИТ

 Дириэктэринэн бу олунньуттан ананан үлэлии сылдьабын. Штаппытыгар барыта 27 үлэһит баар. Бары да санаабыт кынаттанан, бар дьоҥҥо айымньылаах үлэбитин таһаара охсоору, хааччахтааһын хаһан бүтэрин күүскэ кэтэһэбит. Пандемия буолан көрөөччү саалатыгар кириэһилэлэрбит кэлэллэрэ хойутаата. Таһыгар өссө мас олордуохтаахпыт, ыскаамыйалары туруоруохтаахпыт. Москубаттан үчүгэй уот-күөс, светодиоднай экран, тыас-уус аппаратурата кэлиэхтээх. Эрэллээх фирманы кытта дуогабарынан үлэлэһэ сылдьабыт. Ураһалыы быһыылаах дьиэҕэ дорҕоон ой дуорааннанан аанньа иһиллибэт буолара баар суол. Ол иһин акустикатыгар сүрүн болҕомтобутун уурдубут. Баҕа хоту оҥотторор буоллахпытына эбии олус улахан сыыппара — 5 мөл. солк. тахсан кэлэн, салла сылдьыбыппыт. Ону Матвей ЕВСЕЕВ бу харчыны эбии төлөһөн, дыбарыаспыт мааны тыастаах-уустаах буолуо диэн мэктиэлиир кыахтанныбыт. Сцена таҥаһын тыйаатыр худуоһунньуга Екатерина Шапошникова дизайнынан Дьокуускайга тиктэрэ сылдьабыт. Этэҥҥэ буоллаҕына, кэрэ уораҕайбыт аанын балаҕан ыйыгар бар дьоҥҥо үөрүүлээхтик тэлэччи аһыахпыт.

 Мария КОБЕЛЬЯНОВА — ТУСКУЛААНА, Сунтаар улууһун култуураҕа салалтатын начаалынньыга

«ДЫБАРЫАСТАННЫБЫТ» ДИЭН ДЬОЛЛОННУБУТ!

Култуура киинигэр киирбит киһини Олоҥхо дойдутун дьаралыга — Аар Баҕах Сэргэ, ытык Аар Кудук Чэрчи мас аттыгар Кыыл Уолун тыыннаах дьүһүнэ алгыы көрсүө. Улахан саалаҕа «Ыһыах» тиэмэтинэн (Тамара Афанасьева оҥорбут үрүҥ көмүс симэҕэр олоҕуран) улахан дьэрэкээн лүүстүрэ туруохтаах. Эстрадата, ону кытта көрөөччү саалата барыта сахалыы оһуорунан арыалланар.

Тыйаатыр гардеробтан саҕаланар дииллэринии, биһиги таҥас ыйыыр сирбит «Дьабака» тиэмэлээх, саха төрүт таҥаһын суолтатын иҥэрии. Аны дьону аһатар кафета ааттаах Тойон Ымыйабыт суолтатыгар олоҕуруоҕа. Иккис этээскэ улахан быыстапка саалатыгар араас оҥоһуктар тураннар Сунтаар тыынын көрдөрүөхтэрэ. Бу кииҥҥэ Култуура салалтата, Норуот уус-уран айымньытын киинэ буолбут урукку Олоҥхо дьиэтэ үлэтин саҕалыаҕа. Тэрилтэҕэ өссө Владимир Николаев аатынан норуот тыйаатырын уонна «Түһүлгэ» норуот үҥкүүтүн ансаамбылын кэскиллээх үлэлэрэ саҕыллыаҕа.

Култуура киинин сыала-соруга — саха норуотун уус-уран айымньытын үөрэтии, сайыннарыы, нэһилиэк, улуус, республика араас таһымнаах, хабааннаах тэрээһиннэрин түһүлгэтэ буолуу, дьону-сэргэни култуура уонна духуобунай сайдыы кэрэ эйгэтигэр иитии. Бэйэҕит илэ көрөн ыалдьыттаан аастаххытына олус астыныаххыт, маны олоххо киллэрбит тумус туттар дьоммутугар улаханнык махтаныаххыт дии саныыбын.

