Гея Корнилова: Хас биирдиибит толкуйун тобулан сатабыллаахтык көҥү көтөн үлэлэһиэххэйин!

Бу күннэргэ киин куоракка олорор тыа сириттэн төрүттээх дьон биир дойдуйлаахтарын көрсөн, минньигэс  амтаннаах астарын амсайан, дойдуларын ахтылҕанын таһаарар саамай истиҥ, кэрэ кэмнэрэ буолан ааста. Ол крдук, Таатта улууһун Чөркөөх нэһилиэгиттэн төрүттээх дьону түмэр түмсүү сарсыарда 9 чаастан киэһээ 9 чааска диэри үрдүк таһымҥа биир тыынынан буолан ааста.

Андрей Джурович икки улахан сааланы туран биэрдэ. Манна директор кыыс Анна Александровна биһиги Чөркөөхтөр туох баар көрдөһүүбүтүн ымпыгар-чымпыгар тиийэ ыйыталаһан туран уоту-күөһү, муусуканы, зааллары бэлэмнээн биэрдэ. Хас даҕаны күн устата бииргэ программаҕа тиийэ ырытыһан тэбис тэҥҥэ ыалдьан сүрдээҕин көмөлөстө. Торжественнай чааһы Анна Михайловна Обоюкина налыччы, кэрэ лынкынас куолаһынан дьоһуннук салайан ыытта. Урут даҕаны, билигин даҕаны кини дуораһытар куолаһынан наскыллык, наҕыллык саҥаран барда даҕаны чахчы даҕаны Чөркөөхпүт кэнсиэрэ саҕаланна диэн өйдөбүл арааһа барыбытыгар олорор буолуохтаах.

1 из 39

Петр Толстяков аатынан Чөркөөхтөөҕү норуот театра П. А. Ойуунускай туһунан Мотрена Петровна туруорбут дьүһүйүүттэн саҕаланна. Дьүһүйүү ис хоһооно арааһа хас биирдии кэлбит киһиэхэ өйүн санаатын уһугуннарбыт, уйулҕатын долгуппут буолуохтаах. Бу көрөн олорон Дэлбэрийбит алааһыттан иитиллэн улааппыт Улуу убайбыт Былатыан Ойуунускай уһаарыллыыта, норуотун дьылҕатын бүтүннүү эппиэтинэскэ ылан сириэдийэн тахсыбытын бэккэ даҕаны арыйдылар.
Биһирэм чаас саҕаланыаҕыттан бүтүөр диэри биир дойдулаахтарбытын эҕэрэлээһинигэр болҕомто уурулунна. Дойду дьонунан- сэргэтинэн сурахтаах. Чөркөөхтөн төрүттээх Дьоһун дьоммутугар махтал суруктары, Таатта улууһуттан бочуоттаах наҕарааданы Людмила Романовнаҕа, Октябрьскай нэһилиэк бочуоттааҕа наҕарааданы Надежда Павловнаҕа, Октябрьскай нэһилиэккэ социальнай, экономическай кылаатын иһин Зоя Семёновна Афанасьева ылыан ылла уонна маннык наҕарааданы Матрена Георгиевна, Феодосий Феодосиевич Ефремовтарга үөрэ- көтө главабыт туттарда.
Биллэн туран биһирэм сурук быыстала суох икки чаас кэриҥэ буолла, чахчы даҕаны бэлиэтэниэхтээх дьон бэлиэтэннилэр. Манна Таатта түмсүү аатыттан Аржаков Владимир Владимирович командировкаҕа сылдьарынан мин туттарар үрдүк чиэскэ тигистим. Таатталарга махтал сурукпутугар өрүү Дарбасов Юрий Агитович көмө тирэх буолар, түгэни туһанан махтанабыт. Чөркөөх түмсүү ыҥырыыларын, махтал суруктарыттан саҕалаан баннерыгар тиийэ дизайнын биһиги кыыспыт Акулина Романовна Богатырева өҥөтө буолар. Худуоһунньук көрүүтүнэн түмсүү дизайнын сиэдэрэйдик оҥорон бары олус астынабыт уонна дуоһуйабыт, махталбытын биллэрэбит.
«Дойдум илгэлээх аһа» фуршет торжественнай чааһын кэннэ бу саалаҕа олорбут 150-ча киһи бары кэриэтэ ас амтаннааҕын, чахчы даҕаны ахтылҕаннаах амтаммытын долгуйан туран аһаатыбыт. Бу бэҕэһээҥҥи куйуур собото, сип сибиэһэй көбүөрдээх лэппиэскэ онтон да киһи ааҕан сиппэт сиэдэрэй аһын бүүс бүтүннүү Александра Васильевна көҕүлээһининэн астаабыттар. Александра Васильевна Чөркөөх күнүн тэрээһинигэр мунаахсыйар проблемаларбытын барытын ыйан- кэрдэн сырытта.

1 из 18

Көр бу бачча киһи туох баарбытынан түһүнэн туран кэпсэтэ-кэпсэтэ аһаатыбыт эрээри кыайбатыбыт ээ… Дьэ остуол хотойорунан ас, остуоруйа курдук аллан тахса турар дэлэй ас буолан биэрдэ. Нэһилиэк дьоно барыта астаатаҕа буолуо. Сардана Владимировна остуолун аһа эчи дэлэйэ сөхтөрдө. Бу биллэн туран биир киһи хамсаныыта буолбатаҕа биллэр, онон Чөркөөхпүт күнүгэр аһын тэрийбит хас биирдии ийэлии илиилэринэн ылсан астаспыт эдьиийдэрбитигэр, балтыларбытыгар барҕа махтал.
Бу күн кэнэҕэс Улуу убайдарбыт ааттарын ааттатар туһугар үлэлэһиэхтээх соруктар туралларын хас биирдиибит толкуйун тобулан сатабыллаахтык көҥү көтөн үлэлэһиэххэйин, саба түһэн силигин ситэриэҕиҥ!