Хайахсыкка уоту умуруорууга үлэлэр

Атырдьах ыйын 16 күнүгэр шефтэрбит Нерюнгрилар бульдозердарын көмөҕө ыыппыттар. Дэриэбинэ таһыгар баар минерализованнай полосалары кэҥэтэн оҥорууга үлэлэһиэҕэ диэтилэр. Киэҥ сиринэн хайдыһан үлэлээһиҥҥэ күүстээх-уохтаах техникалар тиийбэттэрэ кыра ахсааннаах нэһилиэнньэҕэ ыарахаттары үөскэтэр. Икки трактордара алдьанан запчаас көрдөөһүнэ эмиэ бытаарыыны таһаара сырытта. Нэһилиэк бэйэтэ араас ыарахан үлэлэри толорууга сыллата техникаларынан, аныгы технологияларынан хааччынар үптээҕэ эбитэ буоллар, эбэтэр көрүллэрэ эбитэ буоллар төһөлөөх үчүгэй буолуох этэй? Итинник ыра санаалары түмэн суруйдахха тиийиммэт-түгэммэт кыһалҕа ахсаана элбээн киирэн барар. Ыарахан илии үлэтинэн тыаны солооһун, ыраастааһын ыытыллыбыта сэттис күннэрэ. Сылайан сылбаахы буолуу да тахсан эрдэҕэ.

Ол быыһыгар алаастарыттан оттообут отторун дэриэбинэҕэ күрэтии үлэтэ тэбис тэҥҥэ тэриллэ турар. Көмөҕө улуус тыатын хаһаайыстыбатын управлениета улахан техникалары ыытан нэһилиэнньэҕэ чэпчэтиини оҥороллор.

Сэттэ уот остуолбата сууллан бүгүҥҥүттэн матырыйаалларын тиэйэн, чөлүгэр түһэрии үлэтэ чэппиэр, бээтинсэ диэки бүтэр үһү дииллэр.

Дьиэ хаһаайкалара көмө күүс буолан күн аайы аһы-үөлү, иһэр ууну хааччыйыыга үлэлэһэллэр. Дьахтар сүбэтэ эппиэтинэһи сүгэн түөлбэлэринэн түһээн түһэрэн үлэлиир дьоҥҥо бириэмэтигэр тиэрдиигэ сыралаһар, сорохтор миэстэтигэр тиийэн итии аһынан хааччыйыыга сылдьаллар. Маны сэргэ үбүнэн көмөлөһүүгэ үлэ улам киэҥ далааһыннанан иһэр.

Куоракка олорор Хайахсыттар 83800 солк. харчыны хомуйан уоту умуруорууга респираторнай мааскалары, эми-тому, ачыкылары аһы-үөлү, туттар тэриллэри булаттаан сүҥкэн көмөнү оҥордулар.

Д.Н. Поисеев оскуоланы тута сылдьар тутааччылартан уонтан тахса киһилээх биир улахан погрузчик, үс м3 водовод емкостаах, шлангалардаах уу помпата биригээдэ тэрийбит, М.С. Павлова, Н.В. Климов, З.С. Антипина, 39-сус выпуск кылааһынньыктартан С. В. Дьячковская, В. Петров тэрээһиннэринэн барыта аадырыска аҕалылынна. Үгүс ыччаттарбыт эт илиилэринэн кэлэн үлэлэһэ сылдьаллар. Маны сэргэ улуус дьаһалтатыттан баһылыгы солбуйааччы А.Г. Егоров сүрүннүүр.Улуус эппиэттээх үлэһиттэрэ, тэрилтэлэрэ күннэтэ көмө күүс, сүбэ-ама буолууларын ахтыбат буолуохха сатаммат. Тульскайтан МЧС байыастара кэлэн көмөлөһөн бардылар. Бэҕэһэээҥҥи күүстээх ардах Хайахсыты кыратык сиигирдибит. Ол да буоллар норуот күүһэ – көмүөл күүһэ. Арыынан аллар алаастарбытын, үҥэр оттоох үрэхтэрбитин, өбүгэлэрбит олорон ааспыт өтөхтөрүн, тумулларга сытар хараллыыларын, айылҕаҕа чугаһаан туттубут үүтээннэрбитин, сайылыктарбытын, эргэнэ хара тыабытын харыһыйартан сүрэх ыалдьар онон туох баар күүһү түмэн уот тэнийиитин тохтотууга үлэ.

«Үтүө дьыала!» — хамсааһыҥҥа үбү хомуйууга үлэ бүгүн эмиэ салҕанар. Өбүгэлэртэн ордон кэлбит олохпут историятын кэрэһэлээн кэпсии турар алаастарбыт өйдөбүнньүктэрин туох баарбытынан харыстыаҕыҥ,араҥаччылыаҕыҥ! Бары биир өйүнэн-санааннан түмсүүлээхтик үлэлиэҕиҥ!