«ОҺУОР» БАЛЕТ БУОЛАН ТУРУОҔА

Түмүккэ, саха бар дьонугар өссө биир дьоллоох сонуну арыйан кэпсиэхпин баҕарабын. 2015 с. Сунтаар ыһыаҕар Кыыл Уолун бастакы ансаамбылын кыттыылааҕа, СӨ үөрэҕириитин үтүөлээх үлэһитэ Семен ЗЕДГЕНИДЗЕВ 90 сааһын туолбута бэлиэтэммитэ. Өссө да сүһүөҕүн үрдүгэр үҥкүүлээн бэдьэйэ сылдьар ытык кырдьаҕас тыл этиитин саха национальнай искусствотын «Оһуор» балетынан байытыахха диэн соһуччу уонна кэрэ санаанан түмүктээбитэ. Кырдьык, саха бэйэтин балета биир илии тарбаҕын иһинэн ааҕыллар аҕыйах. Оттон Кыыл Уола айымньыларыгар «опера-балет» диэн тыллары сыһыарара, саха бастакы балета — «Хотугу сибэкки» уонна бастакы операта — «Ньургун Боотур» туралларыгар оччотооҕу музыкальнай тыйаатырга ыҥырыллан кэлэн консультант быһыытынан үлэлээбитэ. Онон кинини бастакы сүһүөх идэлээх үлэһиттэр  “живой родник” диэн, саха искусствота төрүттэниитин уолбат сыккыс буолан тыыннаабыт киһинэн ааҕаллара, ол да быһыытынан Кыыл Уолун мөссүөнэ Опера уонна Балет тыйаатырын иккис этээһигэр баар росписька түһүлгэ киинигэр олорор олоҥхоһут быһыытынан ойууламмыта.

«Оһуор» үҥкүүтэ — саха сценаҕа турар үҥкүүтүн төрүттээбитин ааһан, үөскээбит төрдө-силиһэ түҥ былыргы, өссө дириҥ. Ханнык баҕарар балет норуот номоҕугар, остуоруйаҕа, баар буола сылдьыбыт дьоруойдар олохторугар, уус-уран айымньыга олоҕурар. Оттон «Оһуор» үҥкүүтэ эмиэ ураты номохтон үөскээбит чахчылаах. Кырдьык да, дьиҥнээх сахалыы, бэйэбит хамнаныыларбыт киирэр, омукпут олоҕун көрдөрөр балет туруута — саха искусствотын сайдыытыгар бэлиэ түгэн буолар кыахтаах. Ону өйдөөн, балет туруутун Матвей ЕВСЕЕВ хас эрэ бырыһыанын үбүлэһэргэ ылыммыта. Оччотооҕу култуура миниистирэ Владимир ТИХОНОВ маннык үтүө дьайыыны үөрүүнэн хаба тардан ылан, тыйаатыр иннигэр соругу туруорбута. Матвей ЕВСЕЕВ композитор Кирилл ГЕРАСИМОВКА музыкатын төлөбүрүн хааччыйбыта, онон балетмейстердар, тыйаатыр үлэһиттэрэ саҥа уораҕай үлэҕэ киирэригэр премьераны көрдөрөөрү иэйэ-куойа үлэлээн барбыттара… Ол эрээри… тоҕо эрэ тыйаатыр саҥа салайааччыта саҥа национальнай балет туруутун тохтотон, «Жизелы» туруорарга сорунан сылдьар. Туох санааттан итинник быһыы тахсыбыта өйдөммөт, ол эрээри «Оһуор» балет син-биир туруо, саха искусствота өссө биир кэрдииһи өрө дабайыа, өссө биир үйэлээх айымньынан байыа диэн эрэнэбин.     

Если вы увидели интересное событие, присылайте фото и видео на наш Whatsapp
+7 (999) 174-67-82
Если Вы заметили опечатку в тексте, просто выделите этот фрагмент и нажмите Ctrl+Enter, чтобы сообщить об этом редактору. Спасибо!
Система Orphus
Наверх