“Бичиккэ” сонун кинигэ: икки ааптар биир сэһэни суруйан таһаарда

Бу күннэргэ астынан туран суруйааччылар Надежда Егорова-Намылы уонна Иннокентий Попов “Тайҕа таайыллыбатах таптала” диэн саҥа кинигэлэрин аахтым. Кинигэ от ыйын саҥатыгар “Бичик” национальнай кинигэ кыһатыгар бэчээттэнэн таҕыста.

Маннык икки ааптар биир сэһэни суруйуута — ураты көстүү. Суруйуу, биллэрин курдук, айааччы тус үлэтинэн буолар. Омос санаатахха, икки тус-туһунан киһи буочара, суруйар ньымата, тыла-өһө сөп түбэспэккэ мэһэйдэһиэн сөп.  Оттон бу сэһэн дьиктитик — эр киһи уонна дьахтар — көрүүтүн, өйүн-санаатын, олоххо уопутун, тус-туһунан дьоҕурун биир айымньыга холбообут, ситэрбит-хоторбут. Ааҕа олорон тус туһунан дьон суруйбут диэбэккин. Иннокентий Попов булчут-асчыт эр киһи тайҕа уустук эрээри ураты кэрэлээх олоҕун, эр киһи майгытын-сигилитин, олоххо көрүүтүн, дьахтарга сыһыанын, булт-алт эгэлгэтин, айылҕа көстүүтүн ымпыктаан-чымпыктаан уу сахалыы тылынан суруйуутун Намылы аныгы олоҕу, киһи-аймах кэрэ аҥарын чараас уйулҕатын, олоҕу анаарыытын, тапталы өрө тутуутун, дьон сыһыанын ойуулаан байыппыт.

Кинигэни ааҕа олорон, бэйэҥ түҥ тайҕаҕа тиийбит курдук сананаҕын, бэл булт-ас аһын амтана, халыҥ ойуур дыргыл сыта, чыычаахтар айманар  саҥалара, кэрии тыаҕа кэҕэ этэрэ иһиллэргэ дылы. Оннук уу сахалыы, табатык суруллубут.

Бу олоҕу суолталыыр таптал модун күүһэ олус итэҕэтиилээхтик бэриллибит. Кинигэ бүтүөр диэри алҕас көрсүһүү тугунан түмүктэнэрин билбэккин, геройдарбыт араас моһолу-туорайы ааһаллар. Тайҕа кытаанах сокуона  киһини тургутан көрөр, икки атахтаах уйана-хатана манна биллэр,  ол эрээри айылҕа сокуонун ылынан, бииргэ алтыһан олордоҕуна сирдээҕи толору дьол  манна баара көстөр. Героиня урукку олоҕун умнан, соһуччу көрсүбүт тапталын кытта айылҕа сокуонунан түҥ тайҕаҕа олоруо дуо? Эбэтэр атааннаах-мөҥүөннээх киин сир олоҕор төннүө дуу? Бу сиргэ бары дьолго ананан кэлэбит. Ол эрэн ардыгар бэйэбит дьолбутун булбаппыт, сыыһа үктэнэбит, атын дьолу батыһабыт. Бу курдук толкуйдатар  “Тайҕа таайыллыбатах таптала”.

Устар ууну омсолуур, кэбэҕэстик ааҕыллар, киһи кутун ортотунан киирэр, долгутар сэһэни ааҕыҥ диэн ыҥырабын.

Если вы увидели интересное событие, присылайте фото и видео на наш
Whatsapp +7 (999) 174-67-82
Если Вы заметили опечатку в тексте, просто выделите этот фрагмент и нажмите Ctrl+Enter, чтобы сообщить об этом редактору. Спасибо!
Система Orphus
Наверх