Үлэ бэтэрээнэ, «Российскай Федерация Норуотун үөрэҕириитин туйгуна», «Учууталлар учууталлара»,»Саха Өрөспүүбүлүкэтин Үөрэҕириитин үтүөлээх үлэһитэ», «Наукаҕа киллэрбит үтүөлэрин иһин» бэлиэлэринэн наҕараадаламмыт Филиппова Нина Игнатьевна ыарахан ыарыыттан 2024 сыл бэс ыйын 28 күнүгэр орто дойду олоҕуттан барбытынан С.Н.Донской- II аатынан Үөрэҕи сайыннарар уонна идэни үрдэтэр үнүстүүт билэр дьонугар, аймахтарыгар, кэллиэгэлэригэр, биир идэлээхтэригэр дириҥ кутурҕаммытын биллэрэбит.
Нина Игнатьевна 1946 сыллаахха алтынньы 27 күнүгэр Верхоянскай куоратыгар төрөөбүтэ. 1964 с. Үөһээ Дьааҥы орто оскуолатын ситиһиилээхтик бүтэрбитэ. Ол кэннэ 1964-1965 үөрэх дьылыгар Сартаҥ 8-с кылаастаах оскуолатыгар 4-с кылаас учууталынан үлэлээбитэ. 1965 с. Саха судаарыстыбаннай университетытгар саха тылын салаатыгар үөрэнэ киирбитэ. 1967 с. университет историятыгар киирбит М.К.Аммосов аатынан бастакы истипиэндийээт буолбута. 1970 с. үөрэҕин кыһыл дьупулуомнаах бүтэрбитэ уонна Новосибирскай университетыгар аспирантураҕа үөрэммитэ. Үөрэҕин 1974 сыллаахха бүтэрээт 1974-1976 сс. Тылгыны 8-с кылаастаах орто оскуолатыгар саха тылын уонна литературатын учууталынан ананан үлэлээбитэ. 1976 сыллаахтан Төрүт омуктар оскуолаларын чинчийэр институт Саха сиринээҕи филиалыгар алын научнай сотруднигынан үлэҕэ киирбитэ. Аҕыс сыл ФБГУ «СӨ Национальнай оскуолалары чинчийэр үнүстүүтэ» таһаарар «Иитии кыһата» сурунаалын редколлегиятыгар таһаарар эрэдээктэринэн үлэлээбитэ. Олоҕун устата саха фольклорун, литературатын үөрэтэр бырагыраамалары, үөрэх кинигэлэрин, учууталга, үөрэнээччигэ көмө босуобуйалары, методическай ыйынньыктары, тылдьыттары, үөрэх электроннай кинигэлэрин оҥорсууга үлэлээбитэ. Ону таһынан олоҥхо тылыгар, олоҥхо педагогикатыгар, этнокультураҕа, медиасредствоны туһаныыга учууталга, үөрэнээччигэ, төрөппүккэ анаммыт үгүс ыстатыйаны суруйбута. Барыта 200-тэн тахса бэчээттэммит үлэлээх.
Саха тылын уонна литературатын учууталларыгар киллэрбит кылаата элбэх. Нина Игнатьевна суруйбут үлэлэрин үөрэтии-иитии эйгэтигэр күүскэ тутта, туһана сылдьаллар. Кини учуутал үлэтин эҥкилэ суох билэр буолан суруйбут үлэлэрэ практическай хайысхалаах, дьарыкка тута туһанан барарга табыгастаахтар, сорудахтара дьэҥкэлэр, холобурдара олус өйдөнүмтүө, онон оҕону үөрэтиигэ тиийимтиэлэр Үнүстүүт ыытар куурустарыгар олоҥхо тиэмэтигэр, саха тылын үөрэтиигэ, чинчийиигэ, методикатыгар учууталларга ордук тоҕоостоох, интэриэһинэй тиэмэлээх лиэксийэлэри кэпсиирэ. Кини киһи быһыытынан ис киирбэх, учууталга ураты болҕомтолоох сыһыаннаах, ол эрээри ирдэбиллээх буолан үөрэтии ис хоһооно үрдүк хаачыстыбалаах буолара.
Саха тыла, олоҥхобут тыла сайдарын туһугар, үөрэтии-иитии наука таһымыгар тахсарыгар сыратын уурбут, улахан кылааты киллэрбит Нина Игнатьевна учууталлар учууталлара, дьоһуннаахай олоҕу олорон, кэлэр көлүөнэ учууталларга эппит, сүбэлээбит тыла-өһө сирдьит буолуоҕа. Нина Игнатьевна үлэлээбит үлэтин үөрэппит оҕолоро, учууталлара салгыыллар. Саҕалаабыт таһымын ыһыктыбакка инники көлүөнэни үөрэтэргэ күүстэрин-кыахтарын ууран туран үлэ үтүө түмүктээх буоларыгар кыһаныахтара.