6-с устуудьуйа бастакы испиктээкилэ

Халлааммыт курулаччы кута турар, ол эрэн этиҥнээх ардах буолбатах. Щепкин училещатын 6-с устуудьуйатын устудьуоннарын оонньууларын көрө Москуба киинин устун сүүрэн иhэбит. Хойутаамаары аҕылаһан Неглиннай уулуссатын алтыс дьиэтин этэҥҥэ буллубут. Оҕолор барахсаттар үөрэ-көтө көрүстүлэр.

Испэктээкпит барбах Александр Островскай «Грозата». Театр искусствотын биир чыпчаал драмата. Уустук айымньы. Киһи уйулҕатыгар дьайыытынан быстахха, ыл да оонньоон барбаккын, оннооҕор сиппит-хоппут артыыстар кыайар-кыайбат айымньылара. Онон «Грозаны» оонньуулларын истэн хайдах эрэ ытырыктата санаабытым. Бу драманы кыайыахха эрэ сөп, эбэтэр төрүт сананыллыа да суохтаах, оннук ураты дириҥ айымньы буоллаҕа эбээт!

Бастакы көстүүттэн оҕолор ыллаан-туойан, айдааран-куйдааран көрөөччүнү тута айымньыга киллэрэн кэбистилэр. Манна Варя оруолун толорбут Айталыына Яковлева айылҕаттан маанылаппыт кэрэ куолаһын бэлиэтии иһиттим. Айталыына ис тэтиминэн, сытыытынан-хотуутунан көҥүлү өрө туппут Варяны кыайа-хото оонньоото.

Испэктээги сүрүннүүр Кулигин оруолун Петр Домотов чаҕылхайдык оонньоото. Туттарынан-хаптарынан, саҥатынан-иҥэтинэн эмиэ да Петр Баснаевы, эмиэ да Дьарааһын Васильевы майгыннатта. Сыанаҕа холку уонна аһаҕас, онтун сөбүлүү көрдүм. Биир көстүүгэ, элбэхтик кутан-симэн саҥарыахтаах сиригэр Петр уу сахалыы саҥаран ылбытыгар минньигэстик да иһилиннэ ээ тылбыт барахсан! Төрөөбүт тылларынан буолбакка нуучча тылынан оонньообуттара, биллэн турар, оҕолорго уустук: санааларын да сайа эппэттэр, эмоцияларын да ситэ көрдөрбөттөр. Ол да буоллар эдэр дьон онтон иҥнэн-толлон турбатахтара үөрдэр.

Мичил Хомподоев Тихон оруолун эмиэ бэркэ толордо. Бардам майгылаах ийэтин алы гынар аатыгар сылдьар оҕо оруолугар толору сөп түбэһэр көстүүлээх. Чопчу тайаммыттар.

Нарыйа Шадринаны бастаан Катерина оруолугар соччо барсыбат дуу диэн саарбахтаан ылбытым. Онтон кыыспыт хайдах курдук аһыллан,​ ылыннарыылаахтык оонньоон барбытыгар соһуйдум, сөхтүм, астынным. Көрдөххө нарын, хачаайы оҕоҕо хантан итиччэ күүс-кыах баарый, хайдах итини барытын уйан сылдьарый диэн, чахчы, бэркиһээтим. Ордук чаҕылхайдык Нарыйа түмүк монологар арылынна. Ханан да аһара түһүүтэ суох, олус ис-киирбэхтик оонньоото. Хараҕым уута сүүрбүтүн бэйэм да билбэккэ хааллым…

Үс сыл устата оҕолор лаппа сиппиттэр. Харахтара чоҕулуспутунан сыаналаатахха, «ууларыгар-хаардарыгар киирбиттэр». Билигин билиилэрин-көрүүлэрин өссө дириҥэтиэхтэрин, онно күүскэ үлэлиэхтэрин наада эбит, ол түһүмэххэ кэлбиттэр диэн астына көрдүм. Уонна бу испэктээги сахалыы тылынан өссө ордук иҥэн-тоҥон, иэйэн-куойан туран, ураты тыыннаан оонньуохтар эбит диэн харахпар оҥорон көрө-көрө улаханнык дуоһуйбут киһи дьиэм диэкки хаама турдум.

Ардах астыбыт. Быйаҥ ардаҕа буоллаҕа. Оҕолор айар үлэлэрэ быйаҥнаах буолуоҕа ?.