Александр Данилов — Дьулуур Хан: Оһуохай күнүн уруйдуубут!
Бастатан туран Саха Сирин олохтоохторун күүтүүлээх самаан сайыммыт салаллан, күөххэ үктэммиппитинэн итиитик — истиҥник эҕэрдэлиибин!
Уонна былырыыҥҥыттан биһиги Ил Дархаммыт Айсен Сергеевич Николаев уурааҕынан Ыам ыйын 25 күнүгэр Оһуохай күнэ олохтоммута. Мантан сиэттэрэн биһиги Оһуохайбыт өссө да сайдар, кэҥиир кэскиллэммитэ. Биhиги түмсүүбүт элбэх ахсааннаах тэрээһиннэри, көрсүһүүлэри ыытар, үгэс быһыытынан Дьокуускай куоракка өрөбүл аайы Оһуохай ньиргийэр, атын да улуустарга ыытыллар буолла.
Оһуохай тылын этээччилэри, сүгүрүйээччилэри бука барыгытын тус бэйэм ааппыттан, түмсүү кыттыылаахтарыттан улахан эҕэрдэбин тиэрдэбин уонна бу улуу күнү биһигини кытта буолан ыытыллар тэрээһиннэргэ көхтөөхтүк кыттыҥ диэн ыҥырабын!
— Ыам ыйын 24 күнүгэр, 11 чаастан, Доҕордоһуу болуоссатыгар
Өрөспүүбүлүкэтээҕи «Куйаар далай түһүлгэ» ыччат Оһуохайын күрэҕин финала буолуо,
— Ыам ыйын 24-25 күннэрэ, Саха Сирин бары оскуолаларыгар 9-11 кылаас оҕолоро «Эдэр ыччат оһуохайдыыр» кыттыахтара,
— Ыам ыйын 25 күнүгэр 12:00 чаастан Республика болуоссатыгар «Добун оһуохай» ыытыллыаҕа.
— Ыам ыйын 25 күнүгэр Дьокуускай куорат сынньалаҥ пааркатыгар, Оһуохай скверигэр,күнүс 14:00 чаастан сайыҥҥы Оһуохайга биһигинниин бииргэ буолуҥ!
Үс мөлүйүөн саха үөскээтин, түөрт мөлүйүөн саха төрөөтүн! Доом!
Александр Джурович Данилов — Дьулуур Хан, Оһуохай түмсүү баһылыга
+7 (999) 174-67-82
