Федот Тумусов скорбит о брате…

Быраатым барахсан Өлөксөй. Алеша. Бөппөллө…

Биһигини быраҕан бардыҥ дии ынараа дойдуга…

Дьоллоох да оҕо сааспыт Хотун Бүлүү туонатыгар ааспыта. Сайынын ыллыыр кумахтарга сытан Күн уотугар сыламнаан, ыраас чүөмпэлэргэ умсаахтаан… Онтон киэһэлик дьиэбитигэр тахсан ууллан эрэр ынах арыытынан маҥан килиэби муус уутун кытары наһаа да минньигэстик сиир этибит… Арыый улаатан баран оттоһо барарбыт. Күһүнүн Харбалаахха Харытыана эмээхсинниин отоннуу барарбыт.

Кыһынын хаарынан бырахса, кириэппэс былдьаһа оонньуурбут…

Ол оҕо саас оонньууларын быыһыгар саас оттор мас бэлэмнээһинэ: эрбээһин, хайытыы, саһааннааһын. Күһүнүн муус хостооһуна, киллэриитэ. Кыһынын хотон үлэтэ. Өссө мин бастакы улахан оҕо буолан төрөппүттэрбит:» Эн үөрэхтээх киһи буолуохтааххын, бырааттаргар маяк курдук инники буол диэн дьиэтээҕи үлэни үксүн эйиэхэ сүктэрэр этилэр».

Орто оскуоланы бүтэрэн баран мин үөрэнэр сирбэр Новосибирскайга кэлбитиҥ. Мин институппар аһара чаҕылхайдык туттарсан киирбитиҥ.  Ол кэннэ аны мин тапталбын, кэргэммин булбут сирбэр Благовещенскай куоракка үөрэммитиҥ. Дьоллоох Дьокуускай куоракка бэйэҥ үлэ- хамнас тэринэн, дьиэ- уот туттан сүүрбэттэн тахса сыл кэргэҥҥинээн Мария Егоровналыын дьоллоохтук олордугут. Мин бэйэм өттүбүттэн ийэбит барахсан эппит кэриэһин толорбут курдук сананабын…

Оҕолоруҥ, сиэннэриҥ, тыыннааххар көрбүт хос сиэннэриҥ эн олоххун салҕыахтара. Мин санаабар эн уустук да буоллар, эриирдээх- мускуурдаах да буоллар , биир уол оҕо бу Орто Дойдуга олорор дьоллоох олоҕун олорон аастын. Өссө да олоруоҥ этэ буоллаҕа дии. Аҕабыт барахсан этэр этэ:» Дьылҕа Хаан ыйааҕа. Ыйаахпыт барыбыт киэнэ ханна эрэ үөһэ суруллан турдаҕа…»

Быдан дьылларга бырастыы…

Үөһээ Дойдуга ийэбитин, аҕабытын, өбүгэлэрбитин көрүстэххинэ этээр: «»Эһиги эппиккит, алҕаабыккыт курдук ааппытын- суолбутун, чиэспитин түһэн биэрбэт туһугар олох иһин охсуһа хааллылар.»

Эн ааккар сүгүрүйүөхпүт, эйигиннэн киэн туттуохпут.