Кулан Хаан кинигэтин сүрэхтэниитигэр саалаҕа баппат киһи тоҕуоруста

Кулан хаан «Сыһыан күүһэ» кинигэтин сүрэхтэниитигэр саалаҕа баппат киһи тоҕуоруста

Атырдьах ыйын 29 күнүгэр Smart-библиотекаҕа Кулан Хаан «Сыһыан күүһэ» кинигэтин сүрэхтэниитэ буолан ааста. Ыалдьыттар үрүҥ ойуун, алгысчыт, бөлүһүөк санаатын, сүбэтин истэн, куттуун-сүрдүүн үрдээн, астынан тарҕастылар.

«Айар» кыһа Кулан Хаан бу төрдүс кинигэтин таһаарда. Бастакы икки – «Төрүт ньыманан ис кыаххын арый» уонна «Итэҕэл уонна ыраастаныы» чаастар номнуо тарҕанан бүппүттэрэ, ол эрээри билигин Литрес электроннай уонна аудио кинигэ сиэрбиһигэр ааҕыахха сөп. 

Кыһа салайааччыта Август Егоров Кулан хаан этэр этиилэрэ, суруйар сүһүөҕэ сахаҕа олус тиийимтиэтин бэлиэтээтэ, кинигэни ааҕан киһи бэйэ толкуйун тобулуоҕун сөбүн ыйда. Кулан хаан «Сыһыан күүһэ» кинигэтэ билиҥҥи уопсастыба тыын боппуруостарын таарыйара тоҕоостооҕун эттэ.

Кэлбит дьоҥҥо Кулан хаан ыраастаныы туомун ыытта.

«Киһи биир тыынынан истэ олоруох курдук кэпсиир. Кинигэтэ бэл эмиэ оннук. Бу иннинээҕи чаастарын барытын аахпытым. Санаан кэлэн хат ааҕабын. Бу кинигэтин сүрэхтэниитин олус кэтэспитим. Буолбата буолуо дии саныырым, тоҕо диэтэххэ Кулан «билигин көрсүһүүлэри эҥин тохтотон сылдьабын» диэбитэ. Сүрэхтэнии тэриллибититтэн олус үөрдүм. Ааҕааччытын ытыктаан, кырдьык, сыһыан күүһүн олохтоото диэн махтанабыт!» — диэн ааҕааччыбыт санаатын үллэстэр.