Куорат пааркатыгар Оһуохай ньиргиэрэр!

       Дьокуускайдааҕы культура уонна сынньалаҥ Пааркатыгар Оһуохай Искибиэрэ тэриллэн үлэлээбитэ быйыл номнуо сэттис сылыгар барда.

        Бу сыллар тухары биһиги түһүлгэбитигэр Аар Дархан, Дархан, үтүөлээх этээччилэр кыттыылаах Оһуохай сайын өттүгэр өрөбүл күн аайы ньиргиэрэн олорор.

        Оһуохай түмсүү аатыттан Дьокуускай куорат олохтоохторун уонна ыалдьыттарын биһиги түһүлгэбитигэр кэлэн, дуоһуйа сынньанан, Оһуохайга кыттыһыҥ диэн ыҥырабыт! Буолар бириэмэтэ — күнүс икки чаастан киэһээ сэттэ5э дылы.

      Марта Николаева, Дархан этээччи: — Бу үгэс Оһуохай түмсүүтэ баар кэмиттэн өрөбүл ахсын буолар. Кыһын Арчы Дьиэтигэр, сайын пааркаҕа. Быыһыгар баҕалаахтар сахалыы ыллыыллар, үҥкүүлүүллэр. 2017 сыллаахха пааркаҕа Оһуокай искибиэрэ аһыллыбыта. Манна этээччилэр хаартыскалара кэчигирээн турарын үгүс дьон астынар. Куорат олохтоохторо,ыалдьыттара мэлдьи сылдьаллар. Сахалыы астаах буфеттаахпыт. Биһиги Оһуохай түмсүүбүт бары чилиэттэрэ барыгытын өрөбүл ахсын ыытыллар пааркабытыгар ыҥырабыт!