АФИША КАРТА ЯКУТСКА 2GIS Билеты онлайн
ПОГОДА
-42
Туманно
КУРС ВАЛЮТ
Курсы валют
Курс ЦБ
$  58.84
 69.30
ЛЕНТА НОВОСТЕЙ
Архив новостей
Сахалыы
27 ноября 2017, 15:39
277

“Дорҕоон дойду”

Култуура, ырыа-тойук эйгэтигэр биир бэлиэ түгэн буолан ааста.

“ДОРҔООН ДОЙДУ” диэн бырайыак быйылгы аанын аста, сүрэхтэннэ.

Салайааччы – Герасим ПАВЛОВ. Ыытааччы – Михаил Семенов-Мэхээс СЕРКАН.

Тэрийсээччилэр – Култуура министиэристибэтин Ресурснай-бырайыактыыр киинин дириэктэрэ Михаил Донской, Гавриил Свинобоев – ааттаах-суоллаах мусукаан Гайаат.

Култуурабыт миниистирэ Владимир Тихонов көмөлөһөөччүтэ Роман Доҕойдооноптуун, Опера уонна балет тыйаатырын дириэктэрэ Сергей Сюльскай, “Эллэйаада” тэрилтэ салайааччыта Михаил Ершов, Уус Аллантан култуура салайааччыта Иннокентий Аммосов, сахалыы саҥаны баһылаабыт туурак уола Үмит (Эрэл) Шоһин уо.д.а. кытыннылар, баҕа санааларын эттилэр.

Тэрээһин сыала-соруга: саха төрүт ырыатын-тойугун, муусукатын, тыыннаах дорҕоону тилиннэрии, саҥа талааннары таһаарыы, дьиҥ саха дорҕоонун киэҥник тарҕатыы.

Үс хайысхалаах: Дьүрүскэн, Хоһоон, Ырыа-тойук.

Бу киэһэ саҕалааһын буолан бу хайысханы барытын хаптылар. Үс чаастан ордук үс түһүмэҕинэн барда да, сылайбыт-элэйбит, салҕыбыт баарын көрбөтүм.

Бастакы түһүмэх:

“КЫЛ САХА” оркестр толоруутугар дьүрүскэн дьүһүйүүлэрэ. Салайааччы – Анна Томская.

Үстүрүмүөннэрин олоччу саталлаах уус Руслан  Габышев эт илиитинэн оҥорбут. Барыта кыл утахтаах, смычога – талах.Улахан саха бөлүһүөгэ эбит.
Оннооҕор сэриилэһэр ох сааны дьиктитик ыллыыр кырыымпаҕа кубулуппут, аны, ол оҕо, уоһун даҕайда да, хомустуу дьүрүлээн киирэн барар.
Дьэ, дьикти…

Иккис түһүмэх:

Хоһоон.

ОМУК УОЛА хоһооннорун аахта, ыйытыыларга хоруйдаата.
Сүрэхтэммэтэх кинигэтин манна кэлэн сүрэхтээтэ.

Үһүс түһүмэх:

Ырыа-тойук.

Дьэ, манна тэрийээччилэр бары кытыннылар. Байаан, гитаара доҕуһуоллаах истиҥ-иһирэх сахалыы ырыалар дьэрэйдилэр, куту-сүрү иэйиинэн угуттаатылар.

Үтүөлээх артыыспыт Анастасия Готовцева кытынна.

Биир бастыҥ айааччы Мэхээс Сэмэнэп айымньылара үгүстүк иһилиннилэр.

Түмүккэ Тумус Мэхээлэ “Чорооннорго” анаан айбыт “Ыллаан-туойан ааһыаҕыҥ” ырыатын тардан кэбистилэр. Бу ырыаны атаһым Махно Болуодьа ыллыыра. Түмсүү кыттыылаахтара бары хаба тардан ылан көхтөөхтүк ылластыбыт.

Ити курдук сүрдээх истиҥ-иһирэх алтыһыы буолан ааста, саха кута сандаарда, сүрэх сылаанньыйда. Хаартыскаҕа түстүбүт, үөрдүбүт—көттүбүт, бары астынныбыт.

Тэйийээччилэргэ барҕа махтал!

“Дорҕоон Дойду” баар буоллун, үүнэ-сайда, сахам дьонун өрүү өрө күүрдэ, үөрдэ-көтүтэ турдун!

Ахтыллыбакка хаалбыттар бука диэн баалаамаҥ, бэйэм баҕа санаабынан сырдаппыта буоллум. Суруналыыс идэтэ суохпун…

Уонна  ити киэһээ төлө көппүт хоһоон тылынан түмүктээн кэбиһиим.

“ДОРҔООН ДОЙДУ”

“Дорҕоон Дойду” аанын аста,

Урааҥхайга ананна.

Дьоҕурдаахтар мустуохтара

Тоҕуоруһа бу манна.

“ДОРҔООН ДОЙДУ” –

САХА ТЫЫНА,

ЫРЫА-ХОҺООН УЙАТА.

“ДОРҔООН ДОЙДУ” –

ИЭЙИИ КЫЫМА,

ТЫРЫМНААТЫН ЫРААТА.

Бу Дойдуга сырыттахха

Дуоһуйууттан сүрэх ыллыыр,

Дьүрүскэнтэн саха кута

Дьүкээбиллии тырымныыр.

Кэрэ эйгэ өрүүтүн да

Куту-сүрү сымнатар,

Үтүө дьону түмэ тарда

Өрөгөйгө салайар.

 

Источник: Омук Уола
Если вы стали очевидцем интересного события или происшествия, присылайте фото и видео на Whatsapp +7 (999) 174-67-82
Если Вы заметили опечатку в тексте, просто выделите этот фрагмент и нажмите Ctrl+Enter, чтобы сообщить об этом редактору.
Спасибо!
Система Orphus
ТОП НОВОСТИ
ПОСЛЕДНИЕ МАТЕРИАЛЫ