«Кистэлэҥим диэн  күрэхтэһиэм иннинэ чуумпуран уоскуйабын» 

 Дархан этээччи Денис Оконешников: «Кистэлэҥим диэн  күрэхтэһиэм иннинэ чуумпуран уоскуйабын» 

       Туймаада Үрүҥ Тунах ыһыаҕын чэрчитинэн ыытыллыбыт күрэх быһаарбыт Ытык Оһуохай бастыҥ этээччилэрин билиһиннэр суруйууларбытын саҕалыыбыт. 

     Билсиҥ — Саха сирин саҥа Дархан этээччитэ Денис Оконешников: 

      — Бэйэм Мэҥэ — Хаҥалас Дьабыл нэһилиэгиттэн сылдьабын. Идэбинэн бэтэрэнээрбин, осеменаторбын. Оһуохай эппитим 17 сыл буолбут эбит билигин ааҕан көрдөххө, бастаан 2007 сылтан саҕалаабытым. Тэлэбииһэргэ оһуохайы, тойугу истэн-көрөн олус ымсыырар этим. Этим сааһа барыта арыллан, иэним итийэн киирэн барар этэ. 

       Ити курдук маҥнай тэлэбииһэринэн, араадьыйанан дьон оһуохайдыырын истэн, бэйэм хайдах сатыырбынан оһуохайдаан саҕалаабытым. Быһаччы эттэххэ дьону батыһан Оһуохай этэр буолбутум. 

       Сайын аайы буолар ыһыахтарга алгысчыт быһыытынан кыттабын. Быйыл Туймаада ыһыаҕын аһыллыытыгар тоҕус алгысчыт буолан алгыс көтөхтүбүт. Уонна Ыһыах аайы Ытык Оһуохайга өр дьаныардаахтык кыттан, араас миэстэлэргэ тиксэр этим, кистэлэҥим диэн  күрэхтэһиэм иннинэ чуумпуран уоскуйабын.

    Быйылгы Оһуохай күрэһэ олус үчүгэйдик ааста диэн бэлиэтиибин. Оһуохай түмсүү бу күрэһи Ил Дархаммыт Айсен Николаев өйөбүлүнэн Дьокуускайбыт баһылыгын Евгений Григорьев көмөтүнэн сылын аайы тэрийэн ыытарыттан олуһун диэн үөрэбин, махтанабын!