«Кылаан чыпчаал»: өрөспүүбүлүкэтээҕи ырыа күөн күрэһэ кыайыылаахтара

«КЫЛААН ЧЫПЧААЛ» өрөспүүбүлүкэтээҕи ырыа күөн күрэһэ б.дь. муус устар 12-14 күннэригэр Нам улууһугар саҥа тутуллубут, ыраас, сырдык, таас уораҕайга М.К.Аммосов аатынан Култуура уонна Духуобунай сайдыы дыбарыаһыгар ыытылынна. Манна өссө киэҥ-куоҥ сценаны, элбэх миэстэлээх сааланы, аныгы аппаратураны, үчүгэй акустиканы, гримеркалары ыалдьыттар бэлиэтээбиттэрин киэн тутта этиэхпин баҕарабын. Аны, Нам улууһа куораттан чугаһа, атын улуустан кэлээччилэргэ табыгастааҕа эмиэ элбэҕи этэр. Саха сирин араас муннуктарыттан 36 кыттааччы кэлбититтэн 9-һа финалга таҕыста. Киһи сөҕүөн эдэр ырыаһыттар бары кэриэтэ талааннаахтар, бииртэн биир ордук курдук. Онон дьүүллүүр сүбэҕэ сыаналыырыгар балайда ыарахаттардаах, мөккүөрдээх да буолла. Кимнээх дьүүллүүр сүбэҕэ олордулар диэтэргит: эстрадабыт бастыҥ ырыаһыттара, Саха Өрөспүүбүлүкэтин үтүөлээх артыыстара -– Сахая, Анастасия Готовцева, шоу-бизнес чаҕылхай бэрэстэбиитэллэрэ «Сахаконцерт» агентство салайааччыта — Василий Кривошапкин, биллэр стилист, режиссер — Дмитрий Васильев уонна бу хамыыһыйа бэрэссэдээтэлинэн ырыаҕа уһуйааччы, Намнааҕы Култуура дыбарыаһын хормейстера – Федот Соловьев үлэлээтилэр. 

Дьэ, бу куонкуруска бирииһэ улахана барыбытын сөхтөрдө! Ол курдук, эһиги иннигитигэр кыайыылаахтар:

Гран При 500 000 солк. — Ким Осипов (Нам улууһа). Маны сэргэ, муҥутуур кыайыылаахха дьиҥнээх үрүҥ көмүстэн кутуллубут улахан статуэтка (биллэр худуоһунньук, дизайнер Вячеслав Яроев үлэтэ) туттарылынна!

1-кы лауреат 200 000 солк. — Линда Захарова (Мэҥэ Хаҥалас улууһа)

2-с лауреат 150 000 солк. — Иннокентий Черемкин (Абый улууһа)

3-с лауреат 100 000 солк. — Эдуард Валасов -– Ыра Чаҕаан (Томпо улууһа)

«Көрөөччү биһирэбилэ» 100 000 солк. — Сахаайа Колодезникова (Нам улууһа)

«Сахаконцерт» агентство 1 сыллаах продюсердыыр үлэтин сертификатынан Александр Карманов (Дьокуускай к.) наҕараадаланна.

1-кы дипломант 10 000 солк. — Анастасия Протопопова (Нам улууһа)

2-с дипломант 10 000 солк. — Иннокентий Лебедев -– Амикан (Дьокуускай к.)

3-с дипломант 10 000 солк. — Карина Петрова (Сунтаар улууһа)

Кыайыылаахтары ис сүрэхтэн эҕэрдэлиибит!

Уонна, түмүккэ бу Намҥа ыытыллыбыт «КЫЛААН ЧЫПЧААЛ» ырыа куонкурса  бу сыллар тухары олоҕуран кэлбит үгэһи уларытта, «култуура хаһан да сыаналаммат» диэн өйдөбүлү (стереотип) алдьатта дуу, эдэр ырыаһыттарга инниктин кыах (стимул) биэрдэ дуу диэн эрэл кыымын сахта.

Эһиилги куонкурска көрсүөххэ диэри!