С.А. Новгородов аатынан “Айар” кыһата ааҕааччыларыгар саҥаттан саҥа сүүрээни киллэрэр. «Айарга» суруйааччы көстүүнэйэ» диэн ааттаах-суоллаах бэрт интэриэһинэй, сонун хайысхалаах тэрээһин дьон-сэргэ кэрэхсибилин ылыан ылла.
«Айарга» суруйааччы көстүүнэйэ» тэрээһин сүрэхтэниитэ муус устар 1-гы күнүгэр ырыаҕа ылланар, хоһооҥҥо хоһуйуллар кэрэ айылҕалаах Амма улууһун Бөтүҥ нэһилиэгэр А. Черемных аатынан оҕо ускуустубатын оскуолатын кэрэттэн кэрэ дыбарыаһыгар үрдүк таһымҥа ыытылынна. Тэрээһиҥҥэ бастакы ыалдьытынан “Айар” кыһатын “Айардыын бииргэ” сыл бастыҥнарын бэлиэтиир бириэмийэҕэ “Саҥа аат” анал аат хаһаайына эдэр суруйааччы Сардаана Корякина буолбута. Сардаана киһи болҕомтотун тардар бэрт дьикти ааттаах “Күтүөккэ хомолто” диэн бастакы кинигэтин сүрэхтээбитэ.
Бастакы сүрэхтэнииттэн кынат ылан «Айарга» суруйааччы көстүүнэйэ» тэрээһин салгыы ыам ыйын 13 күнүгэр Покровскай куоракка “Саргы түһүлгэтэ” култуура уонна норуот айымньытын киинигэр, ыам ыйын 19 күнүгэр Нам сэлиэнньэтигэр М.К. Аммосов аатынан Култуура дыбарыаһыгар, ыам ыйын 31 күнүгэр Бэрдьигэстээх сэлиэнньэтигэр Сэмэн, Софрон Даниловтар ааттарынан Духуобунас киинигэр быйыл икки кинигэтэ бэчээттэнэн тахсыбыт норуокка биллиилээх Ф.И. Кобякова—Эдьиий Дора ыалдьыттаата. “Эдьиий. Айыы сүдү удаҕана” уонна “Эдьиий. Верховная шаманка трех миров” саҥа кинигэлэр тула иһирэх кэпсэтиилэр ыытыллыбыттара.
Ыам ыйын 25 күнүгэр Нам улууһун Аппааны сэлиэнньэтин Норуот айымньытын «Чороон» киинигэр “Айарга” суруйааччы көстүүнэйэ” тэрээһиҥҥэ дьиҥ олоххо баарга тирэҕирэн суруллубут “ТРИ кувшина” кинигэ ааптара, биллэр суруналыыс Сардана Сивцева-САНАЯ ыалдьыттаата.
«Айарга» суруйааччы көстүүнэйэ» бары тэрээһиннэрин ааҕааччы кутун-сүрүн туппут суруйааччы, суруналыыс Евдокия Иринцеева-Огдо иилээн-саҕалаан үрдүк таһымнаахтык ыытар. Тэрээһин чэрчитинэн хас биирдии көрсүһүүгэ автограф-сиэссийэ тэрийиллэр.
“Айар” кыһата «Айарга» суруйааччы көстүүнэйэ» тэрээһини кэмиттэн кэмигэр тэрийиэҕэ, эһиги нэһилиэккитигэр күүтүүлээх ыалдьыт буолуоҕа. Инникитин даҕаны суруйааччылардыын көрсүһүүлэри-алтыһыылары ыытан, ааҕааччыларын үөрдэ-көтүтэ туруоҕа.
