Айар: Мандар Уус «Узоры и орнаменты саха» — сыл бастыҥ кинигэтэ

Быйыл биһиги эргин үөрүү күлүм аллайыытынан көмүс күһүнү көрүстүбүт. Субу соторутааҕыта, балаҕан ыйын 2 күнүгэр, Москуба  куорат Көстүүнэйин тиэргэнигэр  Норуоттар икки ардыларынааҕы  «Сыл бастыҥ кинигэтэ» диэн  35-с Москубатааҕы дьаарбаҥка буолан ааста. Манна   2021–2022 сс. тахсыбыт кинигэлэри национальнай күрэххэ көрүү  кыайыылаахтара билиннилэр.

Быйылгы дьаарбаҥкаҕа 18 куораттан  кинигэни оҥорон таһаарар 92  кыһа 600 кинигэни кытыннарда. Бу күрэххэ үгэс быһыытынан С.А. Новгородов аатынан «Айар» национальнай кинигэ кыһата эмиэ кытынна. Саха сирин аатыттан үрдүк таһымнаах үлэлэрин түмүгүн көрдөрөн, дьүүллүүр сүбэни да, дьаарбаҥканы да сэҥээрээччилэри соһута үөртэлээбитэ биһиэхэ улахан чиэс буолла.   

Маннык улахан тэрээһиҥҥэ “Айар” кыһа «Республика Саха. 100 — Саха Өрөспүүбүлүкэтэ. 100», «Иллюстрированная энциклопедия Республики Саха (Якутия)» уонна Б.Ф. Неустроев-Мандар Уус «Узоры и орнаменты Саха» кинигэлэрэ «Нон-фикш» анал дипломунан наҕараадаланнылар. Бу улахан киэптээх альбом-кинигэлэри сэҥээрээччилэр киэргэтиитин эрэ буолбакка, баай ис хоһоонун таба көрөн сыаналаабыттара биһиги эрэдээктэрдэрбит  кыһамньылаах үлэлэрин, дизайнер-худуоһунньуктарбыт талааннаах көрүүлэрин туоһута буолар.

Кинилэргэ үлэлэрэ үрдүктүк сыаналаммытынан эҕэрдэбитин этэбит. Ааҕааччыларбытыгар мааны кинигэнэн долбуурдаргытын байытыҥ диэн мэктиэлиибит. Сахалыы тыллаах, чахчы киэн туттар таһаарыылар үйэлэр тухары симэлийбэттэрин туһугар күннэтэ кыһана-мүһэнэ үлэлиир кэлэктииппитин сылы түмүктүүр биэтэккэ чугаһаабыппытынан эбии кимиилээх үлэлэри баҕарабыт!

Күндү Сахабыт сирин олохтоохторо, “Айар” кыһа таһаарар кинигэлэрин сэҥээриҥ, билиигитин байытыныҥ! Сайдыы туһугар мэлдьи кыттыгастаах уонна сүдү өйөбүл буолуоххут диэн эрэнэбит.

Если вы увидели интересное событие, присылайте фото и видео на наш Whatsapp
+7 (999) 174-67-82
Если Вы заметили опечатку в тексте, просто выделите этот фрагмент и нажмите Ctrl+Enter, чтобы сообщить об этом редактору. Спасибо!
Система Orphus
Наверх