АФИША КАРТА ЯКУТСКА 2GIS Билеты онлайн
ПОГОДА
-39
Туманно
КУРС ВАЛЮТ
Курсы валют
Курс ЦБ
$  59.63
 70.36
ЛЕНТА НОВОСТЕЙ
Архив новостей
Сахалыы
24 января 2017, 19:19
995

Үтүөҕэ уонна сырдыкка сулууспалаан: Р.А. Бурнашов төрөөбүтэ 70 сылыгар

Тохсунньу 19 күнүгэр өрөспүүбүлүкэ биллиилээх судаарыстыбаннай диэйэтэлэ, 1995-1997 сс. Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччы, СӨ Судаарыстыбаннай Мунньаҕын (Ил Түмэн) II уонна III ыҥырыылаах дьокутаата, 2002 с. — 2003 с. саҥатыгар РФ Федеральнай Мунньаҕын Сэбиэтин чилиэнэ, Россия үтүөлээх экономиһа, СӨ норуот хаһаайыстыбатыгар үтүөлээх үлэһитэ, Мэҥэ-Хаҥалас улууһун Бочуоттаах гражданина, өрөспүүбүлүкэ биэнсийэҕэ сулууспатын дойду олоҕун уустук кэмнэригэр саталлаахтык, таһаарыылаахтык салайбыт Роберт Андреевич БУРНАШОВ төрөөбүтэ 70 сылыгар анаммыт өйдөөн-санаан, ахтыһан ааһыы киэһэтэ Дьокуускайга Саха Өрөспүүбүлүкэтин Бырабыыталтыстыбатын 2-с №-дээх дьиэтигэр ыытылынна.
Киэһэни Ил Түмэн испиикэрэ Александр ЖИРКОВ салайан ыытта. Кинини кытта Парламент Бэрэссэдээтэлин бастакы солбуйааччы Анатолий ДОБРЯНЦЕВ, улууспут баһылыга Николай СТАРОСТИН уонна киэҥник биллэр атын биир дойдулаахтарбыт, былаас өртүттэн ситэриилээх да, сокуону олохтуур да, суут да былааһын бэрэстэбиитэллэрэ кытыннылар.
Улахан экраҥҥа режиссер Василий ХОДУЛОВ бу нэдиэлэҕэ «Саха» НКИК эфиригэр таһаарыллара былааннанар «Үтүөҕэ уонна сырдыкка сулууспалаан» документальнай киинэтиттэн быһа тардан көрдөрүүлэр оҥоһулуннулар.
Александр Жирков Сэбиэскэй Сойуус тутула ыһыллан, уларыта тутуу дьалхааннаах кэмнэригэр Роберт Бурнашов лиидэр быһыытынан кэскиллээх хайысхалары таба тайанар дьоҕура арыллан, сайдан испитин, суверенитеты биллэриммит өрөспүүбүлүкэ бастакы Президенэ Михаил Николаев хамаандатыгар киирсэн, ол састаабын ситэрсэн, төһүү күүс буолан үлэлээбитин киирии тылыгар бэлиэтээтэ. Ол кэмнэргэ Роберт Бурнашов курдук ис көҥүллээх, бэйэлэрэ олоххо көрүүлэрдээх-истиилэрдээх салайаччыларга наадыйыы олус сытыытык турбутун эттэ.
Киэһэ 18 чаастан саҕаламмыт тэрээһин сценарийын бэрээдэгинэн, ахтан-санаан ааһыы тыллара Роберт Бурнашовы кытта бииргэ үлэлээбит, алтыһан ааспыт дьоҥҥо бэриллэн истилэр. Улуус баһылыга Николай Старостин уһулуччулаах салайааччы туһунан кылгас дакылаатын кэнниттэн ахтыылар оҥоһулуннулар. Өрөспүүбүлүкэ Үпкэ миниистирэ, Бырабыыталыстыба Бэрэссэдээтэлин солбуйааччы Роберт Бурнашовы кытта быһаччы үлэлэспит Валерий ЖОНДОРОВ, «Норуоттар икки ардыларынааҕы үп кулууба» аахсыйалаах коммерческай баан» АУо Саха сиринээҕи салаатын дириэктэрэ, Роберт Бурнашовы кытта статуправлениеҕа бииргэ үлэлээбит Владимир ДАНИЛОВ, ХИФУ үпкэ-харчыга, экономикаҕа институтун дириэктэрэ, экономикаҕа уонна билгэлээһиҥҥэ кэмитиэккэ бэрэссэдээтэллииригэр Роберт Бурнашов бастакы солбуйааччынан үлэлээбит Александр КУГАЕВСКАЙ, Роберт Бурнашовы кытта Саха АССР статистикаҕа управлениетыгар бииргэ үлэлээбит экономист, «Сахаинвест» инбэстиэсийэлиир пуонда» ААУо-ны, «Золото Якутии» ААУо-ны салайбыт Александр ФЕДОРОВ, федеральнай статистика сулууспатын Саха сиринээҕи салаатын салайааччыта, Роберт Бурнашовы кытта статистикаҕа, билгэлээһиҥҥэ бииргэ үлэлээбит Туйаара ТОРГОВКИНА, СӨ Киин быыбардыыр хамыыһыйатын бэрэссэдээтэлэ, Роберт Бурнашовы кытта иккис ыҥырыылаах састаапка дьокутааттаабыт Александр ВЛАСОВ, «Якутия» авиакомпания» ААУо генеральнай дириэктэрэ, Бырабыыталыстыба Бэрэссэдээтэлэ Роберт Бурнашовтыын экономика боппуруостарыгар бииргэ үлэлэспит Ольга ФЕДОРОВА, СӨ норуот хаһаайыстыбатын үтүөлээх үлэһитэ, Петровскайдааҕы наукалар академияларын дьиҥнээх чилиэнэ Матвей МУЧИН, РФ Биэнсийэҕэ пуондатын Саха Өрөспүүбүлүкэтигэр салаатын управляющайа, Роберт Бурнашов кэмигэр исписэлиистээбит, департамент отделын салайсыбыт, оттон Ньурба улууһугар биэнсийэ сулууспатын салайбыт Георгий СТЕПАНОВ, Е.М. Ярославскай аатынан хотугу норуоттар устуоруйаларын уонна култуураларын холбоһуктаах мусуойун дириэктэрэ, Роберт Бурнашов үөлээннээҕэ Егор ШИШИГИН, биэнсийэ сулууспатын Мэҥэ Хаҥаластааҕы салаатын салайааччыта, оройуон дьокутааттарын Сэбиэтин бэрэссэдээтэлин солбуйааччы, Роберт Бурнашов бииргэ төрөөбүт балта Альбина ГРИГОРЬЕВА ‒ улуустан төрүттээх биир чулуу салайааччы туһунан ахтыыларын оҥорбут дьон.
Тэрээһиҥҥэ Р.А.Бурнашов аатынан Табаҕа орто оскуолатын үөрэнээччилэрэ, нэһилиэк киэҥник биллэр эр дьонун «Төлөн» ырыа ансаамбылын ырыаһыттара уонна Саха сирин киэн туттуута «Туймаада» ансаамбыл ырыаһыт кыргыттара кыттаннар, өйдөөн-санаан ааһыы киэһэтин киэргэттилэр.
Ахтыыларын оҥорбут дьон Роберт Андреевиһы талааннаах, дьону бэйэтин тула чопчу сыалга-сорукка сатаан түмэр салайааччы, улахан буукубаттан суруллар олоххо Учуутал быһыытынан сыаналаатылар. Кини инникини хас эмэ уонунан сыл өтө көрөр дьоҕурун бэлиэтээтилэр. Ол курдук, Сэбиэскэй кэмҥэ сананыллан да көрүллүбэт ситиһиитэ ‒ эрэгийиэн сириттэн-уотуттан хостонуллар сир түгэҕинээҕи баайын иһин хостуур тэрилтэлэртэн нолуогу ылары ситиһии туһунан. Роберт Бурнашов итини 1990 с. ситиһэн, өрөспүүбүлүкэ оччотооҕу 450 млн солк кээмэйдээх бүддьүөтүгэр 1,5 млрд солк. үп эбии киллэриллибитэ сөҕүмэр чахчы буоларын эттилэр. Урукку административнай-хамаандынай систиэмэнэн олорбут дойду экономикатыгар саҥа тыын киирэн эрэрин бэлиэтии көрөннөр, англосакстар саха салайааччыта Роберт Бурнашовы Бирмингем куораттарын былаас уонна биисинэс норуоттар икки ардыларынааҕы кыһыл көмүс мэтээлинэн бэлиэтээбиттэрэ биллэр. Санааны аһаҕастык этии сонун чахчытын быһыытынан Ил Түмэн Бэрэссэдээтэлэ Александр Жирков Роберт Бурнашов чугас доҕотторун ортотугар уларыта тутуу дьалхаанын туһанан өрөспүүбүлүкэ төһө кыалларынан олоҕор-дьаһаҕар бэйэтин былааһын, бэйэни салайыныыны киллэринэ сатыыра наадатын эппитин туһунан ахтыбыта буолла. Онон, Роберт Бурнашов ырааҕы ырыҥалыыр лиидэр быһыытынан Россия киин былааһын уонна өрөспүүбүлүкэ интэриэстэрин сөпкө дьүөрэлээбит, тэҥ соҕус бэскигэ хачайданар балаансаларын булларбыт биир уһулуччулаах салайааччыбытынан буолар диэн этиэххэ сөп.

Аркадий ИННОКЕНТЬЕВ, Мэҥэ-Хаҥалас.

Источник: Пресс-служба Мегино-Кангаласского улуса.
Если вы стали очевидцем интересного события или происшествия, присылайте фото и видео на Whatsapp +7 (999) 174-67-82
Если Вы заметили опечатку в тексте, просто выделите этот фрагмент и нажмите Ctrl+Enter, чтобы сообщить об этом редактору.
Спасибо!
Система Orphus
ТОП НОВОСТИ
ПОСЛЕДНИЕ МАТЕРИАЛЫ