Алгыстаах санаалар: Аар Айыы итэ5элэ кут-сүр туhунан үөрэ5э

 Киһиэхэ Кут-Сүр оруола уонна иитиллиитэ ураты улахан өйдөбүллэрдээх уонна суолталаах. Кут-Сүр диэн киһи бүүс-бүттүүнэ барыта буолар.


         Былыргы сахалыы өйдөбүлүнэн, киһи үс куттаах: Ийэ Кут, Буор Кут, Салгын Кут. Балартан Ийэ кут хаһан да өлбөт, уу да ылбат, уот да сиэбэт дьиҥнээх космическай, антиматерияттан турар эттик буолар. Ийэ Кут үөһээ тиийэн, ырааһыра-ырааһыра, саҥаттан-саҥа дьоҥҥо бэриллэн кэлэ турар. Кини киһи боростуой хараҕар бэрд дэҥҥэ көстөр. Ийэ Куту киһиэхэ Ахтар Айыыһыт Үрүҥ Аар Тойон анал көҥүлүнэн ылан биэрэр. Ахтар Айыыһыт ырааһырбыт Ийэ Куту оҕо үөскэтэр аҕаҕа уу-дьулайынан иҥэрэр. Аҕа нөҥүө Ийэ Кут дьахтарга тиийэн оҕо үөскүүр.
         Ийэ Кут оҕо ийэ иһигэр үөскүүрүгэр Буор Куту таҥан үөскэтэн барар. Хайдах быһыылаах-таһыылаах Буор Кут үөскүүрэ бу саҥа үөскүүр киһи аналыттан уонна аҕа, ийэ баҕаларыттан тутулуктанар. Өскөтүн бухатыыр күүстээх киһи эбэтэр уһулуччу өйдөөх киһи төрүөхтээх буоллахтарына, Буор Куту онно сөп түбэһиннэрэн Ийэ Кут таҥмытынан барар.


         Оҕо ийэтин иһигэр сылдьар кэмигэр икки куттаах, Салгын Кута үөскүү илик. Салгын Кут оҕо төрөөн, маҥнайгы салгыны эҕирийиитин, ытааһынын кытта үөскээбитинэн барар. Оҕо төрөөтүн ытааһына — ити ытааһын буолбатах. Ытаан кини Аан Дойдуну Космоһы кытта ситими олохтуур. Оҕо маҥнайгы ытааһынын истэн, былыргы мындыр кырдьаҕастар хайдах киһи төрөөбүтүн кытта билэ охсоллоро.


         Киһи төрөөтүн үс куттана түһэр, ол аата, сиргэ олорор дьону кытта тэҥ бырааптаах, Үрүҥ Аар Тойон иннигэр ханнык баҕарар киһини кытта тэҥ киһи буола түһэр.


         Киһи Буор Кута — ол аата, этэ-хаана улаатар, ситэр-ханар, баараҕадыйар, онтон төннөр, мөлтүүр. Буор кут сирдээҕи элэмиэннэртэн үөскүүр. Кини түөртэн үһэ убаҕастан турар. Кини сирдээҕи элеменнэртэн турар буолан, Орто Дойду ис дьылҕатыгар сөп түбэһэн, кылгас үйэлээх, өлөр-сүтэр аналлаах.

         Киһи Буор Кута буҕатыйарыгар — ол аата сайдан, күүһүрэн-уоҕуран улаатарыгар кини хайдах аһаан-таҥнан сылдьара улахан оруоллаах. Үчүгэй аска-үөлгэ үөскээбит оҕо Буор Кута түргэнник улаатар, төлөһүйэр, ол кини тас көрүҥэр тута биллэр.

         Буор Кут сайдыытыгар, буҕатыйыытыгар сөптөөх хара үлэ, араас эрчиллиилэр, илии-атах оонньуулара наадалар. Ол иһин былыргы сахалар оҕону сөпкө үлэҕэ, илии-атах оонньуутугар, буойун эрчиллиитигэр үөрэтэллэрэ.

 
         Буор Кут бухатыйыытыгар итини сэргэ бултуу-алтыы үөрэниитэ эмиэ киирэр. Булт-алт саха киһитин олоҕор сүҥкэн суолталаах этэ.

          Ити уол оҕо Буор Кутун сайыннарыыга уонна иитиигэ. Оттон кыыс оҕо Буор Кутун итии-сайыннарыы бэйэтэ туспа суоллааҕа-иистээҕэ. Кыыс оҕону харыстаан, тымныппакка, элбэх киһи хараҕар көрдөрбөккө иитии былыр баара. Бу барыта саха саргытын, инники кэскилин харыстаан, санаан-өйдөөн ыыталлара. Дьэ ол иһин хас биирдии кыыс оҕо хаппахчы иитиитин барара. Хаппахчы диэн кыыс оҕо көҥүлүн быһыы, кинини хаарчахтааһын буолбатах этэ. Бу иитии туспа көрүҥэ буолара. Былыргы сахалар, дьахтар аралдьыйымтыа, сонумсах айгылааҕын билэр буоланнар, кинини болҕомтоҕо, биир киһини үчүгэйдик истэргэ, дьиэни-уоту, бөдөҥ хаһаайыстыбаны салайарга үөрэтэр ньымалара буолара. Хаппахчыга иитиллибит кыыс Буор Кута сөптөөх суолунан сайдара уонна ыраас, чэгиэн буолара саарбаҕа суоҕа.

         Буор Кут, кини сиртэн аһаан -сиэн үөскүүр, сайдар, төрөлүйэр буолан, сирдээҕи эттиктэртин турарын эппитим. Ол иһин кини үөскүү, сайда, үүнэ, төннө-кэхтэ, өлө, ыһылла, онтон эмиэ хат үөскүү турар. Ити кини айылгыта, анала буолар.

         Билигин Салгын Кут туһунан кэпсэтиэҕиҥ. Салгын Куту үгүстэр киһи тас бүрүөтүн эрэ курдук өйдүүллэр. Суох, оннук эрэ буолбатах. Салгын Куттаах буолан киһи салгынынан аһыыр, ол аата этэ-хаана тыынан, кислороду иҥэринэр. Киһи салгына суох сатаммат, дьэ, ол иһин оҕо төрөөтүн, Салгын Кутун иҥэринээри, этигэр-хааныгар бөҕөргөтүнээри ытыыр буоллаҕа дии.
         Маны таһынан, Салгын Кут, кырдьык, киһиэхэ тас бүрүө буолар уонна Буор Кутун тастыҥ эйгэлэр дьайыыларыттан көмүскүүр куйах бүрүө буолар. Бу тас бүрүө киһи организма таһаарар араас сүүрээннэрин, сардаҥаларын кытта ситимнэһэн, элбэх өҥүнэн оонньуур бүрүө буолар. Бу бүрүө халыҥа киһи аайы туһунан буоларын таһынан, биир туспа киһиэхэ ыллахха, ханан эрэ чараас, ханан эрэ халыҥ буолар. Ити тас бүрүө туругунан көрөн киһи доруобуйатын туругун быһаарыахха сөп.

         Ол аата Салгын Кут киһи ис оттүгэр хас биирдии Буор Кутун хас биирдии клеткаларыгар тиийэ иҥэр уонна тас өттүнэн куйах буолан бүрүйэн көмүскүүр.

         Билиҥҥи кэм улахан таһымнаах экстрасенс эмчитэ Барбара Бреннан киһи тас Салгын Кутун сэттэ хос-хос араас өҥнөрдөөх  бүрүөлэр курдук  көрөр. Кини этэринэн, хас биирдии бүрүө анал чакралары кытта ситимнэһэр. Бреннан этэринэн, киһи сиһин тоноҕоһугар баар сэттэ  сүрүн чакралары таһынан өссө 21 эбии чакралар этигэр-хааныгар бааллар. Быһаччы 7 чакраны ыллахха, кинилэр хас биирдиилэрэ киһи араас органнарын кытта ситимнээхтэр. Ол аата, Салгын Кут бүрүөтүн ханнык араҥалара алдьаммытыттан, туһааннаах органнар ыалдьаллар эбит диэн быһаары оҥоруохха сөп.
        

         Мин санаабар, киһи Салгын Кутун(ауратын) араҥалара өссө элбэх уонна баай өҥнөөх буолуохтарын сөп. Холобур, уон иккигэ тиийэ. … Аура төһө баҕарар улаатар, кыччыыр кыахтаах. Элбэх дьон ортотугар сылдьар, кыараҕас дьиэҕэ-уокка ыгыта симсэр кэмҥэ аура, киһини көмүскээри, киһи этигэр-хааныгар сыстар, кыччыыр. Кини маннык эйгэни сөбүлээбэт. Киэҥ-куоҥ эйгэҕэ, айылҕаҕа сынньанар кэмҥэ кини улаатар, тэнийэр уонна ырааһырар. Салгын Кут ордук киһи таҥараҕа үҥэр кэмигэр улаатар, тэнийэр уонна күүһүрэр, ол аата Айыы күүһүнэн-уоҕунан туолар. Бу кэмҥэ кини төһө улаатара киһи төһө айыылыы эйгэлээҕиттэн (духуобунайыттан), төһө дьоҕуурдааҕыттан быһаччы тутулуктаах. Үрдүк эйгэлээх дьон Салгын Куттара Таҥараҕа үҥэр кэмнэригэр букатын үрдүккэ тиийэр, кини Кута-Сүрэ Үөһээ эйгэни кытта ситимнэһэригэр улахан далаһа буолуон сөп.

         Салгын Куту эмтээччи Айыы ойууна, Алгысчыт буолаллар. Сөптөөх үчүгэй алгыс Салгын Куту чөлүгэр түһэрэр, бөҕөргөтөр, онон ис органнар үлэлэрин тупсарар уонна киһилии чөл куттуур-сүрдүүр. Үгүс эмчит киһини эмтииригэр эмтээһини Буор Куту эмтээһиттэн саҕалыыр. Ити сыыһатын туһунан мин элбэхтик урут даҕаны эппитим. Өскөтүн Айыы ойууна уонна эмчит ойуун эмтээһиннэригэр Ийэ Куту төнүннэрии, Салгын Куту чөлүгэр түһэриини барытын тэҥҥэ оҥорор буоллахтарына, Алгысчыт, Арчыһыт эмтээһини Салгын Куту чөлүгэр түһэрииттэн саҕалыахтаахтар. Бу син биир Айыылыы (духуобунай) эмтээһин биир туспа көстүүтэ буолар. Салгын Куту сатаан эмтиир киһи эмиэ дьиҥнээх Айыылыы (духуобунай) эмчит буоларын саарбахтыыр да табыллыбат.  Кини арай Ийэ Куту төннөрүүнү кыайыа суоҕун сөп. Салгын Куту эмтиир буолан баран, Ийэ Куту кыайан төннөрбөт буоллаҕына, кини Айыы ойууна, эбэтэр эмчит ойуун Ийэ Кутун төннөрбүт ыарыһахтарын эмтиэхтээх. Итини таба өйдөөбөтөҕүнэ, кини бэрт элбэҕи сүтэриэн уонна сыыһыан сөп,.
        

         Ийэ Кут, саха былыргы философията этэринэн, хаһан да өлбөт-сүппэт,дьиҥнээх космическай эттиктэртэн турар энергетическай, антиматериальнай күүс. Ийэ Кут Буор Куту, Салгын Куту ситимниир, киһи өйүн-санаатын, этин-хаанын салайар күүс буолар. Кини киһи Сүрүн кытта быһаччы сибээстээх.
         Ийэ Кут киһи хараҕар кыайан көстүбэт, кини дэҥҥэ ойуун Ийэ Кутун төннөрөрүгэр көстөр. Тас көрүҥэ киһи бэйэтигэр майгылыыр дьүһүннээх, бэрт кыра буолар. Сороҕор төгүрүк кыракый мээчик буолан көстөр. Ойууттар Ийэ Куту төннөрөллөрүгэр хаҥас кулгаахтарыгар уктан аҕалаллар. Ийэ Кут сүрүн сылдьар миэстэтэ — киһи куртаҕа буолар. Ол гынан баран Ийэ Кут хаһан да өлбөт.


         Салгын Кут салайыытын, Буор Кут эмсэҕэлээһинин сүрүн эмтиир күүһүнэн Ийэ Кут буолар. Киһи Ийэ Кута баар уонна чөл буоллаҕына, Салгын уонна Буор Куттара көмүскэллээх сылдьаллар. Ийэ Кут, бэйэтэ үрдүкү антиматериальнай эттиктэртэн турар буолан, кини өйүн-санаатын, этин-хаанын сүрүн эмчитэ, холбооччута буолар.

         Киһи өллөҕүнэ, Ийэ Кута Салгын Кут көмөтүнэн үөһээ халлааҥҥа көтөр диэн саха былыргы итэҕэлэ этэр.
         Үс Куту таһынан, киһиэхэ Сүр бэриллэр. Бу Аар Айыылар биир сүдү бэлэхтэрэ буолар. Киһи Сүрүн хаатынан сүрэҕэ буолар. Сүр диэн — көстүбэт, дьиҥнээх космическай күүс буолар. Кини үксүн уот курдук өйдөбүллээх. Кини Ийэ Куттуун холбоһон киһи өйүн-санаатын, ис күүһүн, дьоҕурун-талаанын, күүһүн-уоҕун, суоһун-суодалын, бу киһи туһунан уопсай өйдөбүлү үөскэтэллэр. Сүр диэн киһи бары килиэккэлэрин үлэлэтэр, хамсатар тыын күүс буолар. Кини Ийэ Куттуун киһини үрдүкү таһымнарга тиийэ сайыннарар, киһиэхэ тыын биэрэр.

         Үс Кут уонна Сүр холбоһуута сүрдээх уустук өйдөбүл буолар. Ол уустуга: бу түөрт холбоһук бүтүн киһини — ол аата үрдүк өйдөөх-санаалаах, үлэлиир-хамсыыр, айар-тутар кыахтаах, күүстээх-уохтаах эттээх-хааннаах барамайы үөскэтэриттэн да көстө сылдьар диэххэ сөп.
         Сүр диэн тылтан сүрдээх диэн олус, наһаа, уһулуччу диэн эбиискэ тыллары собуйар, тыл үөскэтиллибит. Холобур, сүрдээх үрдүк, сүрдээх күүстээх, сүрдээх үчүгэй о.д.а.
         Кут-Сүр айгырааһына дьону араас иирсээннэргэ тириэрдэр, маннык обществоҕа араас куһаҕан көстүүлэр, ыарыылар элбииллэр, көбөллөр. Бу билиҥҥи айгыраабыт, алдьаммыт Айылҕабыт киһи-аймах обществотын бүттүүнүн иэдээнэ буолла. Маннык уһуннук олорор табыллыбат. Онон муҥур суолга киирбэт туһугар олохпут барыта төрдүттэн уларыйыан наада. Ол төрдүттэн уларыйарыгар киһи-аймах элбэҕи билиэн-көрүөн,ырааһырыан-чэбдигириэн, дьиҥнээх итэҕэллэр ирдэбиллэрин тутуһуон, куһаҕан дьаллыктартан тэйиэн уонна элбэхтик үлэлиэн наада. Үлэтэ суох, ордук илии үлэтэ суох, общество ырааһырбат.

         Онон Кут-Сүр сөпкө иитиллэр усулуобуйалара киһиттэн Сиргэ сөптөөхтүк олорууну, сиэр-майгы өттүнэн ирдэбиллэри булгуччулаахтык толорууну ирдиирэ саарбаҕа суох.
                                                          Кондаков В.А. ААР АЙЫЫ ИТЭҔЭЛЭ.,340-354 с. Дьокуускай 2013

  СӨ Аар Айыы итэҕэлин тэрилтэтэ күн дьонун, айыы аймаҕын Айыы ойуунун В.А.Кондаков «Алгыстар — эн көмүскэллэриҥ» 1,2,7,8 Доммнорунан алҕанарга сүбэлиир.

2. Иккис Домм!
Ү
рүҥ Аар Тойоҥҥо үҥүү-сүгүрүйүү.
К
утуүрү бөҕөргөтүү

Айыы ойууна:

— Уу харахтаах
Улаҕатын булан көрбөтөх
Улуу көмүс уоруктаах,
Хаптаҕай тыллаах,
Татым аналлаах
Таба ааттаабат
Улуу кистэл ааттаах,
Босхо бастаах
Бороҥ урааҥхай
Бодуйан көрбөт
Үрдүк Күлүм бэйэлээх
Атааннаах Аар Тойон!
Үрдүк аатыҥ
Үйэлэргэ өлбөөдүйбэт,
Албан аатыҥ
Аан Дойдуга аатырар,
Кэрэ аатыҥ
Киэҥ сирдэргэ тарҕыыр,
Дьиҥнээх аатыҥ
Дьиэк киирбэт кистэлигэр туттуллар,
Үгүс үйэлэргэ
Үрдүк Аар Айыыларга
Үрүҥ Аар Тойонунан
Айыы аймаҕа ааттыыр,
Ааккын-суолгун этэн,
Үҥэн-сүгүрүйэн,
Үгүстүк сүгүрүйэн туран,
Сиик тыыннаах Сир дьоно,
Охтон баранар оттоох-мастаах,
Уолан баранар уулаах,
Мутугунан быраҕар
Муҥур үйэлээх,
Босхо бастаах бороҥ урааҥхайдар
Бокуйан туран үҥэммит
Көрдөстөхпүт буоллун!
Арҕаһыттан тэһииннээх
Айыы аймахтарын,
Көхсүттэн тэһииннээх
Күнүм улууһун дьоннорун,
Күрүөх-билэ үөскээбит
Күндү ыччат дьоммутун
Айыы күүһүнэн араҥаччылаа!
Аламай маҥан Халлаантан
Араҕас сарыаллаах
Айыы күүһүн арылытан
Аҕалан алҕаа, арчылаа!
Үрүҥ Күн анныттан
Үрүҥ үтүө күүһү
Үрүлүтэн аҕалан
Көмүскээ! Харыһый!
Кут-сүр ыһыллан
Күнүм дьоно сүппэтиннэр!
Аам-дьаам аргыйан,
Алларааттан албаҕадыйан,
Албын тыына киирэн
Айыым дьоно аймамматыннар!
Ийэ Куппут
Эрэйдэммэккэ-муҥнаммакка
Эппитинэн-хааммытыгар
Күүскэ бигэтик тутулуннун!
Ыарыы төрдө ыксаласпатын!
Ыарыыны ыыппатын!
Ийэ Кукка суоһаабатын!
Туспа ыарыы булбатын!
Атын ыарыы ааҥнаабатын!
Куһаҕан ыарыы куудьуйбатын!
Албас ыарыы адаҕыйбатын!
Айыым дьонун
Атааннаах Аар Тойон абыраа!
Буор Куппут бухатыйдын!
Босхо, күүскэ буулаҕадыйдын!
Бойумнук күүһүрдүн!
Бухатыырдыы күүһү иҥэриннин!
Салгын Куппут
Сандаарыйа ырааһырдын!
Саһарҕалыы кыыстын!
Сарыал тэҥэ күндээрдин!
Айыы сарыала бүрүйэн
Чаҥкыныыр чаҥ алтан куйах буоллун!
Күн күүһэ көмүскээн
Күлүмнүүр көмүс куйах буолан,
Күндээрэ бүрүйдүн!
Күүстээх тыллаах кыайбатын!
Ох тыллаах охторботун!
Алдьатар тыллаах эппэтин!
Сиир тыллаах сээбэҥнээбэтин!
Кырыыс тыллаах кыбыллыбатын!
Өлөрөр-өһөрөр тыллаах,
Өһөх санаалаах өрөгөйдөөбөтүн!
Айыы нуһараҥ
Аан Дойдуга сатыылаатын!
Улуу нуурал
Орто Дойдуга олохтоннун!
Уруй-туску! Уруй-айхал!

Домм! Домм! Домм!

Үҥээччилэр:
—Айыы сарыала!
Аламай маҥан халлаантан
Аралыйа сырдаан кэлэн,
Уу дьулайбытыттан
Уйуктаах уллуҥахпытыгар диэри
Эппитин-хааммытын
Бухатыйбыт Буор Куппутун
Бөҕөргөтөн, бигэтитэн биэр!
Ийэ Куппут
Илэ-бааччы иэйэр күүстэннин!
Эппитигэр күүскэ тутулуннун!
Эппитигэр күүскэ тутулуннун!
Илэ сүүрэр илиэһэйдэр,
Идэмэрдээх атын күүстэр
Илдьэ барбаттарын курдук,
Үрүҥ Аар Айыылар
Эттэхтэрэ, дьаһайдахтара буоллун!
Салгын Куппут салыйбатын!
Сандаарыччы ырааһырдын!
Үөһээттэн үрдүктэн,
Үрүҥ Күн анныттан,
Үтүө үрүҥ күүс
Үрүлүйэ сырдаан кэлэн,
Айыы сарыалыныын
Уу дьулайбытынан киирэн,
Эт мэйиибититтэн саҕалаан,
Экчи барытын
Эбэн, күүһүрдэн бөҕөргөтүҥ!
Дэҥ-оһол дэҥнээбэтин,
Быстах былаҕай былдьаабатын,
Суол быһылаана булбатын,
Астан алдьархай ааҥнаабатын!
Алҕас түбэлтэ алдьаппатын!
Атын албас алларыппатын!
Үс Куппут бөҕөргөөтүннэр!
Сүрбүт күүһүрдүн
Куппут хаата куртахпыт,
Сүрбүт хаата сүрэхпит
Өрүү чөл буоллуннар!
Уһун кэмҥэ бөҕө буоллуннар!

Домм! Домм! Домм!

Если вы увидели интересное событие, присылайте фото и видео на наш Whatsapp
+7 (999) 174-67-82
Если Вы заметили опечатку в тексте, просто выделите этот фрагмент и нажмите Ctrl+Enter, чтобы сообщить об этом редактору. Спасибо!
Система Orphus
Наверх