Дьоһун сурах ??

Саргылаах саҥа дьылы көрсө Таатта улууһун көҥүл тустуутун эйгэтигэр дойду тэбэр сүрэҕиттэн, Улуу Москуба куораттан, олус үчүгэй үөрүүлээх сурах тилийэ сүүрэн кэллэ.

Ол курдук Игидэй нэһилиэгиттэн төрүттээх Константин Егорович Ефимовы Россия спордун министиэристибэтэ Москва куоракка сыралаах үлэтин сыаналаан «Мастер спорта России» анал бэлиэни туттарда. Дэбдиргэҕэ Владимир Петрович Андросов аатын сүгэр спортивнай саалаҕа быйыл үбүлүөйдээх сылыгар дьоһун ситиһии кэлэн, нэһилиэк олохтоохторо үөрүүлэрэ муҥура суох.

Төрөппүттэрэ кимнээҕий диэтэххитинэ, ийэтэ — Варвара Константиновна, аҕата — Егор Алексеевич Ефимовтар дьиэ кэргэн. Соҕотох уолларын, кыра оҕолорун баҕа санаатын өйөөн, Чурапчытааҕы интернат оскуолаҕа үөрэттэрэ ыыппыттара.

Хас биирдии күрэхтэһиитин ис дууһаларыттан ыалдьан туран өйүүллэр. Төрөппүт сүрэҕэ чараас, биллэн турар, үөрүү үрдэ суох.

Костя кыра эрдэҕиттэн күөх окко күөлэһийэн, хара сиртэн тирэхтэнэн, тыыппалааҕа биллэр этэ. Чурапчытааҕы Д. П. Коркин аатынан интернат оскуоланы ситиһиилээхтик үөрэнэн бүтэрэн, салгыы ЧГИФГИС-кэ үөрэнэр кэмигэр көҥүл тустуунан дьаныардаахтык дьарыктаммыта.

Онтон салгыы тренер Егор Терентьевич Пономарев таба көрөн, анал ыҥырыытынан ХИФУ магистратуратыгар үөрэнэн күүстээх дьарыгы, элбэх тургутуулаах сбору, эриирдээх-мускуурдаах күрэхтэһиини ааһар. Салгыы Москваттан тренер Александр Анатольевич Софронов ыҥыран,

дьарыктаан, киэн эйгэҕэ сбордарга сырытыннаран, улахан күрэхтэһиилэргэ кытыннарар.

Таатта улууһун дьоно- сэргэтэ, Дэбдиргэттэн төрүттээх куорат олохтоохторо уолларын тутатына өйөөннөр, сыралаах-сылбалаах, дьаныардаах үлэ дьоһун түмүктээх буолан, бука барыбыт үөрүүбүт үксээтэ. Константин Ефимов спорт улахан араҥатыгар аата-суола доргуччу иһиллибитэ тустаах дьоҥҥо барыларыгар үтүөнү, сырдыгы, ырааһы эрэ түстүүр.