«Нохтолоох сүрэхтэн» кэнсиэргэ ыҥырабыт
Күндү Сахабыт сирин дьоно-сэргэтэ!
Кулун тутар 16 күнүгэр киэһээ 17ч. Өксөкүлээх Өлөксөй аатынан Норуоттар доҕордоһууларын дьиэтигэр «Махтал» этно-фольклорнай үҥкүү ансаамбыла төрүттэммитэ 10 сылыгар аналлаах «Нохтолоох сүрэхтэн» диэн кэнсиэргэ барыгытын ыҥырабыт.
Бу дьоро киэһэҕэ Матрена Филиппова — Сыдьаайа Алгыһын иҥэринэммит алгыс сүдү күүһүнэн харысхалбытын үрдэтиэхпит, куппутун-сүрбүтүн бөҕөргөтүөхпүт, Сахаайа Нохсорова кылыһахтаах тойугунан, этигэн хомуһунан ыраастаныахпыт, «Алгыстаах аартык» олоҥхо бөлөҕүн кытта олоҥхо эйгэтигэр киирэн ылыахпыт.
Үөрүүбүтүн үксэтэн Екатерина Новикова — Дьулуура «Кэскил ырыата» диэн хоһоонугар, Егор Неустроев — Тулуйхан матыыбыгар Станислав Олесов толоруутугар уонна «Эйиигинэн дьоллоохпун» — диэн хоһоонугар Галина Шахурдина мелодиятыгар Анна Дива толоруутугар дьон таптаан истэр ылбаҕай ырыаларыттан дуоһуйуохпут.
Эһиэхэ анаан үҥкүүнү ымыы оҥостубут кэрэ эйгэни кэҥэтээччи үҥкүү бөлөхтөрө уонна ырыа, фольклор бөлөхтөрө эҕэрдэлэрин үөрэ-көтө тириэрдиэхтэрэ.
Бары бу кэрэ сааскы, дьикти, үтүө киэһэҕэ тоҕуоруһа мустаммыт 100 тахса кыттааччы сырдык сардаҥатынан угуттанан сахабыт эйгэтигэр киирэн дууһалыын сынньаныахпыт, Орто дойду олоҕун тутан турар — махтал истиҥ иэйиитин хас биир киһи сүрэхпитигэр иҥэриниэхпит.
Кэнсиэри иилээн- саҕалаан ыытыахтара Матрена Ядрихинская, Иван Ксенофонтов. Салайааччы Екатерина Новикова — Дьулуура, туруорааччы режиссер Матрена Ядрихинская.
Билиэттэр Өксөкүлээх Өлөксөй аатынан Норуоттар доҕордоһууларын дьиэтигэр онлайн кассаҕа атыыга бааллар. Билиэт сыаната 500 солк.
Тел. 32-82-96, онлайн сайт ddn-afisha.ru, sakhaconcert.ru
Эһигинниин көрсүһэр күммүтүн күүтэбит.