Адам Скрябин төрөөбүтэ 125 сылыгар ананар

Саха хоровой ускуустубатын төрүттээччи Саха норуотун ырыаларын маҥнайгы хомуурунньугун нуотаҕа түһэрбит үтүөлээх Адам Васильевич Скрябин төрөөбүтэ 125 сылыгар ананар.

Бүгүн, ыам ыйын 25 күнүгэр, Сергей Зверев-Кыыл Уола аатынан Үҥкүү тыйаатырын салалтата, «Кыл Саха” төрүт дорҕоон бөлөҕө (сал. Анна Томская) уонна Адам Васильевич Скрябин сиэннэрэ, аймахтара буолан Адам Васильевич Скрябин төрөөбүтэ 125 сылыгар анаан оҥоһуллубут араас тэрээһиннэр маҥнайгы түмсүүлэрэ буолла.

Ол курдук 11 чаастан Адам Васильевич Скрябин олорбут дьиэтигэр, Залог оройуонугар баран кини аатын үйэтитэр мемориальнай дуоскаҕа тыыннаах сибэкки дьүөрбэтин уурдулар. “Кыл Саха” бөлөҕө Адам Васильевич “Саргылардаах сахаларбыт” диэн ырыатын онньоон-ыллаан иһитиннэрдилэр. Ол кэннэ Адам Скрябин сиэнэ Юрий Дмитриевич Петров – политологическай наука доктора, ХИФУ профессора тыл эттэ уонна бу кинилэр удьуор харылы дьон, Адам Скрябин аатын үйэтитиигэ туруорсар, туруулаһар сүрүн боппуруостарын тоһоҕолоон уонна харчы мунньан дьон билиитигэр, сэҥээриитигэр таһаарбыт кинигэлэрин  туһунан кэпсээтилэр. Ону сэргэ Юрий Дмитриевич бииргэ төрөөбүттэрэ кэлэн  тыл эттилэр. Николай Афанасьевич Макаров бу Саха Өрөспүүбүлүкэтин үйэлээх, өйдөбүнньүк памятниктарын салайар Департамент салайааччыта кэлэн эмиэ бэйэтин санаатын уонна бу маннык улуу дьоннор олорбут дьиэлэрин-уоттарын сөргүтүүгэ ханнык туох тосхоллор баалларын кэпсээтэ. Николай Афанасьевич Макаров Хаҥалас улууһугар Култуура управлениетын салайааччытынан олорон оччолортон, уон сыл аннараа өттүттэн Адам Скрябиҥҥа аналлаах араас хайысхалаах тэрээһиннэри булбуттарын бэлиэтээтэ. Ону сэргэ Хаҥалас улууһуттан Култуура Управлениетын салайааччыта Сахая Владимировна Громова, Нөмүгү ньэһилиэгин баһылыга Наум Васильевич Устинов, “Арчы” дьиэтин дириэктэрэ, Покровскай куораттан Лидия Васильевна Харитонова кэлэннэр бу тэрээһиҥҥэ бэйэлэрин санааларын, көрүүлэрин, тугу үлэлии сылдьалларын кэпсээтилэр.

Тыйаатыр аркыастырын сүрүн дирижера Николай Павлович Петров, уус-уран салайааччыта Светлана Прокопьевна Бессонова Адам Скрябин сахалартан аан маҥнайгынан консерватория таһымнаах үөрэххэ киирэн үөрэммитин уонна саха профессиональнай ускуустубата култуурата киэҥ Сойуус таһымнаах түһүлгэҕэ тахсан хайдах оччотооҕу кэмҥэ бу саха ускуустубатын, култууратын сөргүтүүгэ кылаатын бэлиэтээн тураннар, Саха Өрөспүүбүлүкэтин ырыаны, тойугу, муусуканы таптааччыларын ыам ыйын 30 күнүгэр күнүс 3 чааска Сергей Афананасьевич Зверев-Кыыл Уола аатынан Үҥкүү тыйаатырын «Саргылардаах сахаларбыт” улахан кэнсиэркэ ыҥыраллар. 

Кыттыыны ылаллар: Саха аркыастыра, “Кыл Саха” төрүт дорҕоон бөлөҕө (сал. Анна Томская), Григорий Петров, Егор Колодезников, Виталий Власов, Владимир Боярскай, Александр Карманов, Туйаара Герасимова (Хаҥалас улууһа), Лидия Харитонова (Хаҥалас улууһа), “Чэгиэн”  бөлөх (сал. Ульяна Захарова). Кэнсиэри ыытар – Варвара Обоюкова.

Сүрүн дирижер – Николай Петров

Ыытыллар сирэ: Ю.Платонов аатынан Эстрада тыйаатырын Камернай саалататыгар.

Билиэт сыаната:  250, 500 солк.

Билсэр телефоннар: 8-962-739-35-53 (WhatsApp),  8-964-423-47-89 (WhatsApp)  

Онлайн-атыы dancesakha, Tesserus.com, Afisha.Ykt.ru  

Билиэт атыыланар  А.Кулаковскай аатынан норуоттар доҕордоһууларын дьиэтигэр, П.Ойуунускай аатынан САТ, Ю.Гагарин аатынан  Култуура уонна аныгы ускуустуба киинигэр, “Киин” к/т.