«Үүтээн кэпсээннэрэ» күн сирин көрдө. Андрей Яковлев — Чуос саҥа кинигэтэ.
Ыам ыйын 14 күнүгэр суруналыыс Андрей Антонович Яковлев — Чуос «Үүтээн кэпсээннэрэ» диэн саҥа кинигэтэ сүрэхтэннэ. Ааптар Андрей Яковлев Бүлүү улууһун 1 Күүлэт нэһилиэгиттэн төрүттээх, билигин Бүлүү куоратын олохтооҕо, экологияҕа үлэлиир.
Тэрээһиҥҥэ чугас дьонноро, бииргэ үөрэммит үөлээннээхтэрэ, биир дойдулаахтара, «Айар» кыһа салайааччылара мустан эҕэрдэлээн, сылаастык ахтыһан, кинигэ тула кэпсэтэн тарҕастылар.
Булчуттарга кус кэмигэр бэлэҕим…
Саҥа «Үүтээн кэпсээннэрэ» кинигэбэр саха эр дьонун булка сырыыларын туһунан умсулҕаннаах кэпсээннэр, эдэр булчукка анаабыт сүбэлэрим-амаларым түмүллэн киирдилэр.
Түҥ өрүс эргин бултаабыт түбэлтэлэрим туһунан кэпсээннэр ааҕааччыны булт соноругар угуйуо, аар тайҕа байанайдаах аартыктарынан хаамтарыа, мүччүргэннээх сырыыларга кыттыһыннарыа.
Таһаарбыт кинигэлэрим…
Бастакы кинигэм «Баай барыылаах байанайдан» кинигэм 2014 с. оччолорго «Бичик» кинигэ кыһатыгар 6000 экземплярынан тахсыбыта.
Кинигэм тахсыбытын кэннэ улахан итэҕэли ыламмын
Бүлүү куорат 385 сааһын туолуутугар «Вилюйская земля: уважая прошлое, творить будущее» диэн кинигэ тахсыытыгар сүрүннээн үлэлээбитим. Ааппын-суолбун хаалларар, саха салаатыгар үөрэммит мэктиэм бу үлэм буолар.
«Сарсын тахсар күн иһин» диэн сэриигэ баран өлбүт, өлбөтөҕө буоллар биллэр тылбаасчыт, поэт буолуох киһи, Семен Даниловы, Николай Габышевы кытта бииргэ үөрэммит-алтыспыт, ийэм бииргэ төрөөбүт убайын, Иванов Василий Наумович туһунан «Сарсын тахсар күн иһин» диэн кинигэ таһаарбытым. Ийэм баҕатын толорон кинигэ таһаарбыппыттан үөрэбин уонна салгыы бу тиэмэ үөрэтиллиэ диэн баҕа санаабын тиэрдэбин.
Биир эмиэ кэннибэр хаалларар «Оҕо саас, эдэр саас, эмэн саас… Эн өрүү бааргын Күүлэтим» диэн учууталларбытыгар анаан, махтанан суруйбут кинигэбит баар. Саҥа оскуола тутулларыгар тирэҕирэммит кэлэр ыччакка хаалларарга диэн суруллубут кинигэ буолар.
Аны кэпсээн эрэ буолбакка хоһоон эмиэ айабын. Практикаҕа сылдьан хаптаҕас туһунан хоһоону суруйбуппун булан ылан, онтон тирэҕирэн хоһооннорбун мунньан «Айылҕа ырыата» диэн хомуурунньук таһаарбытым.
«Сэргэлээх уоттарын» туһунан суруйуум уонна биир философскай хабааннаах «Айылҕа үөрэҕэ» үлэм Борис Павлов «Кэм» сурунаалыгар тахсыбыттара.
Айар үлэбэр былааннарым…
Салгыы үлэлээ диэтилэр быһыылаах. Уопсайынан, бу үлэлии сылдьар эйгэбэр таба тайанан сөпкө сылдьабын дии саныыбын. Айылҕаны хоһуйарым табыллар курдук. Мэктиэтигэр кулгаахпар музыка кэлэр. Билигин сиэннэрдээх буоламмын «Эһээ сайылыга» диэн бырайыакпын саҕалаатым. Икки ый иһинэн суруйан түмүктүөхтээхпин диэн сыаллаах сылдьабын.»
Бу истиҥ киэһэ Андрей Яковлев — Чуос, суруналыыс, талааннаах ааптар эрэ буолбакка, ону таһынан сорсуннаах булчут, амарах аҕа, эйэҕэс эһэ, дьиҥнээх эр киһи уобараһын сүрэхпитигэр тилиннэрдэ. Инникитин айар-тутар үлэҥ өссө дириҥээн, сайдан, кэҥээн, ситиһиилэнэн истин, кытаанах доруобуйаны, дьолу-соргуну баҕарабыт!