Үрүҥ ойуун, бөлүһүөк саҥа кинигэтэ сүрэхтэннэ

КУЛАН ХААН: ӨБҮГЭТТЭН КЭЛБИТ ИТЭҔЭЛБИТ БЭЙЭБИТ ИС ЭЙГЭБИТИГЭР ЧУГАС, ДЬИҤ КҮҮСТЭЭХ

(Кулан хаан «Саха итэҕэлэ» диэн бэһис кинигэтэ сүрэхтэннэ)

Бэс ыйын 19 күнүгэр үрүҥ ойуун, бөлүһүөк, алгысчыт Кулан хаан «Саха итэҕэлэ: төрүт өйдөбүллэр» диэн саҥа кинигэтэ сүрэхтэннэ. Ол курдук, саха итэҕэлин, духуобунай култууратын киинигэр «Арчы дьиэтигэр» буолбут кинигэ биһирэмигэр Кулан хаан тылын-өһүн истээри, ыһыахха киириэх иннинэ арчыланаары бэрт элбэх киһи тоҕуоруһа муһунна.

«Айар» кыһа Кулан хааны кытта айымньылаахтык үлэлэһиитин түмүгэр билигин ааҕааччы хайыы үйэ бэһис «Саха итэҕэлэ» диэн кинигэтин ааҕар кыахтанна. Ол иннинэ «Төрүт ньыманан ис кыаххын арый», «Чиҥ туруктаах оҕону иитии», «Итэҕэл уонна ыраастаныы», «Сыһыан күүһэ» диэн билиҥҥи тэтимнээх, элбэх информациялаах кэмҥэ киһи бэйэтин ис эйгэтин, омугун майгытын уонна уратытын сүтэрбэккэ, өйдөөн-төйдөөн олоҕун оҥосторугар көмөлөөх кинигэлэр тахсан дьон киэҥ биһирэбилин ылбыттара.

Кулан хаан өбүгэбит төрүт өйдөбүллэригэр, үгэстэригэр тирэҕирэр киэҥ билиитэ, сахалыы мындыр толкуйа, инникигэ туһаайыылаах ыллыктаах санаата сурукка үйэтитиллэн саха дьонугар тиийдин, туһалаатын диэн ис сүрэҕиттэн өйүүр киһи кыһа салайааччыта Август Егоров буолар. Кини «Саха итэҕэлэ» кинигэ сүрэхтэниитигэр ааптар итэҕэл курдук дириҥ өйдөбүлү дьоҥҥо тиийимтиэ гына суруйуута, итэҕэл суолтатын, дьиҥ ис хоһоонун судургу тылынан быһаарыыта билиҥҥи үйэҕэ олус табыгастааҕын уонна ордук көдьүүстээҕин бэлиэтээтэ. Кэлбит дьоҥҥо кинигэни ааҕан баран, бу киэҥ билиини дьоҥҥо-сэргэҕэ үллэстэ, тарҕата сылдьарбытыгар баҕаран эҕэрдэ тылын түмүктээтэ.

Кулан хаан кинигэлэрин сүрэхтэниитин биир уратыта дьону кытта атах тэпсэн олорон сэһэргэһиитэ, алтыһыыта буолар. Икки чаас устата кини араас тиэмэҕэ санаатын үллэһиннэ: ыһыах дьиҥ суолтатын, киһи тоҕо итэҕэллээх буолуохтааҕын, ийэҕэ, аҕаҕа, эбэҕэ, эһэҕэ сыһыан, оҕону иитии, олохтон дуоһуйуу, холку буолуу, киһи ис көҥүлүн туһунан уо.д.а. Ону сэргэ үгэс курдук ыраастаныы сиэрин-туомун ыытта: дьон күннээҕи түбүктэн кылгас да кэмҥэ сынньанан, туруктара чэпчээн сүргэлэрэ көтөҕүлүннэ. Тэрээһин төрүт үҥкүүнэн оһуохайынан түмүктэннэ.

Кулан хаан «Саха итэҕэлэ: төрүт өйдөбүллэр» диэн саҥа кинигэтэ ыһыах ыһыллар кэмин баттаһа күн сирин көрдө. Бу ыраастаныы, арчыланыы кэмэ буолар. Онон, саха дьоно, САХАЛЫЫ санаанан салайтаран, САХАЛЫЫ тылынан суруллубут САХА итэҕэлин туһунан кинигэни ылан ааҕыҥ, ыччаккытыгар хаалларыҥ диэн ыҥырабыт. Кинигэ «Айар» бары маҕаһыыннарыгар уонна ayar.ru саайка атыыга баар.