Дьэ, иэдээн! Тиийиэхтээх сирбэр тыыннаах тиийдэрбин!

Пишут:

Дьэ, иэдээн! Мин Сунтаарга командировкаҕа таксинан баран кэлээри, сурахха киирэр, кэпсээҥҥэ кэпсэнэр куһаҕан майгылаах айанньыт буоллум…Горнай трассата суола оҥоһуллан харах тэстэринэн, буут быыппастарынан суоппардар айанныыллар. Биир түгэҥҥэ арай спидометр көрбүтүм 130 км/ч. Мин ону-маны барытын кыл түгэнигэр толкуйдаан ыллым, микроавтобус толору дьон, бас хайа барар муусуката, ким да арай саҥарбат. Массыына суол тоҕойдоругар бу ойоҕоһунан иэҕэйэн ыла-ыла айанныыр, туох эрэ тимирэ хыычыгыраан ылар… Ол тухары суоппар телефонун илиититтэн араарбат, ватсап хаһа олорор, ол быыһыгар туох да солуута суоҕу кэпсэтэр, өссө эбиитин рациянан эмиэ уруй-айхал, эҕэрдэлэһии. Тулуйбатым уонна суоппарга этээччи буоллум: тохтоо эрэ, эн, мин хайдах эмит тиийиэхтээх сирбэр тыыннаах тиийдэрбин! Дьэ, онно биирдэ биир дьахтар син хоһуласта. Онтон эрдийэн мин суолу быһа,ол аата 15 чаас тухары, бу суоппарбын манааччы буоллум. Сотору-сотору эргийэн көрөр, телефонун ылаары илиитэ кыһыйар, телефонугар ватсап кэлэн дьиримнии-сандаара сытар. Мин уун утары, дьэ, көрөн уордайан олордум бу уһун усталаах суол тухары. Суоппар телефонун син биир ылла, миигин көрбөтүн диэн, атын кугааҕар даҕайар, эмиэ ватсап көрөөрү гынна. Мин тохтоттум ээ. Биир сиргэ киһим нухарыйда дуу хайдах дуу: арай, өйөнөн олорор тоҥолоҕо сыыһа-халты түһүтэлээтэ. Мин суоппарбын көхсүттэн анньыалаатым: хайа, бу утуктаатыҥ дуу, тугуй? Иккис суоппарыҥ ыыппат дуо?- диибин. Ол курдук кэлэ-бара сүрэх ыарыыта. Суол сааххала туохтан буолла дии-дии араас экспертиза, быһылааны силиэстийэлээһин…Ону баара сэрэҕэ суох быһыы-майгы, суол оҥоһуллан олус түргэн сырыы — бу үгүс саахал төрүөтэ эбит. Айаннаан иһээччилэр биһиги бары ити суоппардарга харчы төлүүр дьон быһыытынан кинилэртэн сэрэхтээх буолары ирдиэх тустаахпыт, толлубакка. Биир эмит хабыр суоппар баар буолуо. Ол курдук биир киһи миигин аныгыскы чайнойга хаалаҕын, атын массыынаны булунаар диэбитэ…ол эрэн харчыга айаннаан иһэн мээнэ ким да үүрүллүбэт. Дьэ, итинник мөкү быһыыларын видеоҕа эҥин устуохха сөп, бодолорун тардыналларын курдук…ону баара саахал буолбутун кэннэ, буолуох буолбутун кэннэ түһэрэ охсон тарҕатабыт… Сэрэхтээх буолуоҕуҥ, бэйэ-бэйэни харыстаһыаҕыҥ!