АФИША КАРТА ЯКУТСКА 2GIS Билеты онлайн ГОД ЭКОЛОГИИ
ПОГОДА
21
Ясно
КУРС ВАЛЮТ
Курсы валют
Курс ЦБ
$  62.34
 73.37
ЛЕНТА НОВОСТЕЙ
18.08.2018, 15:31
Общество
Фотофакт
Летний букет
17.08.2018, 19:36
Столица
Фотофакт
Анонс
18 августа перекрытие улиц
Архив новостей
Сахалыы
13 июня 2018, 12:40
2355

Төрөөбүт төрүт тыллары үөрэтии  туһунан Саха сирин суруйааччыларын союһун  правлениятын сайабылыанньата

Бу ый 19 күнүгэр  Россия Государственнай Думата төрөөбүт тыллары оскуолаҕа үөрэтии туһунан сокуон бырайыагын бастакы ааҕыыҕа көрүөхтээх. Бу бырайыак Россия национальнай  регионнарыгар  бастакы барыла тахсыаҕыттан ыла, улахан кэпсэтиилэри, сөпсөспөт түгэннэри үөскэттэ. Бастакы ааҕыы кэнниттэн докумуону регионнарга ыытан дьүүллэһиини тэрийэр туһунан Госдума профильнай комитетын председателэ   Вячеслав Никонов иһитиннэрбитэ.

Биһиги, саха суруйааччылара, төрөөбүт тылбытыгар саамай чугас уонна кимнээҕэр да ордук улахан иэстээх, эппиэтинэстээх дьон буолабыт. Онон, төрөөбүт тыллары үөрэтии туһунан сокуоҥҥа уларыйыылар киирэллэрэ биһиги  тыын боппуруоспут буолар.  Бу күннэргэ Саха сирин суруйааччыларын правлениятын аатыгар Татарстан, Башкортостан уонна Чувашия суруйааччыларын союһуттан ыҥырыылар, суруктар киирдилэр. Кинилэр эмиэ, син биир биһиги курдук,  төрөөбүт тыллар үөрэх систематыгар вариативнай, ол аата булгуччута суох ахсааныгар киирэллэрин күүскэ утараллар.  Манна үөрэх чааһа быстар кырата, олоххо киирэр түгэнигэр төрөөбүт тыл букатын да симэлийэрин, оскуола программатыгар суох буоларын  бары бэркэ өйдүүбүт. Биһиги, суруйааччылар,  төрөөбүт тылы үөрэтии оскуолаҕа инвариантнай, ол аата булгуччулаах предмет быһыытынан хааларын туруорсабыт. Россия Конституциятын 68 ыстатыйатын 3 пуунунан оҕо төрөөбүт тылынан үөрэниитэ мэктиэлэнэр, ол кэһиитэ тахсара хайдах да табыллыбат. Россия норуоттарын тылларын  тыыннаах хаалларар, бары омуктар төрүт культураларын, литератураларын  сайыннарыы, харыстааһын мэктиэтэ – төрөөбүт төрүт тылы оскуолаҕа  үтүрүйтэриитэ суох үөрэтии. 

Билигин Российскай Федерацияҕа сокуон быһыытынан тылларбыт бары тэҥнэр (РФ Конституциятын  3 ыстатыйатын 1 пууна уонна  «Российскай Федерация норуоттарын тылын туһунан”   1807-1 нүөмэрдээх  Сокуон 2 ыстатыйата). Ол эрээри булгуччу үөрэтиллиэхтээх нуучча тыла эрэ, государственнай тыл быһыытынан.  Аны оскуолаҕа  икки омук тыла булгуччу үөрэтиллиэхтээх диэн эмиэ баар. Оччотугар, бэйэбит тылларбыт үөрэтиллибэт, оттон омук тыллара булгуччулаах буолан тахсаллар. 

Саха  литературата сүүстэн тахса сыл сайдан кэллэ. Норуот норуот дэнэрин, бэйэтэ бэйэтин ытыктанарын итэҕэтэн, туруорсан, түҥ былыргы историятын, аныгы   олох  кыһалҕаларын   анааран, ырытан, сиэрдээх буолуу, күн Айыы киһитэ дэнэри өрө тутан кэллилэр саха суруйааччылара.  Ол баайбыт, норуоппут интеллектуальнай баайа, ыччаттарбатыгар быстахтык салҕанарын кытта сөпсөһөр кыахпыт суох.  

Госдумаҕа тэриллибит рабочай группаны кытта Саха сириттэн депутаттарбыт Федот Тумусов уонна Галина Данчикова ыкса үлэлэһэн, сокуон бырайыагын ситэриигэ  уларыйыылары киллэрэллэрин модьуйабыт. Тыла суох омук суох. Төрөөбүт тыл эстэр ыар процеһа саҕаланыытын сокуонунан  киллэртэрэри утарабыт. Бу сайабылыанньабыт нууччалыы тылбааһын  Россия Госдуматыгар   суругунан тиэрдиэхпит. 

Саха народнай суруйааччылара Николай Лугинов, Наталья Харлампьева, Сэмэн Тумат, Саха сирин суруйааччыларын союһун правлениятын чилиэннэрэ Баһылай Харысхал, Куорсуннаах, Гаврил Андросов, суруйааччылар Аита Шапошникова, Степан Сивцев, Рустам Каженкин,  Альбина Борисова, Зинаида Архипова,  Данил Макеев.

Если вы стали очевидцем интересного события или происшествия, присылайте фото и видео на Whatsapp +7 (999) 174-67-82
Если Вы заметили опечатку в тексте, просто выделите этот фрагмент и нажмите Ctrl+Enter, чтобы сообщить об этом редактору.
Спасибо!
Система Orphus
ТОП НОВОСТИ
ПОСЛЕДНИЕ МАТЕРИАЛЫ