Айар саха ыччата Ленинград көмүскэлигэр

1940 сыллаахха балаҕан ыйын 15 күнүгэр 34 эдэркээн саха бастыҥ ыччата Ленинград куоракка Александр Островскай аатынан театральнай институкка үөрэнэ тиийбитэ. Кинилэр норуокка «могучая студия” диэн  ааттаналлара…

Отут түөрт хаарыан ыччат инники дьылҕата, кэлэр кэскилэ кырыыстаах сэрии сабыдыалыттан хагдарыйа кэхтибитэ…

Быйыл тохсунньу 27 күнүгэр Аҕа дойду сэриитигэр Ленинград куорат блокадата уһуллубута 80 сылын туолар. 

Быйылгы үбүлүөйдээх сылга анаан  34 эдэркээн саха оҕолоругар анаан «Айар» кыһаҕа «Театр. Якутия. Ленинград» кинигэ күн сирин көрбүтэ. Бу саҥа кинигэ сүрэхтэниитэ сарсын, тохсунньу 25 күнүгэр, Национальнай библиотека историческай залыгар тэриллээри турар. 

Оттон Саха театрыгар Иван Гоголев пьесатынан, Евгения Липковская, Исай Попов ахтыыларыгар, суруйууларыгар олоҕурбут  “Кэрэ көмүскэлигэр”  испиктээкил премьерата тохсунньу 26 күнүгэр көстүөҕэ.

Бу айымньылар уустук кэмнэргэ күүстээх санааларын ыһыктыбатах, сырдыкка эрэллэрин сүтэрбэтэх ыччаты ааттатар, үйэтитэр аналлаахтар.