АФИША КАРТА ЯКУТСКА 2GIS Билеты онлайн ГОД ЭКОЛОГИИ
ПОГОДА
-26
Небольшой снегопад
КУРС ВАЛЮТ
Курс ЦБ
$  65.95
 75.15
18+
ЛЕНТА НОВОСТЕЙ
Архив новостей
Общество
8 ноября 2018, 20:58
2164

Ытык иэс

Бу күннэргэ мин улаханнык таттаран уонна интириэһигээн соторутаагыта утуу – субуу тахсыбыт “Төрүт буор тардыыта” диэн ааттаах үс кинигэлээх романы түбэһэн аахтым. Манна диэн эттэххэ кэлиҥҥи кэмнэ киһи кинигэни олус таттаран аахпат кэмэ кэлбитин бары да билэ-көрө, истэ сылдьабыт. Манна төрүөт элбэх: соло да суох курдук уонна араас электроннай ааҕар, кэпсэтэр тэриллэр үөдэйэн, Интернет, компьютер, элбэх канааллаах телевизор онтон да атын кэпсиир сэп-тэрил киһи олоҕор кимиилэхтик хайа анньан киирэн киһини аралдьытан үрүҥ күн кылгас бириэмэтин сүүйэллэр. Дьон-сэргэ улаханыттан, кырдьаҕаһыттан да тутулуга суох батсаап диэн санаа-оноо атастаһар түргэн сонуну тарҕатааччы сибээскэ олус умсугуллуулаахтык таттаран киирэн олороллор. Бу саҥа үйэ көстүүтэ. Дьэ, онтон мин да хаалсыбаппын, онон бириэмэм аччаан кинигэни илиибэр сэдэхтик тутабын диэн билиниэх тустаахпын. Дьэ итини этэн туран бу Иван Михайлович Попов (Уһук Уйбаан) суруйбут кинигэтин дьэ сыныйан туран ааҕан баран кинини кытта санаа атастаһан кэпсэтэргэ соруннум.

Бу роман үс кинигэтэ утуу-субуу тахсыбыттар. Бастакы уонна иккис чаастара 2017 сыллаахха ““Дани-алмас” компания” диэн ХЭТ-ҕэ аҕыйах ахсаанынан тахсыбыт. Оттон үһүс чааһа 2018 сыл от ыйын 16 күнүгэр илии баттанан күн сирин көрбүт. Олус аҕыйах, 150 эрэ ахсаанынан, үс кинигэ үһөн ити таһаарар тэрилтэҕэ тахсыбыттар. Ааптар этиитинэн кимтэн да үп-харчы эрэйбэккэ бэйэтин пенсиятын мунньан бу өр сылларга ыра гынан ис дууһатынан бүөбэйдии сылдьыбыт санааларын түмэн сынньалаҥҥа тахсан баран дьэ бу сурукка тиһэн суруйан таһаарбыт.

Бастакы кинигэтин аата “Түөлбэ сиригэр” диэн. Бу манна суруйааччы Саха сирин ыраах түөлбэтигэр саха омук быдан былыргыттан сүрдэригэр-куттарыгар, эттэригэр-сииннэригэр иҥэрэн илдьэ сылдьар үгэстэрин Сэбиэскэй былаас ыытар сиэрин-майгытын иитигэр киллэриитин кэпсиир. Мин бу бастакы чааһын түҥ былыргы олохторун, кинилэр өйдөрүн – санааларын, үгэстэрин туһунэн суруллубутун олус диэн интириэһиргии аахтым, сэргээтим. Ааптар бу айымньытыгар саха ытык кырдьагастарын сатабылларын, күннээҕи олоххо тутуһан кэлбит үгэстэрин, сиэр- быһыы майгы, бэйэ-бэйэҕэ, дьиэ кэргэҥҥэ сыһыаннаһыыларын, оҕону такайыыны эҥин олус диэн наҕылыччы уонна чиҥник итэҕилиилээхтик ойуулаабыт.

Ромаҥҥа киирбит, былыргыта ойуун оҕонньор, Баһыай уонна кини доҕоро аатырбыт булчут Байанайдаах Баабыл образтара олус үчүгэйдик уонна дириҥник ытык кырдьаҕастар бэйэ-бэйэлэрин өйдөһүүлэрэ, өйөнсүүлэрэ элбэх хаары уҥуордаан, араас түбэлтэлэри ааһан илдьэ сылдьаллара, истиҥ сыһыаннара табыгастаахтык кэпсэммитэ кэрэхсэбиллээх.

Ити курдук былыргы саха дьахталларын Далбар хотуттара, ийэлэр күннээҕи дьаһахтара, үлэлэрэ-хамнастара, туох баар дьиэ кэргэн олохторун тутула кинилэртэн, кинилэр сатабылларыттан тутулуктааҕа эмиэ киһи эрэ киэн тутта ылынардыы ойууламмыт. Саха ыалын олоҕо былыр да быйыл да эр киһи уонна дьахтар бэйэ бэйэлэрин өйдөһөн-өйөһөн эрэ бу тыйыс айылҕалаах сиргэ киһи киһи буолан тыыннаах хаалара итиҕиллиилэхтик арыллыбыт.

Иккис кинигэ “Кырыыс кырыктаах кэмнэрэ”, үһүс кинигэ “Сайдыы суолунан” диэн ааттанан роман бастакы чааһыгар киирбит геройдар олохторо ситимнэнэн бараллара, олох уклаата уларыйыыта, колхозтааһын, Аҕа дойду сэриитигэр бары, онтон эргилии суруллубут. Ытык кырдьаҕастар олохтон, олох сокуонунан анараа дойд уга бараллар, онтон кинилэр тутуспут сиэрдэрин-туомнарын, сыһыаннарын кэнчээри ыччатара, сиэннэрэ утумнаан илдьэ сылдьан, саҥа сүүрээн киллэрэн,сайыннаран саҥа олоҕу, саҥа үйэ ирдэбиллэринэн олороллоро, үлэлииллэрэ- хамсыыллара суруллубут.

Олох диэн олох, үтүө да мөкү, өлүү-сүтүү, кыргыһыы, кыргыһыы толоонугар охтуу, таҥарыы-арахсыы, таптал, кырдьык уонна сымыйа үйэ тухары быстыбат мөккүөрэ бу барыта ийэ сир, төрүт буор тардыытын кытта быстыспат ситимнээҕэ көрдөрүллүбүт. Бу манна сатабыллаах салайааччы, саҥа үйэ киһитин Дьүөгүөр Сэмиэнэбис нөҥүө көрдөрүллүбүт. Эдэр коммунист Дьүөгүөр дьоҥҥо сыһыана, кырдьаҕастары убаастыыра, үйэ тухары кинилэр мунньуммут баай уопуттарын болҕомтотугар ылан түөлбэтин дьонун олох ыарахан кэмин сатабыллаахтык дьаһайан колхозтааһын, сэрии, сут кэмин элбэх сүтүгэ суох туоратар, дьон ытыктабылын ылыан ылар.

Оттон киһиргэс, бардам, бэйэмсэх салайааччы Оппудуон Өлөксүөйэбис — Оппуоһа Суруксут дьоҥҥо-сэргэҕэ хабыр, ымсыы майгыта эмиэ олоххо көстөрдүү баары ойууламмыт. Бу Оппуоһа Суруксут курдук дьоннор араас хобунан-сибинэн салайтаран, дьону суоҕунан – баарынан киртитэн суруйан, үҥсэн, тыллаан дьон олоҕун отуорун алдьаталлара, репреция ыарахан тыыныгар киллэрэллэрэ эбит этэ диэн санааҕа киирэҕин. Ол гынан куһаҕан, айыыны оҥорор иэстэбиллээх уонна ирдэбиллээх буолуутун ааптар эмиэ сөпкө көрдөрбүт. Бу киһи куһаҕаннык суорума суолланар, онно харах уутун аһынан тоҕор киһи көстүбэт.

Аны туран, саха норуота уонна улуу нуучча норуотун кытта эйэ дэмнээхтик 400- чэкэ сыл тухары алтыһан, бэйэ-бэйэни кытта өйдөһөн олорууну айымньыга түөлбэ уола Силиип Смоленскай уобластан ананан кэлбит биэлсэр идэлээх нуучча кыыһа Бааланы таптаан ыал буолууларынан көрдөрбүт. Бу Баала кыыс саха норуотун олоҕун, таптыыр уолун ис сүрэҕиттэн ылыныыта, саха норуотун сиэрин-туомун тутуһуута, ылыныыта, саха тылын түргэнник үөрэтиитэ бу саха уонна нуучча норуота биир ситимнээхтэрин көрдөрөр.

Куһаҕан санаалаах Оппуоһа Суруксут сымыйа үҥсүүтүнэн бу Силиип хаайыыга  түбэһэн баран онно эмиэ нуучча киһитин кытта ыкса билсэн, кини кынатын анныгар киирэн, онтон сэриигэ баран хорсуннук уоттаах сэриини туораан кэлиитэ элбэҕи этэр.

Тапталлаах Баалата кинини умнубакка күүтэн саҥалыы өссө үчүгэйдик салгыы элбэх оҕо-уруу тэнитэн олороллоро көстөр. Манна диэн даҕатан эттэххэ ити түөлбэттэн элбэх саха ньургун уолаттара уоттаах сэриигэ баран араас омугу кытта бииргэ эйэ дэмнээхтик алтыһан, сэриигэ кыттан дойдуларыгар этэҥҥэ эргиллэн кэлиилэрэ, кыргыһыы толоонугар охтуулара, бэйэ-бэйэлэригэр доҕордуу сыһыаннара бу улуу омук дьоно уонна уһук хоту дойду дьоно төрөөбүт дойдуларын санааларын, күүстэрин-уохтарын холбоон кыайыыны ситиспиттэрэ кэпсэнэр.

Бу романтан быһа тардан санааларым лоскуйун этэн баран суруйааччыны кытта көрсөн аҕыйах ыйытыыга хоруйдууругар көрдөстүм.

Иван Михайлович, эн суруйбут ромаҥҥын олус диэн интириэһиргээн аахтым. Онон эйигиттэн маннык ыйтыылаахпын. Ити эн дьикти псевдонимыҥ туһунан. Баһаалыста суолтатын быһаарыаҥ дуо..

Иван Попов: Саха Өрөспүүбүлүкэтин суруйааччыларын холбоһугар (сойууһугар) ылыахтарыттан суруйбуппун ааҕааччылар хантан төрүттээхпин уонна тоҕо Уһук Уйбаан диэн суруйар ааттаммыппын билиэн баҕарар үксээтэ.

Мин үөскээбит-төрөөбүт сирим уруккута Сунтаар оройуонун Үөһээ Мэйик нэһилиэгин киинэ Ойууһут диэн Бүлүү эбэ үрдүк кырдалыгар турар сахалар уутуйан олорбут кэрэ айылҕалаах, бултаах-алтаах ойуччу түбэ. Иккис таһымнаах атыыһыт Тэрэппиин Баһыылайабыс Баабылап (Боппуок) баһылаан-көһүлээн олорбут нэһилиэгэ. Улууска биир бастакыннан үөрэх кыһата аһыллан үлээбит сирэ.

Бөдөҥсүтүү араллааннаах бэлиитикэтин олоххо киллэрии түмүгэр билигин умнуллубут УҺУК сир. Ону ааһан Бүлүү өрүс сүнньүгэр сахалар олорбут УҺУК түөлбэлэрэ. Дойдубун, өбүгэлэрбин ытыктаан УҺУК сир киһитэ (ыччата) Уйбаан Боппуок дэммитим. Быһаарыы тылларын өйгө хаалларан, кылгатан Уһук Уйбаан  суруйар ааты иҥэриммитим. Уһук диэн киэҥ өйдөбүллээх тыл. Айар үлэннэн оруннаахтык дьарыктанар Уйбааннар сахаҕа элбэхтэр. Олортон кэнникилэрэ, ааттааһын кэккэтигэр бүтүгэс, уһук буолуом.

Өссө биир өйдөбүлү сыһыарбытым. Сахабын омук быһыытынан сэнээһини, түһэриини, сиилээҕини, суланыыны о.д.а. эҕэлээхтик саҥарыыны тулуйбаппын.

Омукпун көмүскэһэн киирсэн, уһуктаһан барабын. Ону куһаҕан өрүппүнэн аахпаппын.

Махтал. Өйдөннө. Оттон мин билэрбинэн идэҕинэн тутуу инженерынаҕын. Атыннык эттэххэ сурук-бичик идэтиттэн атын эйгэ киһитэ бу маннык улахан ис хоһоонноох айымньыны суруйарга холоммуккун. Дьэ бу маны хайдах быһаараҕын?

Иван Попов: Айар дьоҕур киһиэхэ хантан, хаһан сыстарын олохтоон быһааран көрүүм.“Киһи олоҕун устата тус-туспа кэрчик кэмнэри ааһар. Олоҕу, тулалыыр эйгэни, дьону-сэргэни көрүүтэ, онтон бэйэтигэр ылыныыта бииргэлэспэт уратылар эрээри, быстыспат биир ситимнэр, толорсон, ситэрсэн биэрэллэр”, — эбит диэн түмүккэ кэлэн олоробун. Киһи — куйаар күн сиргэр анаан биэрбит тыыннаах олоҕун маанылаах оҕото. Бүтэр түмүгэ суох мунаар халлаан эргийэ хамсыыр күүһүнэн, ахса биллибэт бачымах сулустар сааһыланан, сирдэтэн, салаллан сырыттахтара.

Киһи куйаар олоҕун кистэлэҥнэрин барытын бу баардыы билбэт уонна билэр кыаҕа суох. Муҥура биллибэти билилиллибэт. Ол эрээри Аар Айыы тойон Таҥара – Айааччы киһиэхэ айан биэрбитэ анааран толкуйдуур кыахтаах мэйиитэ буолар. Күн сирин мэйии толкуйа салайан олорор диир оруннаах этии. Улуу Айааччыбыт сир үрдүн олоҕун салайан олоруҥ диэн киһиэхэ тыыннаах олох үс тулахачыйбат тутааҕын айан биэрбит. Туох барыта ылсыылаах-бэрсиилээх диэн толкуйдуубут. Оттон Куйаар барахсан ити үс олох тутуллар сүнньүн харда эрэйбэккэ бэлэхтээбит.

Ким утарыай? Өйүн — толкуйдуур таһымын, этин-хаанын чөл туругун — дьайар кыаҕын уонна дьоҕурун — айар-тутар таһымын ылбытын хардатын тугу төлөөтүбүт? Баар суох сиэрдээх ирдэбил: ити бэлэхтэри сайыннаран, Айбыт биэрбит таһымыгар тириэрдэн бэйэҥ тус олоххор уонна омугуҥ, бар дьонуҥ, киһи аймах туһугар кэрэммэккэ, кэрэйбэккэ толору туһаныы сиргэ кэлбит ытык иэһиҥ. Эппиппэр олоҕуран, киһи айар дьоҕура хантан эрэ, биирдэ баар буолбат. Дьоҕур киһи ийэлээх аҕатынан айыллыан инниттэн төрүт буортан, утумтан утумҥа бэриллэр биир ситим. Онон, хаһааҥҥыттан суруйар буолбуккунуй? – диэн ыйытыыга төрүөхпүттэн диэн хардарыы сөп. Оттон, дьоҕургун сайыннараргар ким көмөлөспүтэй, хаһааҥҥыттан, ханна айымньыларгын дьон ааҕыытыгар таһааттарбыкыный диэн ыйытыкка саас сааһынан хоруйдуум.

Дьэ, саас-сааһынан…

Иван Попов: Ийэбинэн эһэм Бакатаан Баһылай дьонугар-сэргэтигэр биллэр хомоҕой хоһоонноох, кэрэ куоластаах оһуохай тылын этээччи уонна аймахтаан туран оһуохайдьыттар үһү.

Аҕам өттүттэн саха тылын сүмэтин дьоҥҥо-сэргэҕэ сатаан сааһылаа  тиэрдээччилэр бааллара. Аҕам бииргэ төрөөбүттэрэ, учууталлар Прасковья Антоновна Попова уус тыллаах хоһоонньута, онтон убайым Петр Антонович Попов оройуон, өрөспүүбүлүкэ хаһыаттарыгар ахсын быспакка олоҕу көрүүтүн, онно сыһыанын суруйбут киһи. Улахан балта, мин ытыктыыр эдьийим Ольга Антоновна Слепцова (Попова) төрөппүт кыыһа, мин балтым Маргарита Егоровна Винокурова суруйааччы уонна сурналыыс. Итини утум тардыытынан ааҕабын.

Ол гынан айылҕаттан бэриллибит талааны сайыннарыыга сүбэ-ама, өйөбүл, өйдөөһүн наада..

Иван Попов: Оннук. Бэриллибит эрэ барыта тус баай буолбат. Баары харыстаан көрөн-билэн, дьаһайан сырыттахха эрэ үтүөннэн сайыахтааҕа мөккүһүллүбэт кырдьык. Айылҕа миэхэ биэрбит дьоҕурун аанын аһыспыт ытыктыыр дьоннорбун ааттаталаан ааһыым.

Иитиллибит эбэм Павлова Вера Яковлевна олорор түөлбэтин дьонугар- эргэтигэр ытыктанар, быһа саҥарыллыбат Далбар хотун этэ. Сиэтэ сылдьан саха үгэстэрин туһунан элбэҕи кэпсиирэ, өйдөтөрө. Онно олоҕуран саханы өбүгэлэр үгэстэригэр эбэлэр, эһэлэр ииппиттэрэ диэн суруйабын. Хомойуох иһин, билиҥҥи кэмҥэ оҕолору уһуйааннарга (оҕо дьиэлэригэр) түмэн иитииттэн өбүгэлэртэн утумнаһыы ситимэ симэлийэн эрэр. Омук айылҕаттан айдарыытын уратыларын тумнан дойдуга биир халыыбынан уһуйуу ирдэниллэр.

Сахам дьонугар туох эмэ тыыппалааҕы суруйбут буоллахпына, ону ааҕааччыларым таһымын быһаарыахтара, онно олук уурсубут уһуйааччыбынан, олоҕум устата ытыктыыр, сүгүрүйэр киһим Николаев Игнатий Яковлев буолар. И. Я. Николаев саха тылынан уус-уран айымньыларын сөргүтүүннэн дьаныһан дьарыктанара. Үлэтин түмүгэ саха ааҕааччытыгар киэҥник тарҕамматаҕа эрээри, архыыпка уурулла сыталларын истибитим. Игнатий Яковлевичка элбэх иһирэх тыллары анаан суруйуохпун сөбө. Соругум атын. Кылгастык эттэххэ, сахам тылын таптыырга, санаабын сааһылаан суруйарга үөрэппитэ.

Оттон хаһааҥҥыттан санааҕын сурукка тиһэр буолбуккунуй? – диэн ыйытыам дуу?

Иван Попов: “Хаһааҥҥыттан санааҕын сааһылаан суруйар буолбуккунуй”, — диэн ыйытыкка хоруйум олус чопчута суох буолуо. Бэһис кылааска бииргэ үөрэнэр оҕолобор анаан биир күппүлүөт хоһоон суруйарым. Холобур. Хапыталыыс диэн хос ааттыыр уолбутугар, билигин өрөспүүбүлүкэҕэ биллэр хирург- быраас, анаабыппын саныыбын.

Хаппыталыыс былааһа.
Хара дьайдаах накааһа
Хаарыан сааспын сиэтэҕиэн,
Хараҥаҕа ыыттаҕыан. о.д.а. дьиибэ-хообо хоһуйуу элбэҕэ.

Сэттискэ үөрэн сылдьан оройуон “Ильич уоттара” хаһыатыгар бастакы ыстатыыйам бэчээттэммитэ. Ахсыс кылааска бастакы хоһоонум Бүлүү ГЭС туһунан тахсыбыта. Тиһигин быспакка эрээри, сыл баһыгар атаҕар ыстатыыйа суруйарым. Хомойуох иһин ол суруйууларбын хаһаамматахпын. Архыыптан көрдөөн булан көрүөххэ сөп буолуо.

Саха уус-уран тылынан айымньытынан сынньалаҥҥа олорон олохтоохтук дьарыктанабын. Хамнастаах солоҕо үлэлии сылдьан айымньы суруйар, мин өйдөбүлбүнэн кыаллыбат. Өй-санаа тырыта тыыттарыыта саҕаланар. Сүрүн үлэҕэр ээл-дээл сыһыаннаһыы олохсуйар.

Ону таһынан, Сэбиэскэй кэмҥэ айымньылары сыымайдааһын (цензура) күүскэ үлэлиирэ. Кырдьыгы сирэйгэ эттэххэ, биллибэт-көстүбэт дьон суруйууларын олус өрө туппаттара. Уһун кэмҥэ таҥыллыбыт суруйааччылар бөлөхтөрүгэр туораттан анньан киирэргэ чахчы сүдү дьоҕур ирдэнэрэ.

Оскуолаттан суруналыыс уонна суруйааччы буолуохпун баҕарарым. Суруналыыс үөрэҕэр туттарсарга биир сүрүн ирдэбил омук тылын туттарыы этэ. Оскуолаҕа омук тылын учуутала суох буолан, тылы билбэтим мэһэйдээбитэ. Оттон литературнай институтка мээнэ киһи тарабачыспат кыһата. Ол да буоллар, айар дьоҕур бэриллибит сүрүм-кутум ирдэбилинэн айар идэни архитектураны талан үөрэнэн бүтэрэн, саҥаны айар хайысханан үлээбитим.

Ол сынньалаҥҥа олорон утуу субуу кинигэ бөҕөтүн суруйан буруолаппытынан таһаарар сурахтааххын истибитим…

Иван Попов: “Төһө тахсыылаахтык суруйар үлэннэн дьарыктанаҕын”, — диэн ыйытар оруннаах. Туохха да аралдьыйбакка суруйууннан дьарыгырыым түмүгэр, бэйэм таһым быһарбынан, тахсыылаах соҕус. Тахсыбыт кинигэлэрбин ааттаталыым.

Санаам утахтара:
Бастакы хомуурунньук – Дьокуускай: “Дани-Алмас” ХЭТ, 2013 – 186 с.
Иккис хомуурунньук – Дьокуускай: “Дани-Алмас” ХЭТ, 2013 – 158 с.
Санаам утахтара, хоһооннор – Дьокуускай: “Дани-Алмас” ХЭТ, 2013 – 39 с.
Түрдүс хомуурунньук – Дьокуускай: “Дани-Алмас” ХЭТ, 2013 – 167 с.
Олох барахсан, (кэпсээннэр) – Дьокуускай: “Дани-Алмас” ХЭТ, 2014 – 122 с.
Сахам киһитигэр кэпсиирим (публицистика) – Дьокуускай: “Дани-Алмас” ХЭТ,
2014 – 178 с.
Сэгэтэн көрдөххө (публицистика) – Дьокуускай: “Дани-Алмас” ХЭТ, 2015 – 159 с.
Дьылҕа (сэһэн) — Дьокуускай: “Дани-Алмас” ХЭТ, 2016 – 156 с.
Төрүт буор тардыыта, арамаан. Маҥнайгы кинигэ — “Түөлбэ сиригэр”, 2017 – 152 с.
Айылҕа оҕото – саха итэҕэлэ (научно-популярнай) — Дьокуускай: “Дани-Алмас”
ХЭТ, 2017 – 92 с.
Төрүт буор тардыыта, арамаан. Иккис кинигэ — “Кырыыс кыырыктаах кэмнэрэ” —
Дьокуускай: “Дани-Алмас” ХЭТ, 2015 – 159 с.
Дьулуур (сэһэннэр, кэпсээннэр) – Дьокуускай: “Дани-Алмас” ХЭТ, 2017 – 136 с.
Төрүт буор тардыыта, арамаан. Иккис кинигэ — “Сайдыы суолунан” — Дьокуускай:
“Дани-Алмас” ХЭТ, 2018 – 182 с.
“Дьылҕа” сэһэним “Муммут оҕо” диэн аатынан “Чолбон” сурунаал тахсыбыта 90
сылыгар анаммыт сэһэнньит суруйааччылар сабыылаах күрэхтэригэр бастаабыта.
Айар үлэм аартыга сотору кэминэн түмүктэммэтэр ханнык.

Иван Михайлович кэпсэтииҥ иһин махтал. Айымньыларҥ элбэх ахсаанынан тахсан сахаҥ дьонун сэҥэриитин, биһирэбилин ылыаҕын баҕарабын. Ону ааһан сахалыы эрэ тылынан буолбакка өссө нуучча, омук тылларынан тылбаастанан тахсара буоллар диэн баҕа санаабын тиэрдэбин. Тоҕо диэтэххэ саха норуотун олоҕун ис – иһиттэн билэр киһи быһыытынан кини ис олоҕун укулаатын, сиэрин – туомун, быһыытын-майгытын сиһилии сырдаппыккын. Дьэ арай тылбаастанан тахсан атын омук да аан дойдуннан да тахсан саха омук былыр – былыргыттан бэйэлэрин бэйэлэрэ мындыр өйдөрүнэн, сатабылларынан салайтаран бу үйэҕэ кэллэхтэрэ диэн улахан санааҕа, биһирэбилгэ кэлиэ этилэр.

Кэпсэттэ Маргарита Егоровна Винокурова, СР үөрэҕириитин үтүөлээх үлэһитэ, педагогическай наука кандидата, Россия суруналыыстарын союһун чилиэнэ.

Сэтиньи, 2018 с.

9 ноября сего года с 15 часов в Историческом зале Национальной библиотеки им. А.Пушкина состоится презентация романа Ивана Михайловича Попова (Уһук Уйбаан) “Төрүт буор тардыыта” (Притяжение земли родной) в трех частях.

Источник: Маргарита ВИНОКУРОВА.
Если вы стали очевидцем интересного события или происшествия, присылайте фото и видео на Whatsapp +7 (999) 174-67-82
Если Вы заметили опечатку в тексте, просто выделите этот фрагмент и нажмите Ctrl+Enter, чтобы сообщить об этом редактору.
Спасибо!
Система Orphus
ТОП НОВОСТИ
ПОСЛЕДНИЕ МАТЕРИАЛЫ