Хаар анныттан утуйбут оҕону быыһаатылар

Алдаҥҥа полиция үлэһиттэрэ хаар анныгар утуйбут оҕону быыһаатылар

Биир дьахтар оҕотун үлэтиттэн таксинан дьиэтигэр ыыппыта, уола дьиэтигэр тиийбэккэ, сүтэн хаалбыт.

Бастаан оҕотун бэйэтэ көрдүү сатаан баран, дьахтар полицияҕа биллэрбит. Дьыалаҕа холуобунай ирдэбил үлэһитэ Уллубек Мусауров уонна учаастактааҕы полиция үлэһитэ Евгений Лаптуров  ылсан, 11 саастаах уол дьиэтин аттын үөрэппиттэр.

Бэрэбиэркэ кэмигэр полиция үлэһиттэрэ уол дьиэтиттэн чугас күрдьүллүбүт хаарынан бүрүллүбүт куурка чааһын бэлиэтии көрбүттэр. Полиция үлэһиттэрэ хаары хаһан, онно утуйа сытар уолу булбуттар. Оскуола оҕото доҕотторун кытта оонньуу сылдьан, сылайан хаарга сыппытын быһаарда.

Утуйбут оҕону хаар уйбакка, уол иһирдьэ түһэн хаалбыт. Оҕо эмсэҕэлээбэтэх, туруга этэҥҥэ. Арассыыйа Ис дьыала министиэристибэтин Алданнааҕы  салаатын  салалтата полиция үлэһиттэрин наҕараадалыыр боппуруоһу быһаарар.