АФИША КАРТА ЯКУТСКА 2GIS Билеты онлайн
ПОГОДА
28
Ясно
КУРС ВАЛЮТ
Курсы валют
Курс ЦБ
$  59.54
 67.69
ЛЕНТА НОВОСТЕЙ
Архив новостей
Сахалыы
27 марта 2017, 16:01
416

«Бичик» күннэрэ — Томпо сиригэр

Кулун тутар 16-17 күннэригэр Сахабыт сирин биир кэрэ айылҕалаах, дьоһун-мааны дьонноох Томпо улууһугар С.А. Новгородов аатынан «Бичик» национальнай кинигэ кыһатын күннэрэ буолан аастылар.
Бастакынан Чурапчы улууһун Н.Д. Субуруускай аатынан Болтоҥо орто оскуолатыгар көрсүһүү буолла. Оскуола оҕолоро, учууталлар мустан «Бичик» кыһа устуоруйатын, үлэтин-хамнаһын, саҥа бырайыактарын туһунан бэрт сэргээн иһиттилэр, кэпсэтиигэ кыттыстылар. Поэтесса Саргылаана Гольдерова-Саргы Куо, суруйааччы, суруналыыс, «Байанай» сурунаал эрэдээктэрэ Александр Постников-Сындыыс айымньылаах үлэлэрин туһунан кэпсээтилэр, хоһооннорун ааҕан иһитиннэрдилэр. Оҕолор төрөөбүт дойдуларын устуоруйатын, биллиилээх дьонун, саха суруйааччыларын бэркэ билэллэрэ сөхтөрдө. Үөрэнээччилэр саха суругун-бичигин тэрүттээччи Сэмэн Ноҕоруодап, биллэр суруйааччылар Дьуон Дьаҥылы, Сэмэн Тумат уо.д.а. биир дойдулаахтара буолалларынан киэн тутталлара харахха быраҕыллар. Истиҥ-иһирэх кэпсэтии түмүгэр «Бастыҥ ааҕааччы» диэн бэлиэ суругу уонна кинигэ бэлэҕи «Бичик» национальнай кинигэ кыһатын дириэктэрэ А.В. Егоров 10 кылаас үөрэнээччитигэр Лия Ксенофонтоваҕа туттарда. Маны таһынан оскуолаҕа «Бичик» библиотечка, Саргы Куо уонна Сындыыс бэйэлэрин кинигэлэрин бэлэх ууннулар.

Томпо улууһун киинигэр Хаандыгаҕа бэрт сэргэх көрсүһүү буолан ааста. Ол курдук, «Бичик» үлэһиттэрэ бастаан Горно-геологическай техникум үөрэнэр куорпуһугар, Ускуустуба оскуолатыгар экскурсиялаатылар, эдэр ыччат, оҕо аймах үөрэнэригэр, сайдарыгар бары усулуобуйа тэриллибитин астына көрдүлэр. Салгыы нэһилиэнньэни, кинигэни таптаан ааҕааччылары кытары көрсүһүү олохтоох бибилэтиэкэҕэ тэрилиннэ. «Бичиктэри» Аан дойдутааҕы норуот ырыатын куонкуруһун лауреата «Ахтылҕан» эр дьон ансаамбыла иэйиилээх ырыатынан, Хаандыга оскуолатын оҕолоро уус-уран композицияларынан эҕэрдэлээтилэр. Көрсүһүүгэ мустубут дьон кинигэ кыһатын күннээҕи үлэтин, инники соруктарын, сонун бырайыактарын туһунан дуоһуйа иһиттилэр, элбэх интэриэһиргиир ыйытыыларын биэрдилэр, санааларын үллэһиннилэр. Икки өттүттэн олус туһалаах, ирэ-хоро кэпсэтии, ырытыһыы таҕыста. Саргы Куо, Сындыыс бэйэлэрин айымньыларыттан уус-ураннаан ааҕан көрсүһүүнү киэргэттилэр. Көрсүһүү түмүгэр үгэс курдук бэлэхтэри туттарыы буолла. Ол курдук, «Ааҕар дьиэ кэргэн» бэлиэ суруктары Олесова Алена Ивановна, Саввина Александра Васильевна дьиэ кэргэннэрэ, «Иэйии куттаах ааҕааччы» анал ааты Стручкова Александра Семеновна, «Өбүгэ төрдүн үөрэтээччи» ааты Неустроева Евдокия Семеновна, «Кэскиллээх ааҕааччы» ааты Герасимов Алеша ыллылар. Маны таһынан «Бичик» национальнай кинигэ кыһатын үрдүк наҕараадатын — «Кинигэни таһаарыыга үтүөлэрин иһин» мэтээли — 28 сыл устата эҥкилэ суох, туох баар дууһатын ууран туран Хаандыгаҕа уонна чугас сытар бөһүөлэктэргэ «Бичик» кинигэлэрин билиһиннэрэр, тарҕатан атыылыыр Попов Гавриил Гаврильевичка мустубут дьон ытыс тыаһын доҕуһуолугар уйдаран директор Егоров А.В. туттарда.
Мин, Степанова Марина Петровна, Томпоҕо Кириэс Халдьаайыга, Мэҥэ Алдаҥҥа сырыыбыт туһунан информация биэрэбин


Инникини түстээн, саҥа саҕахтары арыйан…
«Бичик күннэрэ» Томпо оройуонугар
Бу дьыл кулун тутар 16–17 күннэригэр С.А. Новгородов аатынан «Бичик» национальнай кинигэ кыһата үгэс буолбут «Бичик күннэрин» Томпо оройуонун Кириэс Халдьаайы, Хаандыга, Саһыл, Арыы Толоон, Мэҥэ Алдан бөһүөлэктэригэр нэһилиэнньэни кытта көрсүһүү, кинигэ атыыта буолан ааста.
Тэрээһиҥҥэ кыһа дириэктэрэ А.В. Егоров, сүрүннүүр эрэдээктэрэ В.Н. Луковцев, Үөрэх уонна оҕо кинигэтин киинин методист-эрэдээктэрэ М.Г. Никифорова, ааҕааччы киэҥ араҥатыгар туһуламмыт литература эрэдээксийэтин эрэдээктэрэ Н.П. Андросова, Сакааһынан тахсар литература эрэдээксийэтин эрэдээктэрэ М.П. Степанова, суруйааччылар С. Гольдерова-Саргы Куо, А. Постников-Сындыыс нэһилиэктэр олохтоохторун кытта атах тэпсэн олорон истиҥник сэһэргэстилэр, санаа атастастылар. Кыһа үлэтин-хамнаһын сырдаттылар, саҥа тахсыбыт кинигэлэри билиһиннэрдилэр, сонун бырайыактар, былааннар баалларын туһунан кэпсээтилэр. Маны таһынан, саҥа тахсыбыт үөрэх кинигэлэрин, методическай босуобуйалары билиһиннэрдилэр. Олохтоохтор сэргээн иһиттилэр, кэпсэтиигэ кыттыһан интэриэһиргиир ыйытыыларын биэрдилэр, этии киллэрдилэр, баҕа санааларын үллэһиннилэр. Ол курдук, классик суруйааччылар айымньылара, Бэс Дьарааһын «Балыгыай» сэһэнэ, А. Сыромятникова талыллыбыт айымньылара, суруйааччы туһунан кинигэ, нэһилиэк историятын туһунан уо.д.а. ис хоһоонноох кинигэлэр тахсыахтарын баҕаралларын эттилэр.
Байаҕантай нэһилиэгэр Сэбиэскэй Сойуус Геройа, албан аатырбыт снайпер, хорсун, хоодуот буойун Федор Матвеевич Охлопков аатынан Кириэс Халдьаайытааҕы орто оскуолатааҕы түмэл үлэһитэ нэһилиэк туруу үлэһит, үтүө-мааны, чулуу дьонун туһунан билиһиннэрдэ, үгүһү кэпсээтэ. Оскуола дириэктэрэ Александр Федорович Охлопков, Ф.М. Охлопков төрөппүт уола, аҕатын туһунан олус интэриэһинэй түгэннэри умсугутуулаахтык сэһэргээтэ.
Мэҥэ Алдаҥҥа көрсүһүү нэһилиэк кулуубугар буолла. Кулуупка сыһыары Егор Петрович Неймоховка аналлаах түмэл дьиэтин туттарбыттара, үгүс матырыйаалы түмэннэр үлэ күөстүү оргуйа турара махталлаах, кэрэхсэбиллээх.
«Бичик» үлэһиттэрэ көрсүһүү аайы өттүк харалаах, илии тутуурдаах сылдьар идэлээхтэр. Ол курдук, үгэс буолбут «Бастыҥ ааҕар оҕо», «Бастыҥ ааҕар дьиэ кэргэн» диэн анал ааттар, ону сэргэ көхтөөхтүк кыттыбыт оҕолорго, дьоҥҥо-сэргэҕэ өйдөбүнньүк бэлэхтэр туттарылыннылар. Бибилэтиэкэлэр саҥа кинигэлэри бэлэх ылан үөрүүлэрэ үксээтэ.
Ааҕыы сайдыытын таһымын үрдэтэр сыаллаах-соруктаах иһирэх кэпсэтии, дьон-сэргэ санаатын түмэ тардан атах тэпсэн олорон истиҥник сэһэргэһии, биир санааны тобулан, инникини түстээн санаа атастаһыыта саҥа саҕахтары арыйыаҕа, кэскиллээҕи тэрийиэҕэ. Кинигэҕэ үйэтитиллэр уус-уран литература, төрөөбүт төрүт тыл, устуоруйа, духуобунай култуура, норуот ийэ өйө, дириҥ далай санаата саха киһитин ис кыаҕын арыйан сайдыы алгыстаах аартыгар сирдиэҕэ.

 

Источник: СӨ С.А. Новгородов аатынан “Бичик” национальнай кинигэ кыһатын пресс-киинэ
Если вы стали очевидцем интересного события или происшествия, присылайте фото и видео на Whatsapp +7 (999) 174-67-82
Если Вы заметили опечатку в тексте, просто выделите этот фрагмент и нажмите Ctrl+Enter, чтобы сообщить об этом редактору.
Спасибо!
Система Orphus
ПОСЛЕДНИЕ МАТЕРИАЛЫ