Үөһээ Бүлүү: улуус депутаттарын сэбиэтэ тоҕо бэйэтин боломуочуйатын уһулунна?

Улуус депутаттарын Сэбиэтин олунньу 4 күнүнээҕи уочараттаах сессиятын быһаарыытынан, улуус депутаттарын корпуһа боломуочуйатын уһулунна. Бу туһунан улуус депутаттарын Сэбиэтин бэрэссэдээтэлэ Николай Николаев маннык быһааран кэпсээтэ:

— XXV уочараттаах сессиябыт буолан ааста, манна барыта 10 боппуруос көрүллүбүтэ. Сыл түмүгүнэн хаалбыт үп киирбитин улуус ордук суолталаах тутууларыгар тыыран биэрдибит. Ол курдук, Оҥхойго, Мэйиккэ, Сургуулукка тутуллуохтаах оскуола-саадтарын, Намҥа тутуллуохтаах оҕо саадын бырайыактыыр-сметалыыр үлэлэригэр үбүлээһини көрдүбүт.

Мунньах сүрүн боппуруоһунан улуус депутаттарын Сэбиэтэ боломуочуйатын устуммута буолар. Бу уларыйыы улуус баһылыга Владимир Поскачин уонна нэһилиэктэр баһылыктара улуус депутаттарын Сэбиэтигэр киллэрбит этиилэригэр олоҕурда. Сүрүн сыалбытынан саҥа ылыллаары турар олохтоох бэйэни салайыныы органнарын реформатын туһунан федеральнай сокуону төһө кыалларынан ыарыыта суохтук, сымнаҕастык ылыныы буолар. Билигин Ил Түмэҥҥэ даҕаны, Госдумаҕа даҕаны бу сокуоҥҥа уларытыылары киллэриигэ элбэх үлэ бара турар.

Быйыл күһүн улуус баһылыгын сэргэ нэһилиэк баһылыктарын быыбардара ыытыллыахтара. Ол аата бу салайааччылар талылыннахтарына да, сылы кыайбат кэмҥэ билигин үлэлии олороллорун курдук үлэлээн хаалаллар.

Саҥа реформа быһыытынан, уларыйыылар 2023 сылтан 2028 сылга диэри барыахтаахтар. Онтон оруобуна 2023 сылга улуус депутаттарын Сэбиэтин талыллыбыт болдьоҕо тохтуур. Билигин, 131-с сокуон федеральнай сокуон үлэлиир эрдэҕинэ, улуус Сэбиэтэ боломуочуйатын устунан баран, саҥа сокуон үлэлии илигинэ иккистээн талылыннаҕына, биһиги бириэмэни сүүйэр кыахтанабыт. Ол эбэтэр, олохтоох бэйэни салайыныы органнара өссө да биэс сыл устата нэһилиэктэринэн арахсан үлэлиир кыахтаналлар. Бу биэс сыл устатыгар саҥа реформаҕа бэлэм буолар курдук күүһүрүөхтээхпит, сомоҕолоһуохтаахпыт.

Кэпсэттэ Галина ВАСИЛЬЕВА