Айар-суруйар эмчиттэр

Муус устар 19 күнүгэр Бүтүн Арассыыйатааҕы “Бибилэтиэкэҕэ биир түүн” диэн тэрээһин чэрчитинэн “Айар-суруйар эмчиттэр” диэн сэргэх көрсүһүү буолан ааста. Тэрээһини СӨ Национальнай бибилэтиэкэтэ уонна “Күрүлгэн” уус-уран сурунаал эрэдээксийэтэ кыттыһан ыыттылар. Арассыыйа доруобуйа харыстабылын үлэһиттэрин идэлээх сойуустарын өрөспүүбүлүкэтээҕи кэмитиэтэ (бэр. Л.П. КОРНИЛОВА), С.А. Новгородов аатынан “Бичик” КНК (сал. А.В. ЕГОРОВ),  “Көмүөл” кыһа (сал. Б.И. ПАВЛОВ), мастан сувенирдары оҥорор “Сэргэ-студия” хампаанньа (сал. М.П. КОЛОДЕЗНИКОВ) өйөөтүлэр. Ону сэргэ “Офсет” реклама-таһаарыы кииниттэн (сал. Д.Н. СКОБЕЛЕВА) айар-суруйар эмчиттэргэ кинигэ таһаарыытыгар чэпчэтии туоһута туттарылынна.

Киэһэ алта чаастан СӨ НБ былыргы дьиэтин икки этээһинэн тэриллибит көрсүһүү-кэпсэтии түөрт чаастан ордук кэм устатыгар ньиргиччи барда. Чахчы бааччы “Бибилэтиэкэҕэ биир түүн буолла”.

Икки түһүлгэнэн тэҥинэн барбыт дьоро киэһэни поэт, суруйааччы, суруналыыс Н.В. МИХАЛЁВА-Сайа (сахалыыны) уонна СӨ НБ үлэһитэ В.В. ИЛЬИНА (нууччалыыны) иилээн ыыттылар.

Айар-суруйар эмчиттэр тустарынан иһитиннэрии ырытыылары филология билимин дуоктара, профессор В.Б. ОКОРОКОВА, филология билимин кандидата С.Е. НОЕВА, филология билимин кандидата Ж.В. Бурцева оҥордулар.

Тэрээһин кыттыылаахтарын “Ситим” медиа бөлөх бас салайааччыта, СӨ бар дьонун депутата М.Н. ХРИСТОФОРОВА эҕэрдэлээтэ уонна СӨ Ил Түмэнин доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэтин (бэр. В.И. ЧИЧИГИНАРОВ), итиэннэ СӨ Доруобуйа харыстабылын министиэристибэтин (мин. Е.А. БОРИСОВА) махтал суруктара туһааннаах айар-суруйар эмчиттэргэ туттарылларын иһитиннэрдэ. “Саха сирин суруйааччылара ассоциация”  бэрэссэдээтэлэ О.Г. СИДОРОВ эмиэ эҕэрдэ тылын эттэ, өйдөбүнньүк кинигэлэри, бэлэхтэри туттарда.

Кыттыыны ыллылар:

АЛЕКСАНДРОВ Николай Николаевич ‒ СӨ доруобуйа харыстабылын туйгуна, СӨ социальнай сулууспатын туйгуна, Дьокуускай куорат доруобуйаҕа харыстабылын бочуоттаах үлэһитэ, Горнай улууһун духуобунаска попечителэ, Горнай Кировскай нэһилиэгин уонна Кэбээйи улууһун ытык киһитэ, Саха сирин уонна Арассыыйа Суруйааччыларын сойууһун, “Саха сирин суруйааччылара” ассоциация чилиэнэ;

БОРИСОВ Егор Егорович “Өлбөт-сүппэт туһугар” хоһуйуу сэһэн, “Өрөгөй аартыга” сэһэн кинигэлэрдээх; медицина билимин дуоктара, СӨ үтүөлээх бырааһа, Арассыыйа уонна Саха сирин туйгун эмчитэ, Октябрьскай нэһилиэк уонна Таатта улууһун ытык киһитэ;

ВИНОКУРОВ Иннокентий Иннокентьевич-Тагус ‒ медицина билимин дуоктара, СӨ үтүөлээх эмчитэ, Өлөөн улууһун ытык киһитэ; Саха сирин уонна Арассыыйа Суруйааччыларын сойууһун, “Саха сирин суруйааччылара” ассоциация чилиэнэ; “Оленьими тропами к месторождениям алмазов Якутии” кинигэ уонна “Любовь в яранге”, “Үс саха төрдө” романнар ааптардара;

ДЕДЮКИН Семён Семёнович-Кылыс Сэмэн ‒ Медицина национальнай киинин радиолог-эмчитэ; эдэр сааһыттан хоһоон суруйарга холоммут; дьалхааннаах 1990-с сылларга өй-санаа, сиэр-майгы сатарыйыытын утарар хоһооннору суруйан хаһыакка бэчээттэммит; чэпчэки атлетикаҕа Арассыыйа дойдулар икки ардыларынааҕы маастара;

ЕГОРОВ Валентин Владимирович ‒ СӨ үтүөлээх эмчитэ, Арассыыйа уонна СӨ доруобайа харыстабылын туйгуна, СӨ үлэ бэтэрээнэ; “Саха-Азия оҕолоро” пуонда лауреата; М.Г. уонна А.К. Михайловтар ааттарынан уопсастыбаннай-литературнай уонна С.Н. Сизых аатынан кыраайы үөрэтээччилэргэ аналлаах бириэмийэлэр лауреаттара; Норуоттар икки ардыларынааҕы Суруйааччы тэрилтэлэрин холбоһугун (МСПС), СӨ Суруйааччыларын сойууһун, “Саха сирин суруйааччылара” ассоциация, Суруйааччылар интернациональнай сойуустарын чилиэнэ;

ЗАХАРОВ Пётр Иванович ‒ кардиохирург, медицина билимин дуоктара; СӨ бочуоттаах гражданина, Арассыыйа үтүөлээх бырааһа, Арассыыйа уонна СӨ доруобуйа харыстабылын туйгуна; “Киһи соҕотох сүрэхтээх…” диэн ааҕааччы киэҥ араҥатыгар анаммыт кинигэ ааптара (сорох дьон бу уран сурук түһүлгэтигэр Пётр Иванович кыттыспытын дьиктиргиэн сөп, онон быһааран эттэххэ, бу тэрээһиммит кини ити кинигэтин туһунан кэпсэтииттэн саҕаламмыта уонна көрсүһүү кэмигэр туһааннаах кинигэ тиэрмини оҥоруу туһунан санааны үллэстии тахсарыгар төрүөт буолла);  

ИВАНОВ Василий Иннокентьевич хирург эмчит быһыытынан үлэтин Хаҥаласка саҕалаабыт; бастакы “Күн уотун туттум” кинигэтэ 1975 с. тахсыбыт; Саха сирин уонна Арассыыйа Суруйааччыларын сойууһун, “Саха сирин суруйааччылара” ассоциация чилиэнэ; СӨ доруобуйа харыстабылын туйгуна, Кэбээйи улууһун ытык киһитэ (тэрээһин кэмигэр М.Н. Христофорова Василий Иннокентьевичка бэлэх быһыытынан “Күрүлгэн” сурутуута ананарын биллэрдэ);

КОМИССАРОВА Валентина Иннокентьевна-Күлүмүрэ Уус-Алдан Бээрийэтиттэн төрүттээх; терапевт, спорт эмчитэ идэлээх; 2016 сылтан икки тылынан суруйан, 400-чэкэ хоhоон уонна тылбаас ааптара буолла; 2018 сылга “Олох көрүгэр кыттыһан” диэн хоһоон хомуурунньугун таһаартарда; СӨ доруобуйа харыстабылын туйгуна, СӨ “Килбиэнин иhин” бэлиэ кавалера;

НИКОЛАЕВ Валериан Парфеньевич Сунтаар Хаҥалас нэһилиэгэр төрөөбүт; 1984 с. билим эйгэтигэр үлэлиир, медицина билимин дуоктара, “Саха сирин медицинскэй сурунаалын” сүрүн эрэдээктэрин солбуйааччыта; Норуоттар икки ардыларынааҕы Суруйааччы тэрилтэлэрин холбоһугун (МСПС), СӨ Суруйааччыларын сойууһун, “Саха сирин суруйааччылара” ассоциация,  Арассыыйа Суруналыыстарын сойууһун чилиэнэ;

ПЛАТОНОВА Марина Спиридоновна-Хомпорууна ‒ “Все 32” тиис балыыһатын салайааччыта; “Кистэлэҥ күүс” сурунаал эрэдээктэрэ; ”Ис имим этэринэн” диэн хомуурунньук ааптара; Сунтаартан төрүттээх;

ПОПОВ Савва Тимофеевич 1979-1982 сс. Булуҥ Таймылыырыгар терапевтаабыт; 31 сыл кардиологынан үлэлээбит; үс ахтыы кинигэтин, икки фотоальбому, “Неизвестный юбиляр” диэн ыстатыйа-хоhоон хомуурунньугун таhаарбыт;

РЕШЕТНИКОВА Мария Афанасьевна-Мария Алексеева-Арылы Дуйдаах поэзияны таптааччыларга 1997 сылтан Мария Алексеева диэн аатынан биллэр, кэлин Арылы Дуйдаах диэн аатынан суруйар; Уус-Алдантан төрүттээх; Тааттаҕа үлэлээбит сылларыгар “Араҥас сулус” айар-суруйар түмсүү кыттыылааҕа; хас даҕаны хоһоон хомуурунньуктаах; ону сэргэ эмтиир эйгэ историятын чинчийиигэ дьоһуннаах үлэлэрдээх; СӨ доруобуйаҕа харыстабылын туйгуна; Норуоттар икки ардыларынааҕы Суруйааччы тэрилтэлэрин холбоһугун (МСПС), СӨ Суруйааччыларын сойууһун, “Саха сирин суруйааччылара” ассоциация чилиэнэ;

УДЫГИР Светлана Андреевна ‒ хоһоонньут, үрдүк категориялаах эмчит, СӨ доруобуйа харыстабылын туйгуна, МНК нейроофтальмолога, Красноярскай кыраайтан төрүттээх;

ЧЕРНЯВСКАЙ Виктор Фёдорович Кемеровскай уобаласка төрөөбүт; поэт, элбэх кинигэ ааптара; медицина билимин кандидата; Арассыыйа уонна СӨ санитарнай-эпидемиологическай сулууспатын бочуоттаах үлэһитэ;  Арассыыйа үтүөлээх эмчитэ; СӨ доруобуйа харыстабылыгар уонна медицинаҕа судаарыстыбаннай бириэмийэтин лауреата; Норуоттар икки ардыларынааҕы Суруйааччы тэрилтэлэрин холбоһугун (МСПС), СӨ Суруйааччыларын сойууһун, “Саха сирин суруйааччылара” ассоциация чилиэнэ.

Эмчиттэр ортолоругар айар-суруйар дьон олус элбэх эбит. Ол курдук, тэрээһин саҕаланар күнүгэр Л.М. ГРИГОРЬЕВА Чурапчыттан киирэн кыттыста. Любовь Михайловна ‒ СӨ уонна Арассыыйа доруобуйа харыстабылын туйгуна, СӨ “Гражланскай килбиэн” бэлиэтин кавалера, П.Н. Сокольников аатынан Чурапчы улууһун киин балыыһатын клинико-диагностическай лабораториятын сэбиэдиссэйэ, кыраайы үөрэтээччи, доруобуйа харыстабылын түмэлин сэбиэдиссэйэ, “Доктор Прокопий Нестерович Сокольников”,  “Помня прошлое, творим будущее. Продолжая традиции доктора Сокольникова”, “Медики-чурапчинцы на фронте и в тылу”, “Мөккүөрдээх кэм туоһулара” диэн кинигэлэрдээх.

Аны туран, сүүһүнэн ырыа тылын суруйбут поэт, тиис эмчитэ Виктор Иванович ХОН-Омук Уола кыайан кыттыбакка хаалла. Орто Халымаҕа Арассыыйа Суруйааччыларын сойууһун чилиэнэ Анатолий Игнатьевич СЛЕПЦОВ хирурунан үлэлии сылдьар.

Тэрээһин чэрчитинэн бэйэтин хоһооннорун Марианна Матвеевна ИВАНОВА (ДЕГТЯРЁВА) ааҕан билиһиннэрдэ. Кини ‒ МНК хирург эмчитэ, медицина билимин кандидата, СӨ уонна Арассыыйа доруобуйа харыстабылын туйгуна, СӨ үтүөлээх эмчитэ.

Бу киэһэ фельдшер идэлээх, онтон кэлин улахан суруналыыс, суруйааччы буолбут Степан Егорович Дадаскинов, саха уран суругар эмиэ бэйэлэрин сүппэт-оспот суолларын хаалларбыт айар куттаах эмчиттэр Михаил Афанасьевич Тырылгин, Виталий Тимофеевич Андросов ааттара истиҥник ахтылынна. В.Т. Андросов кэргэнэ Октябрина Ильинична уоллара Дмитрий Витальевичтыын, эмиэ эмчит, кэлэн эҕэрдэлээбиттэрэ олус истиҥ уонна долгутуулаах буолла.

К.Г. Башарин ‒ ХИФУ профессора, чөл олох норуодунай университетын ректора, З.К. Башарина – ХИФУ профессора, филология билимин дуоктара, А.Н. Божедонова – СӨ үөрэҕин үтүөлээх үлэһитэ, СӨ судаарыстыбаннай-гражданскай сулууспатын туйгуна, СӨ тас сыһыаҥҥа департаменын уопсастыбаннай сүбэтин чилиэнэ,  А.Г. Подголов – СӨ үөрэҕин үтүөлээх үлэһитэ, СӨ ыччат политикатын туйгуна, Нуучча общинатын уонна “Подросток” ассоциация салайааччылара, В.В. Стефанскай – гражданской авиация бэтэрээнэ, фотограф-суруналыыс уонна да атыттар тыл эттилэр, санааларын үллэһиннилэр.

ХИФУ иһинэн инклюзивнай үөрэххэ билим-инновация киинин салайааччыта, педагогика билимин кандидата П.Р. Егоров Валентина Комиссарова-Күлүмүрэ “Олох көрүгэр кыттыһан” кинигэтин көрбөт дьон ааҕалларыгар анаан оҥорбутун көрдөрдө.

Саха ырыатын биир чаһылхай сулуһа Сахаайа уонна “Кыталык” ансаамбыл кыттыылааҕа Анна Васильева Арылы Дуйдаах тылыгар ырыалары толордулар. Маргарита Яковлева эбэҥкилии ыллаата. Эмчиттэр “Вдохновение” хуордарын кыттыылаахтара Т.И. Александрова уонна Т.Н. Суздалова Күлүмүрэ тылбааһыгар Леонид Попов “Илиибэр эн илииҥ баар курдук” ырыаны ыллаатылар. Айар-суруйар эмчиттэр хоһооннорун иэйиилээхтик аахпыт “Кырсаада” ансаамбыл (сал. Г.Г. Басылайканова-Кэнтик Кыыһа) кыттыылааҕа Альбина Аммосова-Кюндядинская бэйэтин тылыгар, Саргылаана Алексеева мелодиятыгар “Аанньал быраастар” диэн саҥа ырыаны иһитиннэрдэ.

Национальной бибилэтиэкэ үлэһиттэрин оҕолоро Эвелина Григорьева, Айыына Готовцева, Саша Малгин,  Илья Ильин Валентина Егоров “Журавли над Ильменем” хоһоонун аахтылар.

Манна диэн эттэххэ, айар-суруйар эмчиттэр бэйэлэрэ ырыаҕа эмиэ олус сыстаҕас дьон. Ол эрэн, бириэмэ ыгым буолан, И.И. Винокуров-Тагус эрэ ыллаата. Кини этии киллэрэн, тылга-өскө, сурукка-бичиккэ болҕомто ууруллуохтаах диэн санааны тоһоҕолоон, мустубут дьон М.П. Алексеев-Дапсыны ‒ саха тылын ытык кырдьаҕас эмчитин ‒ туран эрэ ытыс таһынан эҕэрдэлээтилэр. Ити биир күүрээннээх түгэнинэн буолла.

Сонун, сэргэх тэрээһин Бүлүүттэн кэлбит, САССӨ уонна Арассыыйа үтүөлээх эмчитэ, үрдүк категориялаах хирург, биэс кинигэни хомуйан оҥорбут, САССӨ XII ыҥырыылаах Үрдүкү Сэбиэтин  депутата, Бүлүү улууһун, куоратын бочуоттаах олохтооҕо, улуус сүбэтин депутата Н.В. Матвеев таһаарыытынан күргүөм ырыаны толоруунан түмүктэннэ.

Если вы увидели интересное событие, присылайте фото и видео на наш
Whatsapp +7 (999) 174-67-82
Если Вы заметили опечатку в тексте, просто выделите этот фрагмент и нажмите Ctrl+Enter, чтобы сообщить об этом редактору. Спасибо!
Система Orphus
Наверх