ЛЕНТА НОВОСТЕЙ
Архив новостей
Сахалыы
14 ноября 2016, 11:53
1050

Проня Говоров үрдүк ситиһиитэ

Проня

А.В.Чугунов аатынан Мэлдьэхси орто оскуолатын успуорт саалатыгар 13 кубок, 45 өрөспүүбүлүкэ, Европа, аан дойду таһымнаах мэтээллэр, грамоталар тэлгэнэн тураллар. Бу барыта ‒ үһүс кылаас үөрэнээччитэ Проня ГОВОРОВ икки сыл устата успуорка ситиһиилэрин туоһулуур.

Соторутааҕыта, алтынньы 29 ‒ сэтинньи 5 күннэригэр Турция Измир куоратыгар 100 харахтаах дуобакка аан дойду чөмпүйэнээтигэр Проня түргэн оонньууга үрүҥ көмүс уонна турецкай дуобат көрүҥэр боруонса мэтээллэри аҕалтаан дойдутун, өрөспүүбүлүкэтин, улууһун уонна нэһилиэгин үрдүктүк ааттатта.

Проня чаҕылхай ситиһиитин уруйдуур-айхаллыыр тэрээһин оскуолаҕа үөрүүлээх линиэйкэнэн бэлиэтэннэ. Агро хайысхалаах оскуола дириэктэрэ Лариса Сыромятникова кырачаан дуобатчыт ийэтигэр Мария Дмитриевнэҕэ, учууталыгар Лена Афанасьевнаҕа уонна тириэньэригэр, Сэбиэскэй Сойуус успуордун маастарыгар, Россия үөрэҕириигэ туйгунугар махталын тиэртэ. Икки сыл анараа өртүгэр Лариса Дмитриевна Василий Куприяновы ыҥыран, биллиилээх тириэньэр дьоҕурдаах Проня Говоровы таба көрөн,  дуобакка  дьаныардаахтык дьарыктаабытын түмүгэр итинник чахчы үтүө түмүктэр бэлиэтэннилэр.

Үөрэх управлениетын үлэһиттэрин боропсойууһун бэрэссэдээтэлэ, улуустааҕы дуобат федерациятын бэрэссэдээтэлин солбуйааччы Степан Андреев улуус бары дуобатчыттарын ааттарыттан итии-истиҥ эҕэрдэтин тиэртэ, аан дойду чөмпүйэнээтин интэриниэт нөҥүө истэ-билэ сылдьан, Проняҕа олуһун «ыалдьыбыттарын» эттэ. Үөрэх управлениетын оҕо успуордун хамсааһынын сүрүннүүр исписэлииһэ Иннокентий Березкин, аймахтар ааттарыттан Любовь Степанова, учууталлар, оскуола үөрэнээччилэрэ Проняны эҕэрдэлээтилэр.

Проня ийэтэ Мария Куприянова оскуолаҕа ас астааччынан үлэлиир кэмигэр уолчаан маҥнайгы кылааска үөрэнэ сырыттаҕына, дьиэлэригэр барыахтарыгар диэри кэтэһиннэрэ таарыйа диэн дуобат дьарыгар сырытыннарбыт.

‒ Тириэньэринээн киэһэ хойукка диэри сөбүлээн, дьаныһан  туран дьарыктанааччылар. Василий Васильевич оҕону бэйэтинэн интэриэһиргэтэр, айылҕаҕа, похуоттарга, онно-манна илдьэ сылдьар, дьарыгы таһынан үчүгэйдик сынньатар, үөрдэр-көтүтэр буолан оҕолор киниэхэ тардыһаллар.

Оттон Василий Куприянов оҕолоро өрөспүүбүлүкэ, дойду чиэһин көмүскүү атын сиргэ күрэхтэһэ баралларыгар кирэдьииккэ киирэн, сүүрэн-көтөн успуонсардары булан үлэлиирэ кэрэхсэбиллээх,  ити кини үлэтигэр бэриниилээҕин көрдөрөр.

‒ Проня бүгүҥҥү ситиһиитэ ‒ улахан успуорка саҕалааһын эрэ буолар. Төһө кыайарбытынан өссө дьарыктаныахпыт. Уопсайынан, саха оҕото төрүүрүгэр разрядтаах төрүүр диэн этэллэр. Дэлэҕэ даҕаны, сахалары Сибиир еврейдэрэ диэн этиэхтэрэ дуо. Биһиги оҕолорбут ону аан дойду таһымыгар өрүү дакаастыыллар. Онон күүскэ дьарыктаныахха, оҕону сайыннарыахха эрэ наада.

Кырачаан Проня үрдүк ситиһиитин сахалыы сиэринэн сэмэйдик бэлиэтээтилэр. Сотору түөрт оҕо Челябинскэйгэ күрэхтэһиигэ кытта барыахтара, ону сэргэ быйылгыттан оскуолаҕа  дуобакка дьарыктыыр иккис тириэньэр Тулуйхан Михайлов үлэлии кэллэ. Онон ситиһиилэр өссө да кэлиэхтэрэ турдаҕа.

Источник: Виктория БЕЛОЛЮБСКАЯ. Мегино-Кангаласский улус.
Если Вы заметили ошибку в тексте или опечатку, просто выделите этот фрагмент и нажмите Ctrl+Enter, чтобы сообщить об этом редактору.
Спасибо!
Система Orphus
ПОСЛЕДНИЕ МАТЕРИАЛЫ