Саха ыала

Хорообукка Татьяна Коммунаровна, Николай Николаевич Герасимовтар дьиэ кэргэн быйыл 19 ынахтаахтар. Кинилэр 5 оҕолоохтор, 9 сиэннээхтэр: 8 кыыс, 1 уол.

Дьиэ кэргэн 2004 сылтан «Кырымах» бааһынай хаһаайыстыба тэриммиттэрэ. Бастаан 9 саһылы атыылаһан ииппиттэрэ. Татьяна Коммунаровна ити иннинэ 30-ча сыл күндү түүлээххэ звероводунан уонна биригэдьииринэн үлэлээбитэ. Билигин кинилэр сылгылаахтар, ынах сүөһүлээхтэр.

Николай Николаевич өрөспүүбүлүкэҕэ биллэр ат сүүрдээччи.

Татьяна Коммунаровна нэһилиэккэ биир бастыҥ уопсастыбанньык. Түөлбэ начаалынньыгынан, 10-с сылын дьахтар сэбиэтин бэрэссэдээтэлинэн үлэлиир. Былырыыҥҥыттан  настаабынньыктыыр. Суорумньунан дьарыктанан хас да ыаллаара этэҥҥэ олороллор. Кэллиэксийэнэн оҕо эрдэҕиттэн дьарыктанар. Кыра уола Эрчимэн Бэргэн эмиэ мунньар, сиэннэрим бары кэриэтэ эмиэ кэрэхсииллэр, элбэх куонкуруска кыттыбыттара.

Ыал ийэтэ, эбэтэ улахан ситиһиитинэн 2019 с. өрөспүүбүлүкэтээҕи «Далбар Хотун» куонкуруска кыттан «Талба Хотун» анал аатынан бэлиэтэммитэ буолар. 18 улуустан сэттэ иһигэр киирбит. Сыллата ыытыллар «Быйаҥнаах тэлгэһэ» улуустааҕы куонкуруска кыттар. «Үрүҥ илгэ» куонкуруска иккис миэстэ буолбута. Быйыл «Золотая Леди» куонкуруска анал аат хаһаайына буолары ситиспитэ.

Кэрэни кэрэхсиир Герасимовтар сиэннэрэ бары сахалыы саҥараллар, дьиэ ис-тас үлэтигэр көмөлөрө үтүмэн.