Курбуhах нэһилиэгэр саҥа врачебнай амбулатория дьиэтэ аһылынна

Саҥа врачебнай амбулатория Уус-Алдан улууhугар «Доруобуйа харыстабыла» национальнай бырайыак көмөтүнэн, Владимир Цыпандин салайааччылаах “Стройкомплект” хааччахтаммыт эппиэтинэстээх тэрилтэ модульнай конструкцияннан тутан олоххо киллэрдэ.

Саҥа эбийиэк 130 кв миэтирэ иэннээх, врачебнай амбулаторияҕа быраас, фельдшер, акушерка, процедурнай, мед.персонал үлэлииригэр сөптөөх усулуобуйа тэриллэн, саҥа мебелинэн, медицинскай тэриллэринэн толору хааччылынна.

Саҥа дьиэни аһыы үөрүүлээх сиэригэр-туомугар улуус дьаһалтатын баһылыга Алексей Федотов, улуустааҕы кииннэммит балыыһа кылаабынай бырааһа Анна Петрова, улуустааҕы кииннэммит балыыһа коллективыттан ыалдьыттар, нэһилиэк олохтоохторо кыттыыны ыллылар.

Алексей Васильевич улууспут биир улахан нэhилиэгэр доруобуйа харыстабылын аныгы ирдэбиллэригэр толору эппиэттиир, хаачыстыбалаах мэдиссиинискэй өҥөнү оҥорорго саҥа тэриллэринэн хааччыллыбыт  врачебнай амбулаторияҕа үлэ хаачыстыбата өссө үрдүө диэн эрэнэрин биллэрдэ. 

Манна даҕатан эттэххэ Курбуhах врачебнай амбулаториятыгар «Комплексное развитие сельcких территорий» Саха республикатын тыатын хаһаайыстыбатын министерствотын программатынан 2022 сыл саҥатыгар саҥа суһал көмө массыыната кэлбитэ.

Улуустааҕы кииннэммит балыыһа кылаабынай бырааһа Анна Петрова саҥа врачебнай амбулатория тутуллан үлэҕэ киириитигэр турар миэстэтин ыраастааһыныттан саҕалаан, онтон да атын элбэх үлэ ыытыллыытыгар туора турбакка күүс-көмө буолан, бэйэлэрин кылааттарын киллэрбиттэригэр нэhилиэк дьаhалтатыгар уонна олохтоохторго улахан махталын тиэртэ